1 Kōrinto 3
3
Te manaꞌu taꞌe paꞌari o te taina o Kōrinto
1E te taina, hora era ꞌā ōꞌoku ꞌi muri i a kōrua, kai tano a au mo hāpī atu i a kōrua pa he hāpī iŋa ōꞌoku i te nuꞌu haka tere e te ⌊Vārua Maitai⌋ paꞌari ꞌi te meꞌe o te ꞌAtua. I hāpī atu ai pa he nuꞌu taꞌe haka moe rahi i te manaꞌu ꞌi ruŋa i a Ietū, maꞌu oho i te manaꞌu o te ao nei, pa he ŋā poki ꞌi te meꞌe o te ⌊Kiritō⌋. 2ꞌE, pa he ŋā poki ꞌomo-ꞌomo ū hai ū e vaꞌai ena ꞌe taꞌe hai kai paŋahaꞌa, pē ira tāꞌaku meꞌe hāpī atu era, he hāpī taꞌe aŋarahi mo aŋi-aŋi e kōrua. Kai tano riva-riva ꞌana, paꞌi, a kōrua mo aŋi-aŋi i te hōhonu o te hāpī o te ꞌAtua, ꞌe ꞌātā ki te hora nei, ko te ai iŋa ꞌā pē ira. 3Ko te manaꞌu iŋa ꞌana kōrua pa he taŋata o te ao taꞌe ⌊haka moe i te manaꞌu⌋ ꞌi ruŋa i a Ietū. Hai mākota ꞌe hai tātake e takeꞌa ena ko te manaꞌu iŋa ꞌana kōrua hai manaꞌu taŋata, ꞌe o rā manaꞌu te haka tere i a kōrua. 4Hora ena o te kope e tahi e kī ena: «ꞌA Pauro a au» ꞌe o te rua te kī: «ꞌA ꞌĀporo a au», e haka tere ꞌana hai manaꞌu taŋata mau nō.
5Ka haka topa rā te kōrua manaꞌu. ¿Ko ai a Pauro ꞌe ko ai a ꞌĀporo? He tāvini nō o te ꞌAtua, ꞌe mai i a rāua a kōrua e haka moe ena i te manaꞌu ꞌi ruŋa i a Ietū. Te meꞌe aŋa nō o māua he meꞌe kī mai e te ꞌAtua. 6A au pa he kope pī i te karu ꞌe a ꞌĀporo pa he kope pī-pī vai, ꞌe o te ꞌAtua te haka tupu ꞌe te haka nui-nui. 7ꞌO ira, taꞌe ki te ŋā kope era o rāua i pī ꞌe pī-pī hai vai ana haꞌahana-hana, ki te ꞌAtua, kope era ꞌāꞌana i haka tupu ꞌe i haka nui-nui i rā meꞌe ꞌoka era. 8Te kope pī i te karu ꞌe te kope pī-pī hai vai ko tū tōroꞌa ꞌā, ꞌe mo te ꞌAtua e ꞌauhau i te rāua aŋa. 9He tāvini nō māua o te ꞌAtua, ꞌe a kōrua pa he ꞌāua ꞌoka kai ꞌi ira a māua e aŋa ena, ꞌe, takoꞌa, pa he hare aŋa e te ꞌAtua mōꞌona.
10Hai riva rahi o te ꞌAtua, ꞌāꞌaku i haꞌamata i hāpī atu ki a kōrua i te parau ꞌāpī riva-riva o ruŋa i a Ietū Kiritō; ꞌe, takoꞌa, i hāꞌūꞌū i te nuꞌu raꞌe o kōrua mo haka moe i te rāua manaꞌu ꞌi ruŋa i a Ietū, pa he kope ꞌāꞌana i aŋa i te mekerā ꞌi ruŋa ka haka tuꞌu era te hakari o te hare. ꞌE, hora nei, o te tētahi te hāpī te oho atu o ruŋa i a Ietū mo haka hio-hio o kōrua ꞌi te ara o te ꞌAtua, pa he nuꞌu o rāua te haka tuꞌu i te hakari o te hare ꞌi ruŋa i te mekerā. Te meꞌe nō, e uꞌi e aŋa riva-riva te hare.
11Te hare aŋa e te ꞌAtua e tahi mau nō mekerā ꞌi ruŋa e haka tuꞌu ena te hare, ko Ietū Kiritō, ꞌe ꞌina e tahi kope mo mono i te mekerā nei.#3.11 Te auraꞌa o te vānaŋa nei: ꞌina e tahi kope mo kī atu e ai rō ꞌā te rua rāveꞌa mo eꞌa o te taŋata mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa mo taꞌe ai hai Ietū Kiritō mau nō. 12ꞌI ruŋa i te mekerā nei te hare ana haka tuꞌu hai meꞌe hio-hio pa he piru, pa he parata, pa he māꞌea hopeꞌa ena o te nehe-nehe ꞌe o te hauhaꞌa, ꞌe taꞌe ꞌō hai meꞌe e vera nō pa he miro, pa he mauku, ꞌe pa he ꞌohe.
13Te huru o te aŋa o te taꞌatoꞌa ka takeꞌa riva-riva ena ꞌi te mahana o te ture hopeꞌa, mahana ka uꞌi era e Ietū hai ahi hoki i aŋa riva-riva rō ꞌo ꞌina. 14Mo taꞌe vera o rā meꞌe aŋa era, he vaꞌai e te ꞌAtua hai meꞌe mo koa. 15ꞌE mo vera, e ko vaꞌai; ꞌe, ka ai atu pē ira, ko te eꞌa iŋa ꞌana rā kope mai roto i te ūtuꞌa o te hara ꞌe ko te ravaꞌa iŋa ꞌana i te ora ꞌāpī ꞌina he hopeꞌa raꞌa, pa he taŋata ravaꞌa tere mai roto i te hare e vera rō ꞌā ꞌina he meꞌe maꞌu ꞌi te rima.
16¿ꞌIna hō kōrua he ꞌite: pa he ⌊Kona Haꞌamuri ꞌAtua⌋ ꞌā a kōrua, ꞌi te meꞌe era ꞌi roto i a kōrua e noho ena te Vārua Maitai? 17Te kope tōtōā i te Kona Haꞌamuri ꞌAtua, te auraꞌa, te kope haka tumu i te ture mo haꞌataꞌa o kōrua, he haka ūtuꞌa e te ꞌAtua. Te Kona Haꞌamuri ꞌAtua, paꞌi, meꞌe moꞌa, ꞌe rā Kona ko kōrua.
18E uꞌi ꞌo reo-reo ki a kōrua ꞌā hai manaꞌu ena pē nei ē: nuꞌu mārama-rama kōrua ki te mata o te taŋata o te ao nei. I hau rō atu ꞌi te tano mo riro o kōrua pa he nuꞌu taꞌe mārama-rama, ki riro iho ai kōrua mo te ꞌAtua he nuꞌu mārama-rama mau ꞌā. 19Te manaꞌu mārama-rama o te taŋata o te ao nei he meꞌe maꞌa-maꞌa nō atu e tahi mo te ꞌAtua. Pa he meꞌe kī ꞌi ruŋa i te ⌊Pāpaꞌi Moꞌa⌋: «Te nuꞌu manaꞌu he nuꞌu mārama-rama a rāua e haka ꞌite rō ꞌā e te ꞌAtua taꞌe pē ira hai taꞌe haꞌatiꞌa mo tano o te rāua meꞌe manaꞌu mo aŋa». 20E kī takoꞌa rō ꞌana: «Te ꞌAtua ko ꞌite ꞌā: te manaꞌu o te nuꞌu manaꞌu pē nei ē: nuꞌu mārama-rama a rāua, he meꞌe maꞌa-maꞌa nō atu e tahi». 21ꞌO ira ꞌina e tahi o kōrua mo teꞌo-teꞌo ꞌa ꞌai i hāpī. Te meꞌe taꞌatoꞌa, paꞌi, o kōrua ꞌe mo te kōrua riva-riva: 22a Pauro, a ꞌĀporo, a Tefa, te ao, te ora, te mate, te hora nei, pe muꞌa ka oho ena; taꞌatoꞌa meꞌe o kōrua, 23ꞌe a kōrua ꞌa Ietū Kiritō, ꞌe a Ietū o te ꞌAtua.
اکنون انتخاب شده:
1 Kōrinto 3: rap
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2018, Wycliffe Bible Translators, Inc. All rights reserved.