Эстер 9
9
Жугьтар душмниин гъалиб хьуб
1ЙицӀикьюбпи адар вазлин йицӀишубудпи йигъан, паччагьдин амур кӀулиз адабгъуз вахт гъафиган, – душмнари жугьтариин гъалиб хьубак миж киву йигъан жараси гъабхьну, аьксина, жугьтари чпин душмнариин гъалибвал гъадабгъну – 2гьадму йигъан, чпиз къаршу душмнихъди женг гъабхуз, Ахашʼверуш паччагьлугъдин вари вилаятарин шагьрариъ жугьтар уч гъахьну. Ва сарихьанра жугьтар ккагъуз гъахьундар, дурарихьан вари халкьариз гучӀ гъабхьну. 3Ва Мярдягьяйихьан вари вилаятарин гьякимариз, паччагьдин гъуллугъчйириз гучӀ гъабхьнийи ва дурари жугьтарин тереф гъибиснийи. 4Паччагьдин багахь хьайи Мярдягьяй кьувватлу гъахьнийи, варишваъ дугъан ад абхънайи. Вахт гъябгъбахъ Мярдягьяйин кьудратлувал артухъ шулайи.
5Хъа жугьтари чпин вари душмнар тӀанкь гъапӀнийи – дурарикан чпиз ккуниб гъапӀнийи. 6Сузы гъалайиъ жугьтари хьудварж кас терг гъапӀнийи. 7-10Паршандата, Далфон, Аспата, Пората, Адалья, Аридата, Пармашта, Арисай, Аридай ва Вайзата – Хаммедатайин бай, жугьтарин душман вуйи Амандин йицӀур бай йивну гъийихнийи. Амма жугьтари дурарин девлетнак кучундайи.
11Гьадму йигъан паччагьдиз Сузы гъалайиъ йивну гъийихдарин кьадарнакан мялум гъапӀнийи. 12Паччагьди Эстериз кӀуру: «Сузы гъалайиъ жугьтари хьудварж кас, гьадму гьисабнаъ Амандин йицӀур байра терг гъапӀну. Дурари паччагьлугъдин миди вуйи вилаятариъ гьапӀнийкӀан? Сарун фу тӀалаб апӀуз ккундувуз? Вари тамам апӀидиза».
13Эстери кӀуру: «Эгер паччагьдиз ккун гъабхьиш, гъит Сузы шагьриъ жугьтариз закурра гъийин амриинди гьяракат давам апӀуз ихтияр туври, хъа Амандин йицӀур балин майтар буруздикк ккерхри».
14Паччагьди Эстери гъапиб тамам апӀуз амур апӀуру – Сузыйиъ дугъан амрикан мялумат тувру, хъа Амандин йицӀур балин майтар буруздикк ккерхру. 15Сузыйиъ яшамиш шулайи жугьтар цӀийикӀултӀан уч гъахьнийи – адар вазлин йицӀиюкьудпи йигъан – ва шагьриъ шубудваржсан кас терг гъапӀнийи, хъа девлетнак кучундайи.
16Паччагьлугъдин вари вилаятариъ айи имбу жугьтарра душмнарихьан азад хьубан женгназ удучӀвнийи, ва дурари ургцӀурна хьуд агъзур кас чпиз къаршу вуйидар тӀанкь гъапӀнийи, амма дурарин девлетнак хилра кучундайи. 17Думу адар вазлин йицӀишубудпи йигъ вуйи, хъа йицӀиюкьуд кӀуру йигъан дурари рягьятвал гъадабгъурайи – думу дурарин шадвалин ва машквран йигъ гъабхьну.
Пурим машквар
18Сузыйиъ яшамиш шулайи жугьтар йицӀишубудпи ва йицӀиюкьудпи йигъан уч гъахьну, хъа йицӀихьудпи йигъан дурарин машквран ва шадвалин йигъ вуйи. 19Хъа гъулариъ яшамиш шулайи жугьтари адар вазлин йицӀиюкьудпи йигъ – машквран ва шадвалин йигъси гъаршуламиш апӀура, ва инсанари сар-сариз иццишнар каъра.
20-22Мярдягьяйи варибдикан бикӀуру ва, гьар йисан жугьтар чпин душмнарихьан азад гъахьи адар вазлин йицӀиюкьудпи ва йицӀихьудпи йигъар къайд апӀуб амур апӀури, чав гъибикӀуб Ахашʼверуш паччагьлугъдин вари вилаятариз, вари багахьлу ва ярхла жугьтариз хътапӀуру, фицики му вазли пашманвал шадвализ илтӀибкӀнийи, хъа дерд – машквриз. Гъит му йигъар шадвалин ва машквриндар ишри, гъит инсанари сар-сариз иццишнар гьиври ва касибариз пешкешар гьаъри. 23Гьаддихъанмина гьамусдиз Мярдягьяйи гъибикӀубдиинди арайиз гъафи машквар къайд апӀури жугьтарин аьдат гъабхьну.
24Агагеянжви Хаммедатайин бай Аманди, жугьтарин душмни, жугьтар терг апӀуб фикир ади, пур (тпут) ипну, 25амма му ляхникан паччагьдиз хабар гъабхьиган, паччагьдин амриинди жугьтар терг апӀуз Амандин кӀваъ айи чӀуру кьаст чан кӀулиз адабкну: Аман ва дугъан баяр буруздикк ккерхну. 26Гьаддиз думу йигъариз Пурим кӀура, «пурим» (яни туптар гафнакан арайиз дуфнайиб).
Чпиз гъябкъюбдин, чпиин улубкьубдин натижаси, 27жугьтари чпиз, чпин наслариз ва чпихъди сатӀи гъахьидариз гьаргандиз вуйи аьдат кьабул гъапӀну: гьадму кьюд йигъ, амур дапӀнайиганси, йисʼан йисаз къайд апӀуб. 28Гьадму йигъар дурарин гьарсаб насли, гьарсаб хизанди, гьарсаб шагьриъ ва вилаятдиъ кӀваин гъитри ва къайд апӀри. Гъит жугьтарин Пурим йигъар кӀваълан дурушри, гъит гъюзимбу наслари думу йигъар фикриъ уьрхри!
29Паччагьдин хпир Эстери, Авихаилин шуру, жугьуд Мярдягьяйихъди сатӀиди дугъан Пурим машкврахъди аьлакьалу кьюбпи амур вари чаз айи гьюкмиинди, бикӀбиинди тасдикь гъапӀну. 30-31Ва Ахашʼверушдин паччагьлугъдин варжна къанна ургуб вилаятдиъ айи вари жугьтариз, улупнайи вахтна Пурим йигъар машкврандарси тасдикь апӀбан бадали, жугьуд Мярдягьяйи паччагьдин хпир Эстерихъди сатӀиди къарар адабгъну. Чпи жугьтари, чпиз ва чпин наслариз адабгъу думу машквар ишбалан ва ушвар дисбалан ккебгъуйи. 32Эстери чан амриинди Пурим машквар тасдикь гъапӀну. Дидин гьякьнаан гъибикӀнийи.
اکنون انتخاب شده:
Эстер 9: ТабГК
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Институт перевода Библии, 2010, 2013, 2016, 2018, 2023