Maka 4
4
Wae ale manuna꞉ onkoluma꞉ pi
(Ma꞉tiu 13꞉1-9, Luku 8꞉4-8)
1Mo hande ikali leke tea꞉na꞉ hata꞉ Yesuma꞉ pi pa waleekeme. Wanda꞉hali wopu a꞉pa ipiki pa꞉ta꞉ mombelemekeme. Koto ekina꞉ wanda꞉hali paeyao ikali tea꞉na꞉ haena꞉ Yesuta꞉ ikali pa꞉ta꞉ wieke palai kawaso homekena꞉ pua pitiekeme. 2Kutupa ipikana꞉ma꞉ iki pa꞉ta꞉ onkoluma꞉ laa pimanu wotu waleekeme. Pi walolo hata꞉ alota꞉
3Opua꞉pe. Hali ma꞉nda꞉ma꞉ wae alemanu tandeloluekema꞉ peekeme. 4Kutupa tandela꞉tiki pulu haena꞉ mandane wae manuta꞉ pota꞉na꞉ lopa꞉ lopa꞉ pieke ekita꞉ ba titima꞉ a꞉pa talopu nemekeme laata꞉ 5Mandane wae manuta꞉ toopimanu manda taleeke kenke sikina꞉ lopeekeme. Koto wae sunu koto kone opeekepate kenke hosiki siki taleekeeki yaalo hata꞉ 6nate talo hata꞉ piki lopaapeke na yaalo pou ta hapiekeme 7Mandane wae manuta꞉ tekeke hake ale polu pa꞉ta꞉manu lopeekeme. Kutupa mo tekeke hake alemanu opa꞉liaaso hande wae alemanu opolo pieke ekita꞉ tumbuaeyekeme. Kutu pieke ekima꞉ kiliki na a꞉eyekeme. 8Kutu piekepate mandane wae ale manuta꞉ epeke kenkena꞉ lopeekeeki patela opa꞉liaota꞉ napeke wiekeeki manuta꞉ dupae. Mandaneeki 30 tupa꞉ mandaneeki 60 tupa꞉ mandaneeki 100 tupa꞉ wiekeme leekeme.
9Kutupa Yesuma꞉ alota꞉ Katake lomba꞉la꞉ halima꞉ wotu opina꞉e leekeme.
Pi manuta꞉ onkoluma꞉ma꞉ leeke ekina꞉ teke
(Ma꞉tiu 13꞉10-17, Luku 8꞉9-10)
10Ipika꞉ honu make haena꞉ wanda꞉hali pemeke naneta꞉ ipiki teke pa꞉ta꞉ haemeke wanda꞉halima꞉ hande 12 haliweki ame̱le̱ make Yesu pa꞉ta꞉ ipika꞉ onkoluma꞉ leeke ekina꞉ lota꞉ pimikime. 11Ipikana꞉ma꞉ iki pa꞉ta꞉ alota꞉ Ikana꞉ma꞉ Koda꞉na꞉ Kilu Tombuao Hala꞉eki a꞉mbaala꞉ ekimanu handilimikie. Pate pa hao haleme wanda꞉hali pa꞉ta꞉ta꞉ onkoluma꞉ ala꞉ ekimanu homeke opilimikie.
12Handena꞉yeke onkoluma꞉manu la꞉la꞉pate handa꞉ wina꞉yeke na la꞉la꞉me.
Opina꞉yeke onkoluma꞉ pimanu la꞉la꞉pate ota꞉ hone wina꞉yeke na la꞉la꞉me.
Opimika꞉na꞉ yoluta꞉ hone ma꞉nda꞉ la꞉ka꞉la꞉ mina wimika꞉na꞉ta꞉ ika꞉ hoke hau paeyaalo pia꞉me leekeme.
Wae tandelaasa꞉ onkoluma꞉ pina꞉ teke la haleekeeki
(Ma꞉tiu 13꞉18-23, Luku 8꞉11-15)
13Kutupa Yesuma꞉ iki pa꞉ta꞉ alota꞉ Do onkoluma꞉ alo ekita꞉ ikana꞉ma꞉ hone na witelemepe. Kota꞉ do alo ekita꞉ hone na wimika꞉na꞉ta꞉ onkoluma꞉ aloeki paeyao ekipa hone wilimikipe leekeme. 14Hande wae alemanu tandeleeke halima꞉ Koda꞉na꞉ pi alemanu tandelo hala꞉me leekeme. 15Mo hande pota꞉na꞉ haleme wanda꞉hali pa꞉ta꞉ pi alemanu lopa꞉ lopa꞉ pu hala꞉me. Kutupa opitolo haena꞉ kone mo tandeleeke pi ale manuta꞉ Sadanima꞉ koto kone a꞉pa yoka꞉ mea pu hala꞉me. 16-17Mandane wanda꞉halita꞉ toopi manda taleeke kenke sikina꞉ lopa꞉niaasa꞉ wae ale manuma꞉ handelememe. Pi opuelemepate koto kone ta꞉na꞉ma꞉ homolo hata꞉ minelemepate wopu na mendiaake hosiki hao kutupa ka꞉nda꞉ma꞉ homa꞉la꞉eki make a꞉nda꞉ lita꞉la꞉eki make koto pi alena꞉ epea꞉ka꞉na꞉ta꞉ koto kone lopo halememe leekeme. 18Mandane wanda꞉halita꞉ mo tekeke hapeleke ale polu pa꞉ta꞉ tandeleeke wae ale manuma꞉ handelememe leekeme. Mo hande pi alemanu opitelemepate 19kenke hau hone wita꞉la꞉eki manuma꞉ hamoko alemanu pa꞉ta꞉ ta꞉na꞉ homa꞉la꞉eki manuma꞉ mandane alemanu pa꞉ta꞉ we pamba꞉la꞉eki manuma꞉ mo hande pi alemanu da꞉ka꞉pa꞉ miniki pita꞉ka꞉na꞉ta꞉ napeke na u halememe leekeme. 20Kutu pitelemepate mandane wanda꞉halita꞉ epeke kenke seliapona꞉ lopeekeeki manuma꞉ handelememe laa pi alemanu opua meata꞉ kutupa napeke a꞉eyo halememe leekeme. Mandaneeki 30 tupa꞉ mandaneeki 60 tupa꞉ mandaneeki 100 tupa꞉ a꞉eyo halememe leekeme.
Pa̱a̱ a꞉mbaasa꞉ pi
(Luku 8꞉16-18)
21Kutupa Yesuma꞉ iki pa꞉ta꞉ lota꞉ pitolo alota꞉ Ola꞉pake mea epemeka꞉na꞉ta꞉ disi tieke oto pa꞉ta꞉ wilimikipe o bedi tokele pa꞉ta꞉ wilimikipe. Dia꞉me. Manda keo u halememe leekeme. 22Kutupa panka꞉ wilimieki manuta꞉ ma꞉nda꞉ma꞉ walena꞉yeke panka꞉ wilimime. A꞉mbao wilimieki manuta꞉ ma꞉nda꞉ma꞉ ka꞉la꞉pena꞉yeke a꞉mbao wilimime leekeme. 23Katake lomba꞉la꞉ halima꞉ wotu opina꞉e leekeme.
24Kutupa Yesuma꞉ iki pa꞉ta꞉ alota꞉ Mo opiteleme ekimanu hone wopu wia꞉pa꞉peke. Ikana꞉ma꞉ haleme tupa꞉ kone koto ana꞉na꞉ paa milimikie. Kutupa pa haka꞉ta꞉pao mandane ekimanu make milimikie leekeme. 25Ala꞉ta꞉ ala꞉ta꞉ wia hala꞉ halima꞉ mandane ekimanu make haka꞉ta꞉pao milieke leekeme. Ala꞉ta꞉ ala꞉ta꞉ na wia hala꞉ halima꞉ta꞉ ala꞉ta꞉ ma꞉nda꞉ na milieke. Ipika꞉ wia hala꞉eki kone mata꞉lieke leekeme.
Wae ale ipiki kone opa꞉la꞉ ekina꞉ onkoluma꞉ pi
26Kutupa Yesuma꞉ alota꞉ Koda꞉na꞉ Kilu Tombuao Hala꞉eki dupae. Hali ma꞉nda꞉ma꞉ wae alemanu kenkena꞉ tandeleekeme. 27Kutupa timba꞉ leeke pelia꞉tiki da ka꞉la꞉peeke tiatiki piekeme. Kutupa hande wae alemanu patela opa꞉liaeyekeme. Opa꞉liao pieke ekita꞉ ekipa opa꞉la꞉pe mo halita꞉ mateekeme. 28Wae ale manuta꞉ kenkema꞉ peaaseke handaa wae ale opo halememe. Katake titina꞉ amba꞉la꞉ ka꞉la꞉paata꞉ wetepena꞉ honke pankaata꞉ kutupa napeke panka tumba꞉ wilieke leekeme. 29Kutu piliepate napeke naa pia꞉ka꞉na꞉ta꞉ koto kone kepetema꞉ poka꞉mepi pilieke. Mo naa pita꞉la꞉ dina꞉ ya꞉leke handaa milieke leekeme.
Masidadi waena꞉ onkoluma꞉ pi
(Ma꞉tiu 13꞉31-32,34, Luku 13꞉18-19)
30Kutupa Yesuma꞉ alota꞉ Koda꞉na꞉ Kilu Tombuao Hala꞉ ekita꞉ alekema꞉ handena꞉ loluma꞉pe o eki onkoluma꞉ loluma꞉pe leekeme. 31Ipikita꞉ masidadi wae ale sikima꞉ handa꞉la꞉me leekeme. Mo wae alesiki ota꞉ hosiki alesiki ya꞉la꞉pate 32kenkena꞉ nokepea꞉ka꞉na꞉ta꞉ opa꞉liaota꞉ beli ponda꞉pa ota꞉ tieke halieke laa kutupa paleke paleke tiekemanu pilia꞉ka꞉na꞉ kotota꞉ ba titima꞉ katake tu̱ pa꞉ta꞉ a꞉pa dake hapeke ya꞉la꞉me leekeme.
33Kutupiki onkoluma꞉manu Yesuma꞉ iki pa꞉ta꞉ waleeke ekita꞉ opuma homaena꞉ leekeme. 34Onkoluma꞉manu pi waleekepate pi ma꞉nda꞉ na waleke ipika꞉ disaipolo haliweki pa꞉ta꞉ homeke pi tekemanu la haleekeme.
Yesuna꞉ pima꞉ po tilipu make ikali homanu make tunkulaeyekeeki
(Ma꞉tiu 8꞉23-27, Luku 8꞉22-25)
35Koto onkoluma꞉ leeke natena꞉ welealo nane Yesuma꞉ iki pa꞉ta꞉ alota꞉ Nikita꞉ do ikali tunkula mo tea꞉ nane pomana꞉e leekeme. 36Kutupa wanda꞉hali mina꞉pa꞉lao Yesuta꞉ mo kawaso pa꞉ta꞉ pitieke tupa꞉ pita꞉ pelia haena꞉ haliwekima꞉ mea pemekeme. Kawaso mandane ekimanu make tonka꞉na꞉ apa꞉tao pemekeme. 37Po tilipu tieke epeekeme. Kutupa ikali ho a꞉meiya mo kawaso litolo hata꞉ ikali pambo tumbiekeme. Koto ekina꞉ mo kawasona꞉ ikalima꞉ amba꞉ tumbuluekema꞉ dodo piekeme. 38Kutu piekepate Yesuta꞉ kawaso mendeke nane pita ka꞉nda꞉ lia peliekeme. Haliwekima꞉ Yesu mea tiao ipiki pa꞉ta꞉ alota꞉ Disao. Niki homoluma꞉ma꞉ hone na witelepe lemekeme.
39Yesuma꞉ tiao mo po tilipu pa꞉ta꞉ make mo ikali pa꞉ta꞉ make pi alo hata꞉ alota꞉ Pae. Tunkulie leekeme. Po tilipu tunkula ikali la꞉ma꞉ la꞉ma꞉ na piki pa wiekeme. 40Kutupa ipikana꞉ma꞉ iki pa꞉ta꞉ alota꞉ Alekena꞉ paala꞉ma꞉ homelemepe. Ikita꞉ Koda꞉ pa꞉ta꞉ hone na tulaasemepe leekeme.
41Mo disaipolo haliwekima꞉ penkilipa꞉tia pomua ika꞉ ika꞉ kone pi lemekeeki dupa. Do halita꞉ epi ya꞉ka꞉ta꞉pe. Po tilipuma꞉ make ikalima꞉ make ipika꞉ pi opua tunkulia꞉me lemekeme.
اکنون انتخاب شده:
Maka 4: SEMB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
