Luku 12
12
Makeaaso hauna꞉ kinki pita꞉la꞉eki
(Ma꞉tiu 10꞉26-27)
1Wanda꞉hali pisetekema꞉ ika꞉ ika꞉ kone lu tumbapeke nono pea mombololo haena꞉ Yesuma꞉ ipika꞉ disaipolo haliweki pa꞉ta꞉ amba꞉la alota꞉ Ikana꞉ma꞉ mo Pa꞉tisi haliwekina꞉ palaowa pombeiyaasa꞉ ale yisiti wotu handeteke hapa꞉peke. Doeki alo ekita꞉ ika꞉ yayapiki makeaaso hauna꞉ loa꞉me. 2Panka꞉ wilimi ekimanu paeyaota꞉ wetepena꞉ta꞉ pa peneme yaalieke. Kutupa mo a꞉mbao aleme pimanu paeyaota꞉ wetepena꞉ peneme yaalieke. 3Koto ekina꞉ ikana꞉ma꞉ mo timba a꞉mbao leleme pi manuta꞉ paa natena꞉ opina꞉ lelimikie. Kutupa pota꞉ poka꞉la꞉ da panda꞉ pa꞉ta꞉ pita꞉ ma꞉nda꞉na꞉ haleke pa꞉ta꞉ tome pambele pita꞉ paeyaoma꞉ opina꞉ yeke da holu manda nina꞉ tiao hata꞉ pi anekema꞉ lelimikie.
Epi paala꞉ma꞉ homa꞉peke ya꞉la꞉pe
(Ma꞉tiu 10꞉28-31)
4Ya yankeke tonuo. I̱ma꞉ iki pa꞉ta꞉ aloma꞉ Mo ika꞉ manda loke lu homaemeka꞉na꞉ta꞉ wetepe nane hau ma꞉nda꞉ pea꞉peke na ya꞉la꞉ wanda꞉hali pa꞉ta꞉ta꞉ paala꞉ma꞉ na homa꞉pa꞉peke. 5Ikana꞉ma꞉ mo hali homeke ma꞉nda꞉ liaata꞉ ipika꞉ temokota꞉ oni ti to hala꞉ ale pa꞉ta꞉ baapeke ya꞉la꞉ wele pa꞉la꞉ Koda꞉ pa꞉ta꞉ paala꞉ma꞉ homa꞉pa꞉peke. Iki pa꞉ta꞉ ota꞉ loa꞉ma꞉ Ipiki pa꞉ta꞉ homeke paala꞉ma꞉ homa꞉pa꞉peke aleo.
6Mo hande wesoma꞉ handeke basunu yunki hata꞉ 20 toeama꞉ hambo halemeke yekea. Koto pa꞉la꞉pate Koda꞉ma꞉ta꞉ koto wesoma꞉ handeke ba sikita꞉ homeke kone hone na yonka꞉lala꞉me. 7Koto tupa꞉ kone ika꞉ you itiki paeyao make amba꞉ yata꞉pa꞉ ta꞉pao ana꞉ lao ula꞉me. Koto ekina꞉ta꞉ ikana꞉ma꞉ paala꞉ma꞉ na homo hapa꞉peke. Pa ekipeke. Ika꞉ tombota꞉ koto hosiki ba sunu wopuna꞉ yenki ota꞉ lombei pa꞉la꞉me.
Ketisona꞉ biki peneme yaasa꞉eki make hoki wala꞉la꞉eki yaapo
(Ma꞉tiu 10꞉32-33, 12꞉32, 10꞉19-20)
8Yesuma꞉ alota꞉ I̱ma꞉ iki pa꞉ta꞉ ota꞉ pi alome. Ma꞉nda꞉ epima꞉ wanda꞉halina꞉ leke popelekena꞉ peneme yaaso hata꞉ I̱ta꞉ Ketisona꞉ halie lea꞉ka꞉na꞉ta꞉ kota꞉ mo Wanda꞉halina꞉ Eiyekema꞉ make mo Koda꞉na꞉ enisolo manuna꞉ leke popelekena꞉ make homeke hau kone pilieke. 9Pate ma꞉nda꞉ hali epima꞉ wanda꞉halina꞉ leke pototona꞉ hata꞉ yaka biki na leke kiaeya꞉ka꞉na꞉ta꞉ kota꞉ mo Wanda꞉halina꞉ Eiyekema꞉ta꞉ Koda꞉na꞉ enisolo manuna꞉ leke pototona꞉ hata꞉ ipika꞉ biki make na leke kiaalieke.
10Ma꞉nda꞉ epima꞉ Wanda꞉halina꞉ Eiyeke pa꞉ta꞉ hoke pimanu lea꞉ka꞉na꞉ta꞉ kota꞉ koto ekita꞉ pa paeyaapeke ya꞉la꞉pate pa ma꞉nda꞉ epima꞉ Holi Sipitidi kitake hoke pimanu lea꞉ka꞉na꞉ta꞉ kota꞉ koto ekita꞉ ota꞉ na paeyawalieke.
11Ma꞉nda꞉ epima꞉ iki pi yokaalu puluekema꞉ ika꞉ pi hotu haleme da pa꞉ta꞉manu make o mo kapomani haliweki pa꞉ta꞉ make o handeteke haleme haliweki pa꞉ta꞉ hatuku pemeka꞉na꞉ta꞉ kota꞉ ikana꞉ma꞉ta꞉ eki pi lolua꞉pe o ekipa ya kone tamba꞉ miki pi lolua꞉pe laa ka꞉nda꞉ma꞉ na homo taapa꞉peke 12Pa ekipeke. Mo Holi Sipitidima꞉ta꞉ koto nate leke sikina꞉ kone ika꞉ lolo peleme pi manuta꞉ walekena꞉ walieke.
Hone na wiki hamoko halina꞉ onkoluma꞉ la꞉la꞉eki
13Wanda꞉hali momba꞉la haemeke tukiki pa꞉ta꞉ hayeke hali homekema꞉ Yesu pa꞉ta꞉ alota꞉ Disao. Yaka kamema꞉ dika꞉ apa꞉na꞉ anke teketa꞉ yakaeki telipa kina꞉ lawae leekeme. 14Yesuma꞉ ipika꞉ pi hombo peaaso alota꞉ Someo. Ipilika꞉ alemanu telipaano make ipilika꞉ pi tikitiki yawaanota꞉ I̱ta꞉ epima꞉ mea haena꞉ la꞉la꞉pe leekeme. 15Koto laa Yesuma꞉ paeyao pa꞉ta꞉ alota꞉ Handeteke hapa꞉peke. Hande pasa꞉tei hau ta꞉ta꞉ ta꞉ta꞉ pikieki a꞉paapa꞉na꞉ ika꞉ kone wopu handeteke hata꞉ leke leke lo hapa꞉peke. Wanda꞉hali paeyaoma꞉ hamoko tieke ekipa haena꞉ kone ika꞉ da꞉ta꞉la꞉ ekina꞉ teketa꞉ ika꞉ wia haleme alemanu pa꞉ta꞉ na ula꞉me leekeme.
16Koto laa Yesuma꞉ iki pa꞉ta꞉ onkoluma꞉ pi dupa leekeme. Amba꞉ a꞉nda꞉ta꞉ mo hamoko hali ma꞉nda꞉na꞉ e pa꞉ta꞉ ne napekemanu wotu wiekeme. 17Kutupa mo halima꞉ ipika꞉ honema꞉ kone alota꞉ Mo hande ne napekemanu poka꞉ mepi pea wia꞉peke alena꞉ ana꞉ na pa꞉la꞉ma꞉ eki puluepe laa hone wiekeme. 18Kutupa ipika꞉ honema꞉ kone alota꞉ Dupulueke. Yaka ne napekemanu u hala꞉ damanu londa꞉la kutupa da tieke tiekemanu a꞉eyaata꞉ mo ne napekemanu make yaka mandane alemanu paeyao make koto da pa꞉ta꞉manu mu ulueke laata꞉ 19kota꞉ ya kone dupa lolueke. Naka꞉ta꞉ yolee. Naka꞉ wia hale ale manuta꞉ bapi wotu kone ana꞉na꞉ wilieke laa Ameta꞉ pa pitu hata꞉ ne ikali nalo hata꞉ ta꞉na꞉ma꞉ homo hapeke lolueke leekepate 20Koda꞉ma꞉ ipiki pa꞉ta꞉ alota꞉ Neketa꞉ hone na wiki halio. Ame do timba kone naka꞉ da꞉ta꞉la꞉eki pao yokulueke. Kutu pua꞉ka꞉na꞉ta꞉ kota꞉ nakana꞉ma꞉ naka꞉eki laa wia hale ale manuta꞉ epima꞉ milia꞉pe laa leekeme. 21Kutupa Yesuma꞉ pi paeyaaso alota꞉ Hali epima꞉ Dota꞉ yakaeki homekee laa alemanu wopu mu momba꞉la꞉tiki pita꞉la꞉ dina꞉ta꞉ Koda꞉na꞉ leke popelekena꞉ta꞉ pa natehali hala꞉me. Kota꞉ dupiki some a꞉nda꞉ta꞉ mo hande titina꞉ loa꞉ haumanu pa꞉ta꞉ opolo ipilieke leekeme.
Koda꞉ pa꞉ta꞉ hone ti lao haasa꞉eki
(Ma꞉tiu 6꞉25-34)
22Koto hoki naneta꞉ Yesuma꞉ ipika꞉ disaipolo haliweki pa꞉ta꞉ alota꞉ I̱ma꞉ do alo ekita꞉ ikana꞉ma꞉ iki pa hapeke ekina꞉ nemanu make lokena꞉ yama꞉peke alemanu koto alemanu pa꞉ta꞉ta꞉ ka꞉nda꞉ma꞉ na homo hapa꞉peke. 23Pa ekipeke. Da꞉ta꞉la꞉ ekima꞉ta꞉ ne ota꞉ lombei pa꞉la꞉ make mo lokema꞉ta꞉ dau make ota꞉ lombei pu pa꞉la꞉me. 24Ba manuna꞉ hau handa꞉pa꞉peke. Ikana꞉ma꞉ta꞉ e wae alemanu na nokopata꞉ na mondu no halememe. Ika꞉ sidowa o ne amu pu u haleme da ma꞉nda꞉ na hala꞉me. Koda꞉ma꞉ taa halo hala꞉ handa꞉e. Koto ekina꞉ta꞉ ikana꞉ma꞉ mo ba manuta꞉ taa lu ankulalemetaa. 25Iki ma꞉nda꞉ epima꞉ ipika꞉ hone wopu wita꞉la꞉ ekima꞉ ipika꞉ do kenkena꞉ halo pa꞉la꞉ nate leke manuta꞉ mu moneao ulu pua꞉peke ya꞉la꞉pe. 26Kota꞉ koto hosiki ale siki kone na pea꞉peke ya꞉ka꞉na꞉ta꞉ pa ekipeke mo mandane ale pa꞉ta꞉ manuta꞉ ka꞉nda꞉ma꞉ homo halemepe.
27Mo hapeke pa꞉ta꞉manu pa opa꞉la꞉ moma sununa꞉ opa꞉la꞉ ekita꞉ handa꞉pa꞉peke. Ikana꞉ma꞉ta꞉ e na poko make aka꞉manu na tombulu yamo halememe. Koto pa꞉la꞉pate I̱ma꞉ iki pa꞉ta꞉ alome. Kini Solomonoma꞉ta꞉ hamoko alemanu wotu wiekepate kone do moma manuna꞉ loke hake dau epeke epeke ekimanu ma꞉nda꞉ ota꞉ na wia hayekeme. 28Mo ame homeke opa haena꞉ laa beliata꞉ tunkula hapuao tina꞉ yanka꞉peke yeke ambu manuna꞉ au kone Koda꞉ma꞉ lawao haya꞉ka꞉na꞉ta꞉ a꞉pei kota꞉ ika꞉ hone tulaaseme ekita꞉ ota꞉ hodiki ale siki ya꞉ka꞉ta꞉me. Koto alemanu pa꞉ta꞉ kone Koda꞉ma꞉ kutu pu haya꞉ka꞉na꞉ta꞉ kota꞉ ipikana꞉ma꞉ iki make dau ota꞉ ana꞉na꞉ kone yamatiki pilieke. 29Kutu piliekema꞉ ikana꞉ma꞉ta꞉ Ya nolo polo ne ikali hanema꞉ epea꞉ka꞉na꞉ mulua꞉pe laa ka꞉nda꞉ma꞉ na homo hapa꞉peke. 30Mo Koda꞉na꞉ biki na opeleme wanda꞉halima꞉ta꞉ hoto paeyao koto alemanu hone wopu u halememe. Pate ika꞉ Apa꞉ma꞉ta꞉ koto alemanu nate paeyao ikana꞉ma꞉ mu halo peleme ekita꞉ hone ula꞉me. 31Koto pa꞉la꞉ ekina꞉ta꞉ ikana꞉ma꞉ta꞉ Koda꞉na꞉ Kilu Tombuao Hala꞉eki amba꞉la weiyu haemeka꞉na꞉ta꞉ kota꞉ ipikana꞉ma꞉ mo koto ale manuta꞉ haka꞉ta꞉pao ku halieke.
Hepeni nane hamoko hapekeeki
(Ma꞉tiu 6꞉19-21)
32Yaka sipisipi ma꞉na꞉ tapake sikio. Paala꞉ma꞉ na homa꞉pa꞉peke. Pa ekipeke ika꞉ Apa꞉ma꞉ta꞉ oli hande Kilu Tombuao Hala꞉ ekita꞉ iki pa꞉ta꞉ kuluekema꞉ta꞉ ta꞉na꞉ma꞉ homo hala꞉me. 33Ika꞉ ala꞉ta꞉ ala꞉ta꞉ta꞉ tapao mani meaata꞉ mo natehali wanda꞉hali pa꞉ta꞉ hala꞉pa꞉peke. Kutupa na kukutu pulu pa꞉la꞉ mani pausa meaata꞉ ika꞉ hamoko ale manuta꞉ oli ya nane na paeya꞉niake pa wia halo pelemeeki homeke amu pu hapa꞉peke. Ekipeke koto naneta꞉ mo pake no haleme haliwekima꞉ make bisapu inkikima꞉ make na hoeyaalimikie. 34Ika꞉ hone manuta꞉ mo ika꞉ epeke epeke alemanu u haleme ale pa꞉ta꞉ mandakena꞉ u pelia halimikie.
Lekema꞉ lekema꞉ pea e poka꞉la꞉eki
35-36Ikana꞉ma꞉ta꞉ mo e pokaasa꞉ haliweki tupa꞉ hata꞉ta꞉ ika꞉ you halita꞉ hali ma꞉nda꞉ma꞉ wanda꞉ panake mea ne pamba꞉la꞉ ekina꞉ pa꞉leke handaa paa epena꞉ yu wia haleme tupa꞉ ikana꞉ma꞉ta꞉ ika꞉ aka꞉manu wotu soto la꞉tia haena꞉ yama ika꞉ ola꞉pakemanu ka꞉watia hata꞉ta꞉ anemone ipilia꞉ ekimanu lekema꞉ lekema꞉ pitolo hata꞉ hao hapa꞉peke. Koto ekina꞉ta꞉ mo you halima꞉ a꞉pa pota꞉ lia꞉ka꞉na꞉ta꞉ kota꞉ koto kone lombilimikie. 37Kutupa mo you hali paa la꞉ka꞉la a꞉pa mo ipika꞉ e pokaaseme hali wekita꞉ u̱ na polu pitiki a꞉nda꞉ pa ipiki yu wia pilimieki a꞉pa handea꞉ka꞉na꞉ta꞉ kota꞉ ikita꞉ ta꞉na꞉ma꞉ homo halimikie. I̱ma꞉ iki pa꞉ta꞉ ota꞉ pi aloma꞉ Mo haliwekima꞉ koto hau pimiki yeke handaa ika꞉ you halima꞉ta꞉ ipika꞉ manda aka꞉ hola wiaata꞉ iki pa꞉ta꞉ Ne no hala꞉ alena꞉ a꞉pa pita꞉pe laa ne pana꞉ pu kilieke. 38Kutupa make mo you halita꞉ buta꞉ hokina꞉ o hoki nane kone epea꞉ka꞉na꞉ ikana꞉ma꞉ tiki tiki yao ipiki yu wia pilimieki handea꞉ka꞉na꞉ta꞉ kota꞉ ikita꞉ ta꞉na꞉ma꞉ homo halimikie. 39Kutupa make doeki hone wotu wia꞉pa꞉peke. Mo da teke hali ma꞉nda꞉ma꞉ mo pake nala꞉ hali ma꞉nda꞉ epolo pa꞉la꞉eki amba꞉ handa꞉ wia꞉ka꞉na꞉ta꞉ kota꞉ koto someta꞉ oni ipika꞉ da yamba꞉la na yapena꞉ lelieke. 40Iki make ota꞉ tikitiki yao hapa꞉peke. Pa ekipeke. Mo hande Wanda꞉halina꞉ Eiyeketa꞉ ipilieke hone na witolo halimi di nina꞉ ipilieke laa loa꞉me leekeme.
Mo epeke e pokaasa꞉ hali pita꞉ hoke e pokaasa꞉ hali yaapo
(Ma꞉tiu 24꞉45-51)
41Pidama꞉ alota꞉ Tekehalio. Nakana꞉ma꞉ do ale onkoluma꞉ pita꞉ niki pa꞉ta꞉ homeke alepe o mo wanda꞉hali paeyao pa꞉ta꞉ alepe laa lota꞉ piekeme. 42Koto leeke mo Tekehalima꞉ Pidana꞉ pi hombo peaaso alota꞉ Kima꞉ na homeke make ota꞉ epeke hone wotu u lenkene pu wia e poko halia꞉ halita꞉ epi ya꞉ka꞉ta꞉pe. Koto halita꞉ mo da teke halima꞉ta꞉ ipika꞉ da handeteke haena꞉yeke make mo ipika꞉ mandane e pokao haleme wanda꞉hali pa꞉ta꞉ ika꞉ ne no haleme di mia꞉ka꞉na꞉ta꞉ ika꞉ ne nena꞉ teli teli peao halieke leekeme. 43Ipika꞉ you hali paa la꞉ka꞉la a꞉pa ipika꞉ e pokao hala꞉ halima꞉ mo hande emanu ota꞉ epeke tupa꞉ pitolo pitilia꞉eki a꞉pa handa꞉ ya꞉ka꞉na꞉ta꞉ kota꞉ koto e pokao hala꞉ halita꞉ ta꞉na꞉ma꞉ homo halieke. 44Ota꞉ alome. Mo you halima꞉ta꞉ koto someta꞉ ipika꞉ ala꞉ta꞉ ala꞉ta꞉ paeyao handeteke haena꞉ la꞉lieke. 45Kutu pulu pa꞉la꞉pate mo e pokaasa꞉ halima꞉ta꞉ ipika꞉ kone alota꞉ Yaka you someta꞉ di hokulu hokulu pitolo hata꞉ a̱i̱ na ipula꞉me laa mo mandane e pokaasa꞉ wanda꞉ pita꞉ hali yaapo kini pea hali lu yombitolo hata꞉ ikali ne nalo keaaso hata꞉ 46ipika꞉ you halita꞉ Do natena꞉ ipilieke hone na witolo halia꞉ natena꞉ta꞉ koto kone opolo ipilieke. A꞉paata꞉ mo e pokaasa꞉ halita꞉ homena꞉ liaata꞉ pa pi na opiki wanda꞉hali ame̱le̱ haena꞉ la꞉lieke leekeme.
47Mo e pokaasa꞉ hali ma꞉nda꞉ epima꞉ ipika꞉ you halima꞉ pea꞉peke la꞉la꞉ haumanu hone wia ipikana꞉ma꞉ ipika꞉ kone ana꞉ lao na piki ipika꞉ you halima꞉ pea꞉peke la꞉la꞉ haumanu na pia꞉ka꞉na꞉ta꞉ kota꞉ koto halita꞉ mo you halima꞉ dopitama꞉ podela꞉ mia꞉ka꞉na꞉ta꞉ tanda tieke nelieke. 48Pate e pokaasa꞉ hali ma꞉nda꞉ma꞉ta꞉ ipika꞉ you halima꞉ hone pa꞉la꞉eki hone na witolo kone tanda napekeeki pia꞉ka꞉na꞉ta꞉ kota꞉ ipikita꞉ ae̱ya̱piki dopitama꞉ hosiki podela꞉ milieke. Hali ma꞉nda꞉ta꞉ mandane alemanu handeteke haena꞉ yeke anekema꞉ halea꞉ka꞉na꞉ta꞉ kota꞉ mo hali pa꞉ta꞉ yama꞉ta꞉ anekema꞉ muluekema꞉ hone wilieke. Koto tupa꞉ kone hali ma꞉nda꞉ pa꞉ta꞉ ala꞉ta꞉ ma꞉nda꞉ wopu handeteke haena꞉ yeke halea꞉ka꞉na꞉ta꞉ kota꞉ mo hali pa꞉ta꞉ yama꞉ta꞉ ota꞉ ankulao anekema꞉ muluekema꞉ hone wilieke leekeme.
Yesuta꞉ tapake tekili pa꞉la꞉ ekina꞉ teke
(Ma꞉tiu 10꞉34-36)
49Yesuma꞉ alota꞉ I̱ epolo ekita꞉ ti ulekema꞉ do kenkena꞉ mo yaaluekema꞉ epoa꞉pate ya honema꞉ta꞉ amba꞉ kone talo hapeke alee. 50I̱ta꞉ bapitaisi pea꞉peke hau homeke mulueke hone ulupate pa a̱i̱ na pu paeyaaso ekina꞉ kota꞉ yaka weleke pukima꞉ ka꞉nda꞉ tieke minolome. 51Ika꞉ honema꞉ta꞉ I̱ma꞉ta꞉ ika꞉ a꞉nda꞉ piteleme ekimanu homu pealo epoa꞉me hone wi witelemepe. Ota꞉ dia꞉me. I̱ta꞉ wanda꞉hali tapake tekili pawaluekema꞉ epoa꞉me. 52Ame do hao kini peaata꞉ wetepena꞉ make tapakesiki yunki hata꞉ma꞉ ika꞉ kone tekilipa tepoma꞉ta꞉ yaapo pa꞉ta꞉ a꞉nda꞉ litolo hata꞉ yaapo sikima꞉ta꞉ pa tepo pa꞉ta꞉ a꞉nda꞉ lia꞉tiki pu halimikie leekeme. 53Ateke tonuma꞉ta꞉ pa eiyeke ame̱le̱ a꞉nda꞉ lualu peaata꞉ eiyeke tonuma꞉ta꞉ ateke tonu ame̱le̱ a꞉nda꞉ lualu pilimikie. Inkiki tonuma꞉ta꞉ waneke tonu ame̱le̱ a꞉nda꞉ lualu peaata꞉ waneke tonuma꞉ta꞉ inkiki tonu ame̱le̱ a꞉nda꞉ lualu pilimikie. Halikina꞉ inkiki tonuma꞉ta꞉ ika꞉ aeya꞉ tonu ame̱le̱ a꞉nda꞉ lualu peaata꞉ mo aeyeke tonuma꞉ta꞉ ika꞉ halikina꞉ inkiki tonu ame̱le̱ a꞉nda꞉ lualu pilimikie leekeme.
Wetepena꞉ epolo pa꞉la꞉ ekina꞉ handa꞉la꞉eki
(Ma꞉tiu 16꞉2-3)
54Yesuma꞉ mo wanda꞉hali pa꞉ta꞉ alota꞉ Ikana꞉ma꞉ oni nate pamba꞉la꞉ nane yama꞉ ipula꞉ koa handolota꞉ kota꞉ koto kone ikana꞉ma꞉ alota꞉ Lako ipilieke lo halemeketa꞉ kota꞉ ota꞉ ipu hala꞉me. 55Kutupa oni ka꞉wa꞉na꞉ yu nanema꞉ tilao po ipula꞉eki handolota꞉ kota꞉ ikana꞉ma꞉ koto kone alota꞉ Nate tieke talo hata꞉ titipu tieke pilieke lo halemeketa꞉ ota꞉ titipu tieke pu hala꞉me. 56Makeaasa꞉ hau pu haleme haliwekio. Ikana꞉ma꞉ta꞉ do ya yu nane pita꞉la꞉ ekimanu handolo hata꞉ dupilieke aleme ekita꞉ ota꞉ yao hala꞉pate pa ekipeke ame do natena꞉ ipula꞉ hau manuna꞉ teketa꞉ na handa꞉ witolo pimipe leekeme.
Pi yokaalu peaama꞉na꞉ a̱i̱ tiki tiki yaasa꞉eki
(Ma꞉tiu 5꞉25-26)
57Ekipeke handaa ika꞉ kone mo epeke hau pia꞉peke ekita꞉ na teli pitolo pimipe. 58Hali ma꞉nda꞉ma꞉ neketa꞉ pi yokaaluna꞉ hatuku poluekema꞉ pia꞉ka꞉na꞉ta꞉ kota꞉ a̱i̱ na peke hata꞉ kone nakana꞉ma꞉ tiki tiki yaaluekema꞉ taapa꞉peke. Nakana꞉ma꞉ koto hau na pika꞉na꞉ta꞉ kota꞉ ipikana꞉ma꞉ neketa꞉ oli pi yokaalu pu hala꞉ hali teke pa꞉ta꞉ yola꞉ mea puaata꞉ pa koto halima꞉ta꞉ mo polisi haliwekina꞉ kikina꞉ mea halaata꞉ neketa꞉ dipula da pa꞉ta꞉ mea pitalieke. 59Kutupa neke pa꞉ta꞉ Mo opisi hamba꞉e lelia꞉ tupa꞉ a̱i̱ na hambo paeyaeka꞉na꞉ta꞉ kota꞉ neketa꞉ koto pa꞉ta꞉ pa pita꞉ pelia halipikie leekeme.
اکنون انتخاب شده:
Luku 12: SEMB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
