Maka 5
5
Yesuma꞉ hoke temokoma꞉ keao hayeke hali homeke epeaeyekeeki
(Ma꞉tiu 8꞉28-34, Luku 8꞉26-39)
1Mo hande ikali leke mone tea꞉ nane yopuata꞉ mo Kedasa wanda꞉halina꞉ kenke nane pemekeme. 2-3Kutupa koto kone mo kawaso mina꞉pa꞉lao puaata꞉ weleke pa꞉ta꞉ hoke temoko pitieke hali ma꞉nda꞉ manda꞉ hande piekeme. Mo halita꞉ hali holiki u hayeke tikene da pa꞉ta꞉manu hao opolo a꞉pa Yesu manda꞉ hande pipikime. Hande halita꞉ koto tikena꞉ da pa꞉ta꞉manu hao hayekeme. Hali ma꞉nda꞉ma꞉ seni puma꞉ kone ipiki pa tonkaapeke na yeekeme. 4Amba꞉ta꞉ hoto eleke eleke ipika꞉ kiki anke yaapo seni pu manuma꞉ tonkao haemekepate ipika꞉ kiki tonkao hayeke seni pumanu tunkula꞉tiki piekeme. Kutupa ipika꞉ anke tonkao hayeke seni pumanu tunkulu bepi pia꞉tiki piekeme. Kutupata꞉ hali ma꞉nda꞉ma꞉ honkopu hao homu peaapeke na yeekeme. 5Ipikana꞉ma꞉ tikene da pa꞉ta꞉manu pote pa꞉ta꞉manu make timba natena꞉ hoto paeyao e̱ wi alo hata꞉ ipika꞉ kone toopima꞉ litolo hata꞉ hao hayekeme.
6Kutupa ipikita꞉ papate hata꞉ Yesu hando haota꞉ a̱i̱ya pua ipiki pa꞉ta꞉ panda꞉ puniaeyekeme. 7Kutupa pi anekehapu alo hata꞉ alota꞉ Yesuo. Neketa꞉ ota꞉ oli Manda Hala꞉ Koda꞉ Tiekena꞉ Eiyekee leekeme. I̱ pa꞉ta꞉ eki puluekema꞉ a꞉pa pipe laa Koda꞉ma꞉ I̱ handolo haena꞉ neke pa꞉ta꞉ alo I̱ tanda tanda na peaapee leekeme. 8Yesuma꞉ amba꞉ kone ipiki pa꞉ta꞉ Hoke temokoo. Do hali mina꞉pa꞉lao pue leeke handaa mo halima꞉ koto leekeme.
9Kutupa Yesuma꞉ ipiki pa꞉ta꞉ lota꞉ pitolo alota꞉ Naka꞉ bikita꞉ epi ya꞉ka꞉ta꞉pe laa ipikana꞉ma꞉ alota꞉ Yaka bikita꞉ Eleke elekee laata꞉ Nikita꞉ wopu eleke eleke halomeke handa loa꞉me leekeme. 10Kutupa ipikana꞉ma꞉ Yesu pa꞉ta꞉ Mo hoke temokomanu do kenke mina꞉pa꞉lao na pena꞉ laa honke honke wopu leekeme.
11Ma꞉na꞉ titi peiyene tea꞉na꞉ ne nalo haena꞉ 12mo hoke temoko manuma꞉ Yesu pa꞉ta꞉ honke lemekeeki dupa. Ma꞉na꞉ titina꞉ weleke pa꞉ta꞉ pitulu pomono lae lemekeme. 13Koto ekina꞉ Yesuma꞉ pitulu pena꞉ leekeme. Mo hoke temoko manuma꞉ mo hali mina꞉pa꞉lao ma꞉na꞉ titina꞉ weleke pa꞉ta꞉ pitulu pemekeme. Koto ma꞉na꞉ titita꞉ 2 daoseni tupa꞉ mo peiyene seseme̱le̱na꞉ a̱i̱ya hola꞉pa꞉niao ikali pa꞉ta꞉ puaata꞉ ikali naa honki lemekeme.
14Koto ekina꞉ mo ma꞉na꞉titi handeteke haemeke haliwekima꞉ pindipa puaata꞉ daoni nane haemeke wanda꞉hali topu da pa꞉ta꞉manu haemeke wanda꞉hali make la꞉tiki pomimikita꞉ wanda꞉halima꞉ hande pieke ekimanu handuluekema꞉ pemekeme. 15Kutupa Yesu pa꞉ta꞉ a꞉paata꞉ amba꞉ hande weleke pa꞉ta꞉ hoke temokomanu pitieke hali koto pa꞉ta꞉ dau yama epeke hone wia pitiekeeki handemeke handaa paala꞉ma꞉ homemekeme. 16Kutupa amba꞉ hande hoke temokomanu pitieke hali pa꞉ta꞉ pieke ekimanu make mo ma꞉na꞉manu pa꞉ta꞉ pieke ekimanu make handemeke wanda꞉halima꞉ta꞉ la hale hale pimikime.
17Koto ekina꞉ koto kone Yesu ika꞉ kenke mina꞉pa꞉lao pena꞉yeke Pu pu lemekeme.
18Hande kawasona꞉ kone pitulu pulu haena꞉ amba꞉ hoke temokomanu pitieke halima꞉ Yesu pa꞉ta꞉ Hapana꞉e laa pi wopu leekeme.
19Koto leekepate Yesuma꞉ na epena꞉ laaka꞉na꞉ta꞉ ipiki pa꞉ta꞉ alota꞉ Naka꞉ Tekehalima꞉ neke pa꞉ta꞉ peaasa꞉ ekimanu make neke pa꞉ta꞉ a꞉ta꞉ma꞉ homa꞉la꞉ ekimanu make naka꞉ yankeketiti pa꞉ta꞉ pua lapeke leekeme.
20Mo halima꞉ Daoni kiki yaapo haemeke kenke nane puaata꞉ Yesuma꞉ peaasa꞉ ekimanu waloendi piekeme. Kutupa wanda꞉hali paeyaoma꞉ opuaata꞉ penkilipa꞉tia pomimikime.
Diaitusina꞉ waneke pita꞉ Yesuna꞉ dau wataeyeke wanda꞉ yaapo
(Ma꞉tiu 9꞉18-26, Luku 8꞉40-56)
21Yesu mo kawasona꞉ pita mone tea꞉na꞉ paa la꞉ka꞉la peeketa꞉ wanda꞉hali wopu ipiki pa꞉ta꞉ a꞉pa mombelemekeme. Ipikita꞉ tunkulu pa ula꞉ ikali tea꞉na꞉ haena꞉ mombelemekeme. 22Pi hotu haemeke da you hali ma꞉nda꞉ Diaitisima꞉ a꞉pa Yesuna꞉ anke teke pa꞉ta꞉ panda꞉puniao honke alo hata꞉ alota꞉ 23Ya wandikisiki ota꞉ homuluekema꞉ taapolo pila꞉me leekeme. Tiao haena꞉yeke nakana꞉ma꞉ a꞉pa naka꞉ kikima꞉ ipiki wataapeke leekeme.
24Kutupa Yesu Diaitusi yaapo pepekeme. Wanda꞉hali wopu Yesu ame̱le̱ pulu hata꞉ pendila pendila putia pemekeme.
25Koto pa꞉ta꞉ wanda꞉ ma꞉nda꞉ hayekeme. Mo wanda꞉ta꞉ bapi 12 tukiki pa꞉ta꞉ hata꞉ we yopu hayekeme. 26Dokeda titima꞉ taapemeke ekima꞉ tanda halo haemekema꞉ ipika꞉ mani paeyao pa batiki piekepate we na tunkuliki pa daeyatiki piekeme. 27Wanda꞉halima꞉ Yesu pa꞉ta꞉ lemeke pi mo wanda꞉ma꞉ opuaata꞉ wanda꞉hali anka꞉lopuna꞉ pua Yesuna꞉ hoki nane puaata꞉ ipika꞉ dau wataeyekeme. 28Ipika꞉ honema꞉ta꞉ mo ipika꞉ dau wataoka꞉na꞉ta꞉ I̱ epeaalieke hone wiekeme.
29Kutupa koto kone we yopu hayekeeki tunkula ipika꞉ honema꞉ hone witolo hata꞉ta꞉ hande yeni paeya꞉me. Ameta꞉ tiaasome hone wiekeme. 30Yesuma꞉ ipika꞉ honema꞉ kone hone witolo hata꞉ ya wele pita꞉la꞉eki mandane ekita꞉ pea꞉ka꞉ta꞉me hone wiekeme. Kutupa koto kone mo wanda꞉hali pa꞉ta꞉ la꞉ka꞉la hata꞉ alota꞉ Epina꞉ kikima꞉ ya dau wataeya꞉pe leekeme.
31Ipika꞉ disaipolo haliwekima꞉ ipiki pa꞉ta꞉ alota꞉ Handa꞉taa. Do wanda꞉hali wopuma꞉ pendila pendila piteleme ekita꞉ do handolo hata꞉ kone nakana꞉ma꞉ alota꞉ I̱ta꞉ epima꞉ wataeya꞉pe aleme lemekepate
32Yesuma꞉ ipiki wataeyeke wanda꞉ o hali handuluekema꞉ hando hopa꞉liaeyekeme. 33Mo wanda꞉ma꞉ ipiki epeaeyekeeki hone witolo hata꞉ paala꞉ma꞉ homolo hata꞉ putu putu lutiki a꞉pa Yesuna꞉ anke pa꞉ta꞉ panda꞉puniaeyekeme. Kutupa Yesu pa꞉ta꞉ ota꞉ ekimanu pi peneme yao laata꞉ hande alemanu la haleekeme. 34Yesuma꞉ ipiki pa꞉ta꞉ alota꞉ Ya wandikio. I̱ pa꞉ta꞉ hone tulaase ekima꞉ tiaaseme. Puki lopaniao pua꞉peke. Naka꞉ yeni paeya꞉me leekeme.
35Yesuma꞉ pi pa alo haena꞉ mandane haliwekima꞉ hande pi hotu haemeke da you halina꞉ da nane hao a꞉pa alota꞉ Naka꞉ wandikita꞉ ota꞉ homea꞉me laa Ekipeke mo Disa honke loloendi pitelepe lemekeme.
36Koto lemekepate Yesuma꞉ na opiki mo hali pa꞉ta꞉ alota꞉ Paala꞉ma꞉ na homa꞉peke. I̱ pa꞉ta꞉ pa hone tulaapeke leekeme. 37Yesuma꞉ Pida pita꞉ Dia꞉mesi Dioni hama̱la̱꞉ make koto haliweki homeke ipiki telina꞉ leekeme. 38Pi hotu haemeke da you halina꞉ da pa꞉ta꞉ opolo pemekepate Yesuma꞉ wanda꞉hali wopuma꞉ e̱ la alu alu pitolo haemekeeki opiekeme. 39Kutupa honda꞉ pambaata꞉ wanda꞉hali pa꞉ta꞉ alota꞉ Ekipeke e̱ la alu alu pitelemepe. Mo wandikita꞉ na homa꞉la꞉pate u̱ pela꞉me leekeme.
40Wanda꞉halima꞉ ipiki pa꞉ta꞉ ki taemekeme. Kutu pimikipate Yesuma꞉ mo wanda꞉hali paeyao hama tolu liekeme. Wandikina꞉ inkiki ateke yaapo ipiki ame̱le̱ haemeke haliweki make wandiki wieke alena꞉ hatuku peekeme. 41Kutupa ipikana꞉ma꞉ mo wandikina꞉ kiki minaaka꞉na꞉ alota꞉ Talida kumi o Wandikio. Neke pa꞉ta꞉ tiae alome leekeme.
42Kuta kone mo wandiki tiao pota꞉ pomiekeme. Ipika꞉ bapita꞉ 12 paeyeke handaa loa꞉me. Koto piekeeki handaata꞉ wanda꞉halima꞉ penkilipa꞉tia pomua pomoma꞉ homemekeme. 43Yesuma꞉ iki pa꞉ta꞉ hando alo hata꞉ alota꞉ Ma꞉nda꞉ pa꞉ta꞉ na lapa꞉peke leekeme. Kutupa wandiki pa꞉ta꞉ ne mea hala꞉pa꞉peke leekeme.
اکنون انتخاب شده:
Maka 5: SEMB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
