Luku 11
11
Yesuma꞉ yeni pita꞉la꞉ hauna꞉ waleekeeki
(Ma꞉tiu 6꞉9-13, 7꞉7-11)
1Nate ma꞉nda꞉na꞉ Yesuta꞉ ala꞉ta꞉ ma꞉nda꞉ pa꞉ta꞉ pua yeni pu pitiekeme. Yeni pu paeyaeyeketa꞉ ipika꞉ disaipolo hali ma꞉nda꞉ma꞉ ipiki pa꞉ta꞉ alota꞉ Tekehalio amba꞉ hande Dionima꞉ ipika꞉ disaipolo haliweki yeni pina꞉yeke waleeke tupa꞉ niki pa꞉ta꞉ make koto tupa꞉ wala꞉e leekeme. 2Koto leeke Yesuma꞉ iki pa꞉ta꞉ walolo hata꞉ alota꞉ Ikana꞉ma꞉ yeni pimika꞉na꞉ta꞉ dupa pia꞉pa꞉peke.
Apa꞉o. Naka꞉ yako piki bikita꞉ ota꞉ manda wia haena꞉e.
Naka꞉ Kilu Tombuao Haleeki do ane opolo epena꞉e.
3Nika꞉ ame nolo poloma꞉ neta꞉ ana꞉na꞉ kia꞉peke.
4Mandane wanda꞉halima꞉ niki pa꞉ta꞉ hoke hau pimieki nikana꞉ma꞉ pa paeyaasoma꞉ ekina꞉
nika꞉ hoke hau puma꞉eki make nakana꞉ma꞉ koto tupa꞉ pa paeyawapeke.
Ka꞉nda꞉ piki la handa꞉la꞉eki pa꞉ta꞉ niki na hatuku a꞉pa꞉peke laa lapa꞉peke leekeme.
5Kutupa Yesuma꞉ ipika꞉ disaipolo haliweki pa꞉ta꞉ alota꞉ Iki pa꞉ta꞉ hala꞉ hali homeke ma꞉nda꞉ma꞉ buta꞉ hokina꞉ naka꞉ yankekena꞉ da pa꞉ta꞉ pua alota꞉ Kameo. Palaowa punka tepo ta꞉ka꞉li kie. 6Ya yankeke ma꞉nda꞉ pota꞉ pomulu yapuluekema꞉ ame do timba ya da pa꞉ta꞉ opolo a꞉pa pila꞉pate I̱ma꞉ hala꞉peke ne dia꞉ya꞉leke handa loa꞉ma꞉ ma꞉nda꞉ kie laa leka꞉na꞉ta꞉ 7kota꞉ naka꞉ yankekema꞉ ipika꞉ da tukiki pa꞉ta꞉ hata꞉ naka꞉ pi hombo peaaso alota꞉ I̱ ka꞉nda꞉ma꞉ na homake. Yaka pota꞉ta꞉ amba꞉ loka꞉ hao yaka weki wandiki ame̱le̱ amba꞉ u pa꞉eloma꞉me. Naka꞉ honke ale ala꞉ta꞉ ekipa tiao mea kionope laa lea꞉ka꞉na꞉ta꞉ 8kota꞉ eki pilipikipe. Iki pa꞉ta꞉ I̱ma꞉ do pi alome. Mo da teke halima꞉ neketa꞉ ipika꞉ yankeke halena꞉ kone mo hande palaowa kuluekema꞉ na tialo pa꞉la꞉pateta꞉ nakana꞉ma꞉ yaala꞉ma꞉ na homeke honke wotu leka꞉na꞉ta꞉ kota꞉ ota꞉ opua tiao naka꞉ mea꞉peke ya꞉la꞉ ekimanu ana꞉na꞉ mea kilieke alome. 9Koto ekina꞉ iki pa꞉ta꞉ do pi alome. Honke leka꞉na꞉ta꞉ ota꞉ kilieke. Weika꞉na꞉ta꞉ handa꞉ wilipikie. Kilikili laeka꞉na꞉ta꞉ pota꞉ lombawalieke. 10Do ekina꞉ yeke loa꞉me. Honke la꞉tiki pu haya꞉ka꞉na꞉ta꞉ kota꞉ koto somema꞉ milieke. Kutaa make ma꞉nda꞉ epima꞉ weiya꞉tiki pu haya꞉ka꞉na꞉ta꞉ ipikana꞉ma꞉ handa꞉ wilieke. Epima꞉ pota꞉ lia꞉tiki pu haya꞉ka꞉na꞉ta꞉ kota꞉ mo pota꞉ta꞉ koto some pa꞉ta꞉ lombawalieke. 11Do pita꞉ weki wandiki hala꞉ haliweki pa꞉ta꞉ alome. Ika꞉ wekima꞉ iki pa꞉ta꞉ ta꞉peli teekeeki honke lea꞉ka꞉na꞉ta꞉ hoke keto mea halimikipe. 12O ba hapeke honke lea꞉ka꞉na꞉ta꞉ tei hali mea halimikipe. 13Ikita꞉ hoke haliweki halemepate kone ika꞉ weki wandiki pa꞉ta꞉ta꞉ epeke epeke alemanu halo halememe. Koto hau ota꞉ lombei peaaso hata꞉ta꞉ oli ya nane hala꞉ Apa꞉ma꞉ta꞉ mo Holi Sipitidi honke aleme wanda꞉hali pa꞉ta꞉ta꞉ ota꞉ halieke laa leekeme.
Yesu pita꞉ Bielisibulu yaapo
(Ma꞉tiu 12꞉22-30, Maka 3꞉20-27)
14Hali ma꞉nda꞉ta꞉ pi na leke hoke temoko pitiki hali hayeke Yesuma꞉ mo hoke temoko tolu lieke handa mo halima꞉ pi lombo leekeme. Kutu pieke handa wanda꞉hali paeyaoma꞉ tola꞉tia pomimikipate 15mandane wanda꞉halima꞉ alota꞉ Ipikana꞉ma꞉ mo hande hoke temoko manuna꞉ you hali Bielisibuluna꞉ wele pita꞉la꞉eki mea hoke temokomanu tolu lita꞉la꞉me lemekeme. 16Mandane wanda꞉halima꞉ Yesu tamuluekema꞉ alota꞉ Nakana꞉ma꞉ hepeni nanema꞉ ipula꞉ patehau ma꞉nda꞉ nikana꞉ma꞉ handomono pie lemekeme. 17Koto lemekepate Yesuma꞉ mo wanda꞉halina꞉ hone teke amba꞉ handa꞉ wiata꞉ dupa leekeme. Kapomani homekena꞉ handeteke hala꞉ wanda꞉halima꞉ ika꞉ ika꞉ kone tekilipa꞉ alu alu pea a꞉nda꞉ pimika꞉na꞉ta꞉ ika꞉ hande tapake au leleme ekita꞉ koto kone paelieke. Kutupa tapakesiki ma꞉nda꞉ma꞉ ika꞉ ika꞉ kone tekilipa꞉ alu alu pimika꞉na꞉ta꞉ kota꞉ koto tapake sikina꞉ hao pelia꞉peke ekita꞉ hoelieke. 18Koto ekina꞉ta꞉ Sadanina꞉ kilu tombuao hala꞉eki pa꞉ta꞉ haleme tapakema꞉ ta꞉ta꞉ ta꞉ta꞉ lo tekilipa꞉ alu alu pea ika꞉ ika꞉ kone a꞉nda꞉ pimika꞉na꞉ta꞉ ekipa hao pelia꞉tiki pu halimikipe. Ikana꞉ma꞉ I̱ pa꞉ta꞉ta꞉ Bielisibuluma꞉ I̱ honkopu kita꞉leke handa hoke temokomanu tolu lita꞉la꞉me laa alemeeki 19ota꞉ ya꞉ka꞉na꞉ta꞉ kota꞉ ika꞉ disaipolo haliwekima꞉ta꞉ ekipa hoke temoko tolu lu halemepe. Koto haliwekina꞉ piteleme hauma꞉ kone ika꞉ hau telipilimikie. 20Dia꞉me. Koda꞉na꞉ honkopu homekema꞉ mo hoke temoko tolu lu halome. Kutu pu halo ekima꞉ta꞉ Koda꞉na꞉ Kilu Tombuao Hala꞉ ekita꞉ iki teke pa꞉ta꞉ amba꞉ a꞉pa꞉la꞉ ekita꞉ peneme yao wala꞉la꞉me.
21Honkopu hake hali ma꞉nda꞉ma꞉ ipika꞉ a꞉nda꞉ pita꞉la꞉ alemanu tiki tiki yao wia hata꞉ mo ipika꞉ da handeteke haya꞉ka꞉na꞉ta꞉ ipika꞉ da tukiki pa꞉ta꞉ ula꞉ alemanu paeyaota꞉ epeke tupa꞉ pa wilieke. 22Koto pa꞉la꞉pate ota꞉ honkopu wopu hake hali ma꞉nda꞉ma꞉ koto da teke hali yaapo a꞉nda꞉ pea mo da teke hali lu bepolaota꞉ ipika꞉ a꞉nda꞉ alemanu paeyao mea pelieke. Kutupa mo pake mia꞉ ale manuta꞉ telipilieke.
23Ma꞉nda꞉ epita꞉ yaka yankeke na haeka꞉na꞉ta꞉ kota꞉ I̱ yaapo a꞉nda꞉ lita꞉la꞉me. Kutupa make hali ma꞉nda꞉ epima꞉ yaka sipisipi momba꞉laaso hano I̱ na tamba꞉ mia꞉ka꞉na꞉ta꞉ kota꞉ ipikana꞉ma꞉ta꞉ panane tolu lita꞉la꞉me leekeme.
Hoke temoko paa la꞉ka꞉la a꞉pa꞉la꞉eki
(Ma꞉tiu 12꞉43-45)
24Yesuma꞉ alota꞉ Hali ma꞉nda꞉na꞉ weleke pa꞉ta꞉ pila꞉ hoke temoko ma꞉nda꞉ hama opolu bao yapea꞉ka꞉na꞉ta꞉ mo hapula꞉ alena꞉ pomu lopolo hata꞉ hoto pita꞉peke da panda꞉ ma꞉nda꞉ weita꞉la꞉me. Hoto pita꞉peke ale ma꞉nda꞉ na handa꞉ wia꞉ka꞉na꞉ta꞉ kota꞉ mo hoke temokoma꞉ ipika꞉ kone alota꞉ Yaka hande mina꞉pa꞉lao epoa꞉ da nane paa la꞉ka꞉la polueke laa 25ipikana꞉ma꞉ la꞉ka꞉la pua mo da a꞉pa handilia꞉pate ma꞉nda꞉ na hake wamo pea bao epeke tupa꞉ halia꞉eki handilieke. 26Koto pa꞉leketa꞉ mo hoke temoko pua pa mandane watake hata꞉ hoke temokomanu paeyao hatuku milieke. Koto hoke temoko manuna꞉ hoke hau pita꞉la꞉ ekita꞉ mo ipiki make lu ankulalimikie. Iki paeyao mandake pa꞉ta꞉ a꞉pa halimikie. Kutu pimika꞉na꞉ta꞉ mo halita꞉ amba꞉ta꞉ hoke tupa꞉ hao pelia꞉pate ameta꞉ ota꞉ hoke tupa꞉ hao pelieke laa leekeme.
Ota꞉ epeke ta꞉na꞉ma꞉ homa꞉la꞉eki
27Yesuma꞉ koto pi lo paeyeketa꞉ mo wanda꞉hali anka꞉lopuna꞉ pitieke wanda꞉ ma꞉nda꞉ma꞉ anekema꞉ alota꞉ Neke ma꞉nda꞉la꞉ make andu ka꞉la꞉ wanda꞉ta꞉ ta꞉na꞉ma꞉ homolo pa꞉la꞉me leekeme. 28Koto leeke Yesuma꞉ alota꞉ Dia꞉me. Koda꞉na꞉ pi opua pu haleme wanda꞉hali ikana꞉ma꞉ta꞉ ta꞉na꞉ma꞉ wotu homa꞉peke ya꞉la꞉me leekeme.
Wele pita꞉la꞉eki handuluekema꞉ honke lemekeeki
(Ma꞉tiu 12꞉38-42)
29Wanda꞉hali wopuma꞉ Yesu a꞉pa momba꞉la hopa꞉liao haena꞉ Yesuma꞉ alota꞉ Ame do natena꞉ haleme wanda꞉halita꞉ hoke wanda꞉hali halememe. Ikana꞉ma꞉ta꞉ mo na handeke patehau ma꞉nda꞉ handuluekema꞉ I̱ pa꞉ta꞉ honke aleme pateta꞉ I̱ma꞉ta꞉ iki pa꞉ta꞉ ota꞉ ma꞉nda꞉siki make na walo polopate mo hande Dionama꞉ patehau piekeeki homeke handilimikie. 30Mo hande potopede hali Dionama꞉ Ninipa wanda꞉hali pa꞉ta꞉ patehau pieke tupa꞉ kone mo Wanda꞉halina꞉ Eiyekema꞉ make ame wanda꞉hali pa꞉ta꞉ patehau pilieke. 31Mo hande pi yokaalu pulu pa꞉la꞉ nate opolo epea꞉ka꞉na꞉ta꞉ mo hande Siba da yu handeteke hala꞉ kuini wanda꞉ma꞉ tiao hata꞉ ame do natena꞉ haleme wanda꞉halina꞉ hoke hau manuna꞉ ma̱leke lilieke. Ekipeke mo wanda꞉ma꞉ta꞉ mo kini hali Solomonona꞉ epeke hone wotu u tekelepea wala꞉la꞉ pimanu opuluekema꞉ yeke mo kenke honiki ma꞉nda꞉ nane hao epeekeme. Kutu piekepate I̱ma꞉ iki pa꞉ta꞉ alome. Ameta꞉ Solomono ankulala꞉ ale ma꞉nda꞉ a꞉pa꞉la꞉me. 32Mo hande pi yokaalu pulu pa꞉la꞉ nate opolo epea꞉ka꞉na꞉ta꞉ Ninipa wanda꞉halima꞉ tiao hata꞉ ika꞉ hoke hauna꞉ ma̱leke lilimikie. Ekipeke. Dionama꞉ pi waleeke dina꞉ta꞉ koto wanda꞉halima꞉ ika꞉ hoke hoke haumanu hoki walemekeme. Koto pa꞉la꞉ ekina꞉ I̱ma꞉ iki pa꞉ta꞉ alome. Ameta꞉ Diona ankulala꞉ ale ma꞉nda꞉ a꞉pa꞉la꞉me leekeme.
Lokena꞉ pa̱a̱ pa꞉la꞉eki
(Ma꞉tiu 5꞉15, 6꞉22-23)
33Ma꞉nda꞉ma꞉ ipika꞉ ola꞉pake ka꞉waata꞉ na a꞉mbao u hala꞉ o mo disi kawaso tieke oto pa꞉ta꞉ na wilieke. Koto hau na pikita꞉ mo da pa꞉ta꞉ wanda꞉hali a꞉pa honda꞉ pamba꞉tiki pitolo handena꞉ mo lamepa u hala꞉ alena꞉ u hala꞉me. 34Naka꞉ leketa꞉ naka꞉ lokena꞉ ola꞉pakee. Naka꞉ leke a꞉nda꞉ ota꞉ epea꞉ka꞉na꞉ta꞉ kota꞉ naka꞉ loke paeyaota꞉ pa̱a̱ma꞉ tumbilieke. Koto pa꞉la꞉pate naka꞉ leke a꞉nda꞉ hoeya꞉ka꞉na꞉ta꞉ naka꞉ loke paeyaota꞉ timba꞉la꞉ pambilieke. 35Koto ekina꞉ta꞉ mo naka꞉ lokena꞉ pa̱a̱ pa꞉la꞉ ekita꞉ timba꞉ na la꞉na꞉ leketa꞉ ota꞉ wopu handeteke hapeke 36Kutupa naka꞉ loke paeyao a꞉nda꞉ pa̱a̱ma꞉ tumba hata꞉ pa timba꞉ timba꞉ homeke a꞉nda꞉ na lea꞉ka꞉na꞉ta꞉ kota꞉ ola꞉pake pa̱a̱ pita꞉la꞉ ma꞉nda꞉na꞉ naka꞉ loke paeyao pa̱a̱ pu kimalieke leekeme.
Yesuma꞉ tapake yaapona꞉ haumanu lo kelaeyekeeki
(Ma꞉tiu 23꞉1-36, Maka 12꞉38-40)
37Yesuma꞉ pimanu lo paeyeketa꞉ Pa꞉tisi hali ma꞉nda꞉ma꞉ ne nolo pana꞉e leeke handa ipika꞉ da pa꞉ta꞉ honda꞉ pamba pua ne nolueke alo pitiekeme. 38Mo hande Pa꞉tisi halima꞉ta꞉ Yesuma꞉ ne noluekema꞉ ipika꞉ kiki amba꞉la na tandepeekeeki hando haota꞉ pututuma꞉ homa tola꞉tia pomiekeme. 39Kutu piekeeki handaata꞉ mo Teke Halima꞉ ipiki pa꞉ta꞉ alota꞉ Ameta꞉ kota꞉ iki Pa꞉tisi haliwekima꞉ta꞉ ika꞉ kapo make kawaso manuta꞉ manda homeke tandepo halemepate tukiki pa꞉ta꞉ta꞉ pasa꞉tei pita꞉la꞉ hau make hoke hoke hau paeyaoma꞉ iki tumba halememe. 40Ikita꞉ hone na wiki haliwekio. Koda꞉ma꞉ hama nane wa꞉pa꞉la꞉ tupa꞉ tukiki nane make na wa꞉pa꞉la꞉pe. 41Koto ekina꞉ ika꞉ kapo make kawasomanu pa꞉ta꞉ ula꞉ ale manuta꞉ mo nate hali wanda꞉hali pa꞉ta꞉ pa hala꞉pa꞉peke. Kutu piki hau a꞉nda꞉ pimika꞉na꞉ta꞉ kota꞉ ika꞉eki paeyao ota꞉ hake wotu pilieke leekeme.
42Pa꞉tisi haliwekio. Ika꞉ hoke yenki tiekena꞉ I̱ paala꞉e. Ikana꞉ma꞉ta꞉ ika꞉ hande ena꞉ hala꞉ ale tekia꞉ o totopo piki tanima꞉ handeke ale sunuta꞉ kiki yaapo telipata꞉ putupa homeke sikita꞉ Koda꞉ pa꞉ta꞉ halo halemepate mo Koda꞉ teke pa꞉ta꞉ta꞉ puki hala꞉pekeeki make epeke tikitiki piki hau manuta꞉ hone yonka꞉lalememe. Dupiki hau manuta꞉ ota꞉ pea꞉tiki pitolo hata꞉ mo mandaneeki make na mina꞉pa꞉lapeke.
43Pa꞉tisi haliwekio ika꞉ hoke yenki tiekena꞉ I̱ paala꞉e. Ikana꞉ma꞉ta꞉ oni yeni pu hala꞉ da pa꞉ta꞉ mo you haliwekina꞉ wiala꞉ sea manuna꞉ pituluekema꞉ hone wotu u haleme make oni makedi hama haleme wanda꞉halima꞉ ika꞉ biki miniliaaso Epeke daka꞉la꞉paaso꞉e la꞉tiki pina꞉ hone wopu u halememe.
44Ika꞉ hoke yenki tiekena꞉ I̱ paala꞉e. Ikita꞉ wanda꞉halima꞉ mo patehau na pa꞉la꞉ hali lapa꞉ma꞉ handeke nono pelemeke handa tumbao pomu haleme haliwekima꞉ lapa꞉ma꞉ handelememe leekeme.
45Koto leeke mo Lo Pi walo haemeke hali ma꞉nda꞉ma꞉ Yesu pa꞉ta꞉ alota꞉ Disao. Nakana꞉ma꞉ kutupiki pi ale ekima꞉ta꞉ niki manda꞉ meake nono piteleme leekeme. 46Yesuma꞉ alota꞉ Lo Pi walo haleme haliwekio iki make ika꞉ hoke yenki tiekena꞉ I̱ paala꞉e. Ikana꞉ma꞉ wanda꞉halina꞉ hoki mandata꞉ ma꞉nda꞉ma꞉ tia꞉peke na yeke ka꞉nda꞉ piki alemanu mea tiao halemepate ikana꞉ma꞉ta꞉ ika꞉ kiki ma̱leke kone tindipao na tamba꞉ mea tialimikie.
47Ika꞉ hoke yenki tiekena꞉ I̱ paala꞉e. Ikana꞉ma꞉ta꞉ mo hande potopede haliwekina꞉ toko ula꞉ apa꞉nda꞉ta꞉ epeke tupa꞉ wamo pea wiao halememe. Pate koto potopede haliwekita꞉ hande ika꞉ apa꞉mei tonuma꞉ kone lia꞉tiki pimiki haliwekie. 48Ikana꞉ma꞉ ika꞉ apa꞉meima꞉ pimiki ekina꞉ ta꞉na꞉ma꞉ homo haloma꞉me alememe. Pa ekipeke ika꞉ apa꞉meima꞉ta꞉ mo potopede haliweki pa lu pitaemeke handa ikana꞉ma꞉ta꞉ ika꞉ apa꞉nda꞉ manuta꞉ wamo peao halememe.
49Doeki tekena꞉ta꞉ Koda꞉na꞉ epeke hone wotu wita꞉la꞉ ekima꞉ta꞉ do la꞉la꞉me. I̱ma꞉ta꞉ yaka potopede haliweki make pi mea pomuao haleme haliweki tapaalo polopate mandaneta꞉ lu baalimiki make mandaneta꞉ tanda tanda wopu halimikie laa la꞉la꞉me. 50Koto ekina꞉ta꞉ mo hande do ya yu kini pea a꞉pa ame do limiki potopede haliweki paeyao limiki ekina꞉ hoke yenkita꞉ ame do haleme wanda꞉halima꞉ milimikie. 51Mo hande Eipolo limikieki kini pea a꞉pa mo hande oloda pita꞉ yako piki da yaapo tukiki pa꞉ta꞉ a꞉mbolo hata꞉ limiki hali Sekataiya alome. Aowe. I̱ma꞉ iki pa꞉ta꞉ ota꞉ loa꞉ma꞉ ame do wanda꞉halita꞉ koto limikieki paeyaona꞉ hoke yenki milimikie. 52Mo Lo Pi walo haleme haliweki ika꞉ hoke yenki tiekena꞉ I̱ paala꞉e. Ikana꞉ma꞉ta꞉ mo hande hone wotu mia꞉peke da pota꞉na꞉ kita꞉ ika꞉ wia halemepate koneta꞉ ika꞉ kone na honda꞉ pambeketa꞉ mo honda꞉ pambuluekema꞉ taapeleme wanda꞉halita꞉ sa꞉sa꞉ pu halememe leekeme.
53Yesuma꞉ koto da mina꞉pa꞉lao peeke naneta꞉ mo Lo Pi walo haemeke haliwekima꞉ make Pa꞉tisi haliwekima꞉ make Yesuta꞉ ota꞉ hoke tetopiki tupa꞉ kitaaso hata꞉ ane mone alena꞉ ipiki pa꞉ta꞉ lota꞉ pita꞉la꞉eki wotu halemekeme. 54Kutu pimiki hauta꞉ Yesu hona꞉ma̱o̱ tamuluekema꞉ make ipikana꞉ma꞉ ata꞉ka꞉ piki pi ma꞉nda꞉ lea꞉ka꞉na꞉ minulua꞉ patema꞉ lemekeme.
اکنون انتخاب شده:
Luku 11: SEMB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
