Maka 11
11
Yesuta꞉ Kini Hali tupa꞉ Diutuseleme lepolona꞉ epeekeeki
(Ma꞉tiu 21꞉1-11, Luku 19꞉28-40, Dioni 12꞉12-19)
1Diutuseleme da teke pa꞉ta꞉ pulu hata꞉ Betepeisi Bedani da yaapo pa꞉ta꞉ opolo pemekeme. Mo da yaapota꞉ mo Olipi ti polu haemeke peiyenena꞉ hayekeme. Kutupa Yesuma꞉ ipika꞉ disaipolo hali yaapo tapaaso hata꞉ alota꞉ 2Mo koto nane hala꞉ da pa꞉ta꞉ puaata꞉ da opolo pulu hata꞉ kuta kone donki ma꞉na꞉na꞉ panake donkisiki homeke wakapena꞉ endia haena꞉ handilipipikie leekeme. Koto donki ma꞉na꞉siki ma꞉nda꞉ma꞉ ipika꞉ hokina꞉ amba꞉ na pita handeke donkie laa Wakapa꞉ hola꞉ mea a꞉pa꞉pa꞉peke leekeme. 3Ma꞉nda꞉ma꞉ ipiliki pa꞉ta꞉ Ekipeke pitelepepe lea꞉ka꞉na꞉ta꞉ dupa lapa꞉peke. Tekehalima꞉ muluekema꞉ hone pa꞉la꞉me lapa꞉peke. Wetepena꞉ kuta kone ma꞉nda꞉ma꞉ paa mea epena꞉ lelieke lapa꞉peke leekeme.
4Koto leeke puaata꞉ mo donki ma꞉na꞉ pota꞉ kake pa꞉ta꞉ endia lepolo pota꞉na꞉ haena꞉ handa꞉ wiaata꞉ kelepa꞉ mipikime. 5Ka꞉la꞉paaso haena꞉ta꞉ koto alena꞉ haemeke haliwekima꞉ hololo haena꞉ ipiliki pa꞉ta꞉ alota꞉ Mo donkisiki kelepelepe ekita꞉ eki puluekema꞉ kelepelepepe lemekeme. 6Kota꞉ Yesuma꞉ leeke ekita꞉ mo haliweki pa꞉ta꞉ lepekeme. Leeke ekita꞉ opuaata꞉ mo haliwekima꞉ pa꞉na꞉e lemekeme. 7Yesu pa꞉ta꞉ mea pepeketa꞉ ika꞉ daumanu mea mo donki sikina꞉ hokina꞉ yamaemeketa꞉ Yesu manda a꞉meiya pitiekeme. 8Wanda꞉hali wopuma꞉ ika꞉ daumanu lepolona꞉ yamoma꞉ yamoma꞉ pimikime. Kutupa mandane wanda꞉halima꞉ katake mendia wiki ti palekemanu tondopa꞉ mea yamoma꞉ yamoma꞉ pimikime. 9Titina꞉ pemeke wanda꞉halima꞉ make wetepena꞉ pemeke wanda꞉halima꞉ tonka꞉na꞉ wi la alu alu pitolo alota꞉
Hosa꞉na꞉e. Ta꞉na꞉e. Tekehalina꞉ bikina꞉ ipula꞉ halita꞉ Koda꞉ma꞉ ipika꞉ pi laena꞉e laa 10Nika꞉ apa꞉ Deipidi ipika꞉ kilu tombuao hala꞉eki ipula꞉ ekina꞉ ipika꞉ pi lamana꞉e. Hepeni nane Hosa꞉na꞉ pi lamana꞉e. Koda꞉na꞉ biki a꞉meiyaomana꞉e lemekeme.
11Yesuma꞉ Diutuseleme da opolo pua tembolo da tukiki pa꞉ta꞉ honda꞉ pambaata꞉ ala꞉ta꞉ ala꞉ta꞉ paeyao handoma꞉ handoma꞉ peaata꞉ nate amba꞉ paeyeke handaata꞉ timba꞉ lapeke yeeke mo disaipolo haliweki ame̱le̱ Bedani da nane pemekeme.
Yesuma꞉ mo nose ti pa꞉ta꞉ kiliki na a꞉ilipikie leekeeki
(Ma꞉tiu 21꞉18-19)
12Kutupa da ka꞉la꞉peeke haena꞉ta꞉ mo Bedani da mina꞉pa꞉lao paa la꞉ka꞉la ipulu hata꞉ Yesuma꞉ tea꞉ma꞉ homeekeme. 13Pota꞉na꞉ puaata꞉ nose ti homeke katake mendia wieke ekina꞉ mopate leke hata꞉ handaata꞉ kiliki a꞉ela꞉patema꞉ handolo peekepate teke pa꞉ta꞉ opolo puaata꞉ pa katakemanu homeke handeekeme. Mo nose kiliki a꞉eya꞉peke nate a̱i̱ dia꞉yeke piekeme. 14Kutupa Yesuma꞉ mo nose pa꞉ta꞉ alota꞉ Naka꞉ kilikimanu ma꞉nda꞉ma꞉ na talo nelieke leekeme. Ipika꞉ disaipolo haliwekima꞉ koto leeke pita꞉ opimikime.
Yesuma꞉ tembolo da pa꞉ta꞉ peekeeki
(Ma꞉tiu 21꞉12-17, Luku 19꞉45-48, Dioni 2꞉13-22)
15Diutuseleme da pa꞉ta꞉ opolo puaata꞉ Yesuma꞉ mo tembolo da honda꞉ pambaata꞉ koto da pa꞉ta꞉ sipisipi ma꞉na꞉manu hambo haemeke haliweki hama꞉ nane tolu liaata꞉ mo mani topo pu haemeke haliwekina꞉ teipolomanu make melipu bamanu hambo haemeke haliwekina꞉ pitieke alemanu hoila꞉mina꞉ lopaeyekeme. 16Kutupa ipikana꞉ma꞉ ma꞉nda꞉ma꞉ ala꞉ta꞉ ala꞉ta꞉ mo tembolo da puku toka꞉la꞉ mea tia yopua꞉tiki peaama꞉na꞉ sa꞉sa꞉ pitolo leekeme. 17Kutupieke ipikana꞉ma꞉ pi wala iki pa꞉ta꞉ alota꞉ Mo Baibolona꞉ wape pea ula꞉ pita꞉ Koda꞉ma꞉ alota꞉ Yaka data꞉ kenke paeyao wanda꞉hali paeyaoma꞉ yeni pu halo pa꞉la꞉ da hala꞉me laa wape pa ula꞉pate ikana꞉ma꞉ta꞉ do data꞉ pake no pamboloendi piteleme da haena꞉ alememe leekeme.
18Wanda꞉hali wopuma꞉ Yesuna꞉ waleeke pimanu opuaata꞉ penkili pimiki handaata꞉ mo yeni peao haemeke you haliwekima꞉ make mo wape pea wala꞉tiki pu haemeke haliwekima꞉ make Yesu pa꞉ta꞉ paala꞉ma꞉ homolo hata꞉ ipiki lu alu palo pimiki pota꞉ weimikime. 19Kutupa nate pambolo haena꞉ Yesu ipika꞉ disaipolo haliweki ame̱le̱ teke da mina꞉pa꞉lao pemekeme.
Nose ti homeeke ekina꞉ Yesuma꞉ leeke ekina꞉ hone tulaemekeeki
(Ma꞉tiu 21꞉20-22)
20Da ka꞉la꞉peketa꞉ pota꞉na꞉ yopulu hata꞉ hande nose ti handemekepate katake teke tonka꞉na꞉ paeyao hapua hayekeeki handemekeme. 21Pidama꞉ hone wia ipiki pa꞉ta꞉ alota꞉ Tekehalio. Handa꞉e. Nakana꞉ma꞉ pima꞉ kone hoeyaeye nose ti koto hapua hala꞉ handa꞉e leeketa꞉ 22Yesuma꞉ iki pa꞉ta꞉ alota꞉ Koda꞉ pa꞉ta꞉ hone tulao hapa꞉peke. 23Iki pa꞉ta꞉ ota꞉ pi alome. Hali epima꞉ oli pote pa꞉ta꞉ alota꞉ Naka꞉ kone tiao mo dawala pa꞉ta꞉ pua lopa꞉peke lea꞉ka꞉na꞉ta꞉ ipika꞉ puki pa꞉ta꞉ hone ti na yokeke pa ipika꞉ dupilieke leeke pi manuta꞉ ota꞉ pilieke laa homeke hone witolo hata꞉ lea꞉ka꞉na꞉ta꞉ mo hali pa꞉ta꞉ ota꞉ pina꞉ lelieke leekeme. 24Koto ekina꞉ iki pa꞉ta꞉ alome. Ala꞉ta꞉ ma꞉nda꞉na꞉ yeni pitolo hata꞉ honke lemeka꞉na꞉ta꞉ kota꞉ Amba꞉ mea wia halome hone wia hata꞉ milimikie leekeme. 25Kutupa make Koda꞉ pa꞉ta꞉ tiao hata꞉ yeni pimika꞉na꞉ta꞉ ma꞉nda꞉ma꞉ iki pa꞉ta꞉ hoke hau pa꞉la꞉eki pa꞉ta꞉ hone pa upaleke hata꞉ pimika꞉na꞉ta꞉ kota꞉ ipika꞉ hoke hau tombuao pa paeyaapa꞉peke leekeme. Ika꞉ hepeni nane hala꞉ Apa꞉ma꞉ ika꞉ hoke hau paeyaena꞉yeke ma꞉nda꞉ma꞉ iki pa꞉ta꞉ hoke hau pa꞉la꞉eki paeyaapa꞉peke leekeme. 26[Ikana꞉ma꞉ ma꞉nda꞉ma꞉ pa꞉la꞉eki na paeyaemeka꞉na꞉ta꞉ ika꞉ hepeni nane hala꞉ Apa꞉ma꞉ ika꞉eki make na paeyaalieke leekeme.]
Epima꞉ neke biki halo pia꞉pe lemekeeki
(Ma꞉tiu 21꞉23-27, Luku 20꞉1-8)
27Yesu ipika꞉ disaipolo haliweki ame̱le̱ Diutuseleme da nane paa puaata꞉ tembolo da tukiki pa꞉ta꞉ pulu haena꞉ mo yeni peao haemeke you haliwekima꞉ make mo wape pea wala꞉tiki pu haemeke haliwekima꞉ make tondiki haliwekima꞉ make paeyaoma꞉ ipiki pa꞉ta꞉ pua alota꞉ 28Hande pu haleeki manuta꞉ ekipa pipe o epima꞉ neke wele peaeya꞉pe lemekeme.
29Yesuma꞉ ika꞉ pi hombo peaaso alota꞉ I̱ma꞉ iki pa꞉ta꞉ lota꞉ pitolo pi ma꞉nda꞉ opua la kimika꞉na꞉ta꞉ kota꞉ I̱ma꞉ pu halo hau manuta꞉ I̱ wele peao hala꞉ halina꞉ biki la kulueke. 30Dionima꞉ bapitaisi peao haya꞉ hauta꞉ hepeni nane ekipe o kenke wanda꞉halina꞉ ekipe leekeme.
31Koto pi opuaata꞉ mo haliwekima꞉ ika꞉ ika꞉ kone pi lemekeme dupa. Hepeni nane ekie loma꞉ka꞉na꞉ta꞉ niki pa꞉ta꞉ Kota꞉ Dionima꞉ lo haya꞉ pi manuta꞉ ekipeke na miniki haemepe lelieke laa 32Kenke wanda꞉halina꞉ ekie loluma꞉pe lemekepate wanda꞉hali paeyaoma꞉ Dionita꞉ Koda꞉ ipika꞉ pi la꞉ mea halo haya꞉ halie lo halemeke handaa mo wanda꞉hali pa꞉ta꞉ paala꞉ma꞉ homemekeme. 33Koto ekina꞉ mo haliwekima꞉ Yesu pa꞉ta꞉ alota꞉ Niki na handoloma꞉me lemekeme. Kutupa Yesuma꞉ iki pa꞉ta꞉ alota꞉ I̱ma꞉ make yaka pu halo haumanu I̱ wele peao hala꞉ halina꞉ bikita꞉ iki na la kulueke leekeme.
اکنون انتخاب شده:
Maka 11: SEMB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
