Maka 10
10
Tooli ka꞉ta꞉alu pita꞉la꞉ ekina꞉ mana꞉ pi
(Ma꞉tiu 19꞉1-12, Luku 16꞉18)
1Koto alena꞉ mina꞉pa꞉lao Yesu Diudia nane pua mo Diodani ikali yuma mone tea꞉ nane make peekeme. Wanda꞉hali wopu ipiki pa꞉ta꞉ pa a꞉pa mombelemekeme. Kutupa amba꞉ walo hayeke tupa꞉ paa waleekeme.
2Mandane Pa꞉tisi haliwekima꞉ Yesuna꞉ anke yololo hata꞉ a꞉pa lota꞉ pimikime dupa. Hali ma꞉nda꞉ma꞉ ipika꞉ wanda꞉ yokea꞉ka꞉na꞉ta꞉ o kiaeya꞉ka꞉na꞉ta꞉ ana꞉ pa꞉la꞉pe o ana꞉ na pa꞉la꞉pe lemekeme. 3Yesuma꞉ ika꞉ pi hombo peaaso alota꞉ Mosesima꞉ eki pi ula꞉eki leekepe leekeme. 4Ikana꞉ma꞉ alota꞉ Mosesima꞉ta꞉ ipika꞉ wanda꞉ yoka꞉la꞉eki o kiaasa꞉eki tameiya꞉na꞉ wape pina꞉ laa kutupa yokena꞉ o kiaena꞉ lo hayekeme lemekeme.
5Yesuma꞉ iki pa꞉ta꞉ alota꞉ Ika꞉ puki taka꞉laaso hamina꞉ koto hau pea꞉pa꞉peke laa wape piekepate 6ala꞉ta꞉ ala꞉ta꞉ wepia haena꞉ la꞉la꞉ dina꞉ta꞉ Koda꞉ma꞉ hali make haena꞉ wanda꞉ make haena꞉ leekeme laa 7Koto ekita꞉ hali ma꞉nda꞉ma꞉ ipika꞉ ateke inkiki yaapo mina꞉pa꞉lao ipika꞉ ma꞉la꞉ wanda꞉ yaapo pa꞉ta꞉ apa꞉tao ta꞉ma꞉ni pea halipipikie. 8Kutupa ipilikita꞉ homeke kone halipipikie leekeme. Koto ekina꞉ ipilikita꞉ yaapo dia꞉me. Homeke kone halepeme leekeme. 9Koto ekina꞉ Koda꞉ma꞉ apa꞉taasa꞉ ekita꞉ halima꞉ ka꞉ta꞉alu na peaena꞉e leekeme.
10Da pa꞉ta꞉ honda꞉ pambaa hata꞉ Yesuma꞉ hande leeke pi pa꞉ta꞉ ipika꞉ disaipolo haliwekima꞉ ipiki paa lota꞉ pimikime. 11Yesuma꞉ iki pa꞉ta꞉ alota꞉ Hali epima꞉ ipika꞉ wanda꞉ yokaata꞉ o kiaota꞉ wanda꞉ ma꞉nda꞉ mia꞉ka꞉na꞉ta꞉ mo mupeke wanda꞉ pa꞉ta꞉ pi ula꞉eki yamba꞉la hoke hau pita꞉la꞉me leekeme. 12Kutupa wanda꞉ma꞉ ipika꞉ haliki ota꞉ mina꞉pa꞉lao hali ma꞉nda꞉ pea꞉ka꞉na꞉ta꞉ kota꞉ koto wanda꞉ma꞉ pi ula꞉eki yamba꞉la hoke hau pita꞉la꞉me leekeme.
Yesuma꞉ weki wandiki sunu wamo puma꞉ puma꞉ piekeeki
(Ma꞉tiu 19꞉13-15, Luku 18꞉15-17)
13-14Wanda꞉halima꞉ weki wandiki sunu Yesu pa꞉ta꞉ hatuku pemekeme. Ipikana꞉ma꞉ wataena꞉yeke pimikime. Mo disaipolo haliwekima꞉ wanda꞉hali sa꞉sa꞉ pimikipate Yesuma꞉ handaata꞉ mineke pankolo hata꞉ iki pa꞉ta꞉ alota꞉ Koto weki wandiki sunu I̱ pa꞉ta꞉ epena꞉ lape. Sa꞉sa꞉ na pia꞉pa꞉peke leekeme. Dupiki weki wandiki sunuma꞉ Koda꞉na꞉ Kilu Tombuao Hala꞉ ekita꞉ handilimikie leekeme. 15Iki pa꞉ta꞉ ota꞉ pi alome. Wanda꞉hali epima꞉ mo wekiwandiki sunuma꞉ Koda꞉na꞉ Kilu Tombuao Hala꞉eki minolo piteleme tupa꞉ na mimika꞉na꞉ta꞉ kota꞉ ikita꞉ koto pa꞉ta꞉ ana꞉na꞉ na hondo pambilimikie leekeme. 16Kutupa Yesuma꞉ mo wekiwandiki sunu ipika꞉ kiki yaapoma꞉ miniki hata꞉ hopulu mea wamo puma꞉ puma꞉ piekeme.
Hamoko halima꞉ Yesu pa꞉ta꞉ deto hala꞉ ekina꞉ lota꞉ piekeeki
(Ma꞉tiu 19꞉16-30, Luku 18꞉18-30)
17Yesuma꞉ pota꞉na꞉ poluekema꞉ haena꞉ hali homekema꞉ a̱i̱ya puaata꞉ Yesuna꞉ puki pa꞉ta꞉ tumiki yotuao pita꞉ lota꞉ piekeme dupa. Epeke Wala꞉la꞉ Halio. Deto hala꞉eki muluekema꞉ eki ponope leekeme. 18Kutupa Yesuma꞉ ipika꞉ pi hombo peaaso alota꞉ Ekipeke I̱ pa꞉ta꞉ Epeke halio alepe laata꞉ Ma꞉nda꞉ hali a꞉nda꞉ na a꞉pa꞉la꞉pate Koda꞉ homeketa꞉ a꞉pa꞉la꞉me leekeme. 19Neketa꞉ mo pi ula꞉ ekimanu opueleme. Hali ma꞉nda꞉ ota꞉ homena꞉ na lia꞉peke. Hali ma꞉nda꞉na꞉ wanda꞉na꞉ hakopu na tunkula꞉peke. Pake na napeke. Yayapiki pi na lapeke. Na makeaapeke. Naka꞉ ama꞉ apa꞉ yaapona꞉ pi opua꞉peke leekeme. 20Kutupa ipikana꞉ma꞉ Yesu pa꞉ta꞉ alota꞉ Wala꞉la꞉ Halio. Koto pimanu paeyao weki hata꞉ kone opu haowa꞉me leekeme.
21Yesuma꞉ ipiki pa꞉ta꞉ handolo hata꞉ a꞉ta꞉ma꞉ homolo hata꞉ alota꞉ Nakana꞉ma꞉ta꞉ homeke hau homeke na pa꞉la꞉me. Neke pua naka꞉ wia hale alemanu paeyao ma꞉nda꞉ma꞉ hambaata꞉ mo natehali wanda꞉hali pa꞉ta꞉ hale hale pika꞉na꞉ta꞉ neketa꞉ oli hepeni nane yenki tieke wialieke leekeme. Kutupa a꞉pa ya hoki nane telia꞉peke leekeme. 22Yesuma꞉ koto leeke handaa mo halima꞉ wenoko homa꞉niao ka꞉nda꞉ma꞉ homolo hata꞉ peekeme. Hamoko hali hayeke handaa piekeme.
23Yesuma꞉ la꞉ka꞉la꞉ moneao ipika꞉ disaipolo haliweki handaata꞉ iki pa꞉ta꞉ alota꞉ Hamoko wanda꞉halima꞉ Koda꞉na꞉ Kilu Tombuao Hala꞉eki pa꞉ta꞉ haena꞉ weleke we wotu pilimikie leekeme. 24Ipika꞉ disaipolo haliwekima꞉ koto pi opua penkilipa꞉tia pomimikipate Yesuma꞉ iki pa꞉ta꞉ paa alota꞉ Ya weki titio. Hamoko wanda꞉halima꞉ Koda꞉na꞉ Kilu Tombuao Hala꞉eki pa꞉ta꞉ pua꞉peke ekita꞉ ka꞉nda꞉ pa꞉la꞉me. 25Kemolo ma꞉na꞉ta꞉ no̱i̱ ka꞉ka꞉na꞉ pa꞉ta꞉ pea꞉ka꞉na꞉ta꞉ yapa꞉ pa꞉la꞉pate hamoko halima꞉ Koda꞉na꞉ Kilu Tombuao Hala꞉eki pa꞉ta꞉ poluekema꞉ ka꞉nda꞉ pilieke leekeme.
26Kutupa ikana꞉ma꞉ penkilipa꞉tia wotu pomua ipiki pa꞉ta꞉ alota꞉ Kota꞉ epima꞉ da꞉ta꞉la꞉eki mea꞉peke ya꞉la꞉pe lemekeme. 27Yesuma꞉ iki handa alota꞉ Wanda꞉halima꞉ ika꞉ kone pea꞉peke na ya꞉la꞉pate Koda꞉ma꞉ homeke ana꞉ pa꞉la꞉me. Koda꞉ma꞉ hau paeyao pea꞉peke ya꞉la꞉me.
28Pidama꞉ Yesu pa꞉ta꞉ pi loluekema꞉ alota꞉ Opie. Nikana꞉ma꞉ ala꞉ta꞉ ala꞉ta꞉ paeyao mina꞉pa꞉lao naka꞉ hoki nane telioloma꞉me leekeme. 29-30Koto leeke Yesuma꞉ alota꞉ Iki pa꞉ta꞉ ota꞉ pi alome. Hali epima꞉ ipika꞉ da ipika꞉ hameke titi ipika꞉ ana꞉ titi ipika꞉ apa꞉ ama꞉ make ipika꞉ wekiwandiki sunu make ipika꞉ kenkemanu make mina꞉pa꞉laeya꞉ka꞉na꞉ta꞉ I̱ pa꞉ta꞉ make koto Pi Seliapo pa꞉ta꞉ make hone witolo hata꞉ koto ekimanu mina꞉pa꞉laeya꞉ka꞉na꞉ta꞉ kota꞉ do kenkena꞉ hata꞉ kone damanu 100 tupa꞉ hameke titi make ana꞉ titi make apa꞉ ama꞉ titi make wekiwandiki sunu make kenkemanu make 100 tupa꞉ miliepate tanda mina꞉la꞉ ekimanu make milieke leekeme. Kutupa mo hao epolo pa꞉la꞉ dina꞉ make deto hala꞉eki milieke leekeme. 31Kutu pa꞉la꞉pate ame do titina꞉ halo pa꞉la꞉ wanda꞉hali woputa꞉ wetepena꞉ta꞉ wetepe nane halimikie. Kutupa wetepena꞉ ipula꞉ wanda꞉hali woputa꞉ titina꞉ halo pelimikie leekeme.
Homa paa tiaapeke ekina꞉ tana꞉ tepo la haleekeeki
(Ma꞉tiu 20꞉17-19, Luku 18꞉31-34)
32Yesu ipika꞉ disaipolo haliweki ame̱le̱ Diutuseleme da nane pula꞉ pota꞉na꞉ opa꞉liaaso haena꞉ Yesu amba꞉ titina꞉ peekema꞉ ipika꞉ disaipolo haliwekima꞉ penkilipa꞉tia pomimikime. Kutupa wetepena꞉ ipulu hata꞉ wanda꞉halima꞉ paala꞉ma꞉ homa꞉ paleke teli mea epemekeme. Yesuma꞉ hande 12 haliweki hosiki mopate leke pa hatuku pua ipiki minulu pimiki haliwekima꞉ ipiki pa꞉ta꞉ pulu pa꞉la꞉ ekimanu koto haliweki pa꞉ta꞉ kini pu mea la hale hale pitolo alota꞉ 33Opua꞉pe. Nikita꞉ ameta꞉ Diutuseleme nane opa꞉liaasoma꞉me. Mo yeni peao haleme you haliwekima꞉ make mo wape pea wala꞉tiki pu haleme haliwekima꞉ make Wanda꞉halina꞉ Eiyeke mea dupa lelimikie. Neketa꞉ homoelena꞉ lumeke lelimikie laata꞉ ikana꞉ma꞉ta꞉ ipikita꞉ mo Diendaili haliweki pa꞉ta꞉ mea halimikie laata꞉ 34kutupa mo haliwekima꞉ ipiki kitao ipika꞉ lokena꞉ dopi taa yumbua bao limikie leekeme. Kutupa nate tepo wia paeya꞉ka꞉na꞉ta꞉ paa tiaalieke leekeme.
Dia꞉mesi Dioni yaapoma꞉ tieke haluekema꞉ lepekeeki
(Ma꞉tiu 20꞉20-28)
35Sepedina꞉ eiyeke Dia꞉mesi Dioni yaapoma꞉ Yesu teke pa꞉ta꞉ pua alota꞉ Wala꞉la꞉ Halio. Dika꞉ hone pa꞉la꞉ ale ma꞉nda꞉ honke lolupekema꞉ kuelena꞉e lepekeme. 36Kutupa Yesuma꞉ ipiliki pa꞉ta꞉ alota꞉ Eki peaanope leekeme.
37Ipilikana꞉ma꞉ alota꞉ Naka꞉ biki tieke mea pitika꞉na꞉ dikita꞉ homeke naka꞉ popeke nane pa꞉ta꞉liki nanema꞉ mea pitao ma꞉nda꞉ naka꞉ hoeya꞉ nane pa꞉ta꞉liki nanema꞉ mea pitaalena꞉e lepekeme.
38Koto lepekepate Yesuma꞉ ipiliki pa꞉ta꞉ alota꞉ Ipilika꞉ honke alepe ekita꞉ hone wotu na wiki hata꞉ alepeme leekeme. I̱ma꞉ kapona꞉ nolue ekita꞉ ipilikana꞉ma꞉ make napa꞉peke ya꞉la꞉pe. I̱ bapitaisi peaalia꞉ tupa꞉ ipiliki make bapitaisi peaapeke ya꞉la꞉pe leekeme. 39Kutupa ipilikana꞉ma꞉ ipika꞉ pi hombo peaaso alota꞉ Diki ana꞉ pa꞉la꞉me lepekeme.
Yesuma꞉ ipiliki pa꞉ta꞉ alota꞉ I̱ma꞉ kapona꞉ nolue ekita꞉ ota꞉ nelipipikie. I̱ bapitaisi peaalua꞉ tupa꞉ ipiliki ota꞉ bapitaisi peaalieke leekeme. 40Kutu piliepate ya popeke nane kiki hoeya꞉ nane kiki yaapo pa꞉ta꞉ epima꞉ pitilipipikipe laata꞉ I̱ma꞉ lapeke na ya꞉la꞉me. Koda꞉ma꞉ ipika꞉ mulu pa꞉la꞉ hali pa꞉ta꞉ mo pitulu pa꞉la꞉ ale wamo peao ula꞉me. Koto ekina꞉ Koda꞉ma꞉ ipika꞉ mulu pa꞉la꞉ hali pa꞉ta꞉ halieke.
41Mo hande kiki yaapo haliwekima꞉ Dia꞉mesi Dioni yaapoma꞉ Yesu pa꞉ta꞉ honke lepekeeki opuaata꞉ ipiliki pa꞉ta꞉ mineke pankemekeme. 42Kutupa Yesuma꞉ mo haliweki ipiki pa꞉ta꞉ epena꞉ laa iki pa꞉ta꞉ alota꞉ Ikana꞉ma꞉ handelememe. Diendaili wanda꞉halina꞉ kapomani tumiki haliwekima꞉ wanda꞉hali tombuao halememe. Kutupa ika꞉ hali tieke tieke manuma꞉ wanda꞉hali Dupa꞉pe laa pi wotu hapolo halememe leekeme. 43Koto tupa꞉ lo halemepate ikana꞉ma꞉ta꞉ koto hau na pea꞉pa꞉peke. Iki pa꞉ta꞉ hali epima꞉ I̱ tieke halueke hone wia꞉ka꞉na꞉ta꞉ kota꞉ ipikana꞉ma꞉ ika꞉ hau peawalieke. 44Kutupa iki ame̱le̱ hali epima꞉ I̱ titina꞉ hali haluekee hone wia꞉ka꞉na꞉ta꞉ kota꞉ ipikana꞉ma꞉ iki paeyaona꞉ hau peawalieke. 45Pa ekipeke mo Wanda꞉halina꞉ Eiyeke kone mo wanda꞉halima꞉ ipika꞉ e pokaena꞉ loluekema꞉ yeke na epeeke yekepate ipikana꞉ma꞉ pa ika꞉ e pokaaluekema꞉ make ipika꞉ da꞉ta꞉la꞉ ekima꞉ta꞉ iki wopuna꞉ hoke hauna꞉ yenki haluekema꞉ epea꞉me leekeme.
Yesuma꞉ leke holupiki halina꞉ leke kilaeyekeeki
(Ma꞉tiu 20꞉29-34, Luku 18꞉35-43)
46Ikana꞉ma꞉ Dietiko da pa꞉ta꞉ opolo pemekeme. Kutupa Yesuma꞉ ipika꞉ disaipolo haliweki make wanda꞉hali wopu make Dietiko da nane mina꞉pa꞉laaso haena꞉ Timeiya꞉sina꞉ eiyeketa꞉ Batimeiya꞉si leke holupiki hali hata꞉ mani honke loluekema꞉ yeke pota꞉ nepokona꞉ pitiekeme. 47Wanda꞉halima꞉ Na꞉sa꞉tete hali Yesuta꞉ yopula꞉me lemeke pi opuaata꞉ ipikana꞉ma꞉ wi alo hata꞉ alota꞉ Oe. Yesuo. Deipidina꞉ tapake halio. Nakana꞉ma꞉ I̱ pa꞉ta꞉ a꞉ta꞉ma꞉ homa꞉e leekeme.
48Ipika꞉ leekeeki opuaata꞉ wanda꞉hali wopuma꞉ Pi na lapema laa sa꞉sa꞉ pimikipate ipikana꞉ma꞉ wi anekehapu alota꞉ Deipidina꞉ tapake halio. Nakana꞉ma꞉ I̱ pa꞉ta꞉ a꞉ta꞉ma꞉ homa꞉e leekeme. 49Kutupa Yesuma꞉ pua pota꞉ hopikina꞉ hando hata꞉ alota꞉ Epena꞉ wi lape leekeme. Wanda꞉halima꞉ mo leke holupiki hali wi laa ipiki pa꞉ta꞉ alota꞉ Puki hana꞉ noka꞉pa tiae. Neke wi ala꞉me lemekeme. 50Koto lemeke ipika꞉ make aka꞉ holo baota꞉ anekema꞉ tiaa lupao Yesu pa꞉ta꞉ peekeme. 51Yesuma꞉ ipiki pa꞉ta꞉ alota꞉ Eki peaano hone pa꞉la꞉pe leekeme. Mo leke holupiki halima꞉ ipiki pa꞉ta꞉ alota꞉ Tekehalio. Ya leke yaapo ki laae leekeme. 52Yesuma꞉ ipiki pa꞉ta꞉ alota꞉ Neke pue. Naka꞉ hone tulaasa꞉ ekima꞉ epeaasa꞉me leekeme. Kutupa koto kone ipika꞉ leke yaapo epeeketa꞉ Yesuna꞉ hoki nane teli mea peekeme.
اکنون انتخاب شده:
Maka 10: SEMB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
