1 Kōrinto 5
5
He taŋata aŋa i te meꞌe taꞌe tano
1E te taina, ko ŋaroꞌa ꞌana a au i te vānaŋa: te kope e tahi o roto i a kōrua ko noho ꞌā ki te viꞌe o tōꞌona matuꞌa tane. Te meꞌe tuꞌu pē nei meꞌe taꞌe tano, ꞌe he hara taparahi-taꞌata ꞌina kai takeꞌa ꞌā korohaŋa ꞌi roto i te nuꞌu kai ꞌite ko ai te ꞌAtua parautiꞌa mau. 2Ka ai atu pē ira, ko te teꞌo-teꞌo iŋa ꞌā a kōrua pē nei ē: ko ꞌite riva-riva ꞌana a kōrua i te meꞌe o te ꞌAtua. Te tano mau: e māui-ui te kōrua māhatu ꞌi te meꞌe tuꞌu pē nā. Te taŋata aŋa i te meꞌe tuꞌu pē nei e haka eꞌa mai roto i a kōrua.
3ꞌE, ka ai atu taꞌe a au ꞌi te hora nei ꞌi muri i a kōrua, he haka ꞌite atu a au i tōꞌoku manaꞌu pa he meꞌe ena ē: nā a au ꞌi muri i a kōrua. Te kope aŋa i te meꞌe tuꞌu pē nā e ai rō ꞌana te ūtuꞌa tano mōꞌona. 4Hora ena o kōrua ka taka-taka tahi ena mo haka eꞌa i a ia, a au takoꞌa ꞌi muri i a kōrua, ꞌe pē ira takoꞌa ꞌana te pūai o Ietū Kiritō Pūꞌoko Haka Tere o tātou. ꞌI rā hora, hai ꞌīŋoa ōꞌona, 5he haka rē kōrua i te taŋata ena ki te rima o Rukifero mo haka ꞌamo hai ꞌati, ki huri haka ꞌou ai i te manaꞌu ki te ꞌAtua ꞌe, ꞌi te mahana era o te hoki iŋa mai o te ⌊Kiritō⌋, he eꞌa tōꞌona vārua mai roto i te ūtuꞌa o te hara ꞌe he ravaꞌa i te ora ꞌāpī ꞌina he hopeꞌa raꞌa ꞌo te huri haka ꞌou o tōꞌona manaꞌu ki te ꞌAtua.
6E ko tano kōrua mo teꞌo-teꞌo. E kī rō ꞌana, paꞌi: «E tahi ꞌapa ꞌiti-ꞌiti o te revaura he ahu tahi te haraoa». Pē ira takoꞌa ꞌana hai taŋata mau nō e tahi e hara nō meꞌe rahi nō atu nuꞌu. 7Te meꞌe haŋa he toꞌo mai roto i a kōrua i te revaura ena, ki ai ai a kōrua he nūnaꞌa taŋata ꞌina e tahi kope hara o roto, pa he haraoa aŋa iho taꞌe hoa hai revaura. A kōrua, paꞌi, he haraoa kai ꞌi te ⌊Pakate⌋ ꞌina he hoa hai revaura, he nuꞌu ꞌina e tahi hara ꞌo te ⌊haka moe i te manaꞌu⌋ ꞌi ruŋa i a Ietū. E manaꞌu: a Ietū he māmoe o te Pakate tūtia mo haka eꞌa i a tātou mai roto i te hara. 8ꞌO ira, e ai te tātou noho iŋa, paurō te mahana, pa he haraoa ꞌina kai ꞌānoꞌi hai revaura, noho iŋa ꞌina e tahi meꞌe taꞌe tano aŋa, pa he meꞌe aŋa o muꞌa ꞌā, ꞌe noho iŋa haꞌatura parautiꞌa ki te ꞌAtua hai māhatu maꞌitaki.
9ꞌI ruŋa i tāꞌaku meꞌe pāpaꞌi raꞌe atu era i hāꞌaki atu ai a au: ꞌina kōrua ko ai he repahoa o te nuꞌu moe i te viꞌe ꞌo i te taŋata taꞌe he kenu ꞌāꞌana. 10Te kī nei ꞌāꞌaku: taꞌe ka haka tapa mau ꞌā a kōrua mai te nuꞌu taꞌatoꞌa o te ao nei moe i te viꞌe ꞌo i te taŋata taꞌe he kenu ꞌāꞌana, ꞌe mai muri i te nuꞌu nou-nou, toke-toke ꞌe haꞌamuri ki te ꞌītoro. Mo ravaꞌa, paꞌi, e kōrua mo aŋa i te meꞌe nei, e taꞌe ai mau nō kōrua ꞌi te ao nei. 11Tāꞌaku kī: nuꞌu nō era mo kī atu he taina rāua o kōrua ꞌi te haka moe iŋa i te manaꞌu ꞌi ruŋa i a Ietū, ꞌe te rāua meꞌe aŋa he moe i te viꞌe ꞌo i te taŋata taꞌe he viꞌe ꞌo he kenu ꞌāꞌana, he nou-nou, he haꞌamuri ki te ꞌītoro, he vānaŋa taꞌe tano mo te rua, he rava taꞌero, ꞌo he toke, ꞌina kōrua ko ai he repahoa o rāua, ꞌe ꞌina ko kai ꞌi muri. 12-13Taꞌe he meꞌe o tātou te kī i te meꞌe tano ꞌe i te meꞌe taꞌe tano o te nuꞌu taꞌe haka moe i te rāua manaꞌu ꞌi ruŋa i a Ietū; mo te ꞌAtua a rāua e kī. Ki te nuꞌu haka moe i te manaꞌu ꞌi ruŋa i a Ietū a tātou ana ture. ꞌO ira, e haka eꞌa mai roto i a kōrua te kope hara.
اکنون انتخاب شده:
1 Kōrinto 5: rap
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2018, Wycliffe Bible Translators, Inc. All rights reserved.