Эстер 8
8
Жугьтари чиб уьрхбакан паччагьдин амур
1Гьадму йигъан Ахашʼверуш паччагьди жугьтарин душман Амандин вари девлет Эстериз тувнийи. Ва Мярдягьяй паччагьдихьна хъади гъафнийи (Эстери думу чан фуж вуш ктибтнийи). 2Паччагьди Амандихьан гъадабгъу тӀублан тӀубхъан хътабгъуру ва Мярдягьяйихьна тувру. Хъа Эстери Мярдягьяйиз Амандин мулкнан гъайгъу зигуб табшурмиш апӀуру.
3ЦӀийикӀултӀан Эстер паччагьдихьна илтӀикӀуру: дугъан ликарикк дахъну, дугъу паччагьдикан, Амандин пис фикир, жугьтар пуч апӀуб, тамам дарапӀуз миннат апӀуру. 4Паччагьди Эстерин терефназ гъизилин маргъ гьачӀабккуру.
Эстер гъудужвну, паччагьдин улихь дийигъуру 5ва кӀуру: «Эгер паччагьдиз ккун гъабхьиш, эгер узу паччагьдин рягьимлувализ лайикь вуш, эгер паччагьдиз дюзди рябкъюраш, агагеянжви Хаммедатайин бай Аманди, паччагьлугъдин вари вилаятариъ жугьтар тӀанкь апӀуз адабгъу къарар гъит дугъу батӀул апӀри. 6Йиз халкьдиина бедбахтвал фици гъюраш, узхьан архаинди лигуз шулинхъа, йиз багахьлуйир фици тӀанкь шулаш, узхьан рябкъюз шулинхъа?»
7Паччагь Ахашʼверушди паччагьдин хпир Эстериз ва жугьуд Мярдягьяйиз кӀуру: «Амандин вари девлет узу Эстериз тувунза, хъа жугьтар тӀанкь апӀуз ккун гъабхьи думу буруздикк ккерхну. 8Паччагьдин ччвурнахъан дибикӀнайи ва паччагьдин тӀубланин мугьур кайи фунубра къарар батӀул апӀуз шлуб дар. Гьамус учву паччагьдин ччвурнахъан лазим вуйибсиб жугьтарин гьякьнаан къарар бикӀай ва паччагьдин тӀубланихьди дидʼин мугьур дивай».
9Гьадмуган, шубубпи вазли, яни сиван вазли, къанна шубудпи йигъан, паччагьдин бикӀрудариз дих гъапӀнийи ва, Мярдягьяйи гъапиганси, цӀийи къарар адабгънийи ва вари жугьтариз, паччагьдин гъуллугъчйириз, Индияйиан Эфиопияйизкьан, вари варжна къанна ургуб вилаятдин гьякимариз, гьарсаб халкьдиз чан чӀалниинди, жугьтариз чпин чӀалниинди ва бикӀбан къайдайиинди кагъзар хътауру. 10Му Ахашʼверуш паччагьдин ччвурнахъан адагъу ва паччагьдин тӀубланиинди мугьур иливнайи къарар хьади, паччагьдин илхйиригъян ужударстар гьяйвнариин илитну, чархачйир гьаънийи.
11-12Ахашʼверушдин паччагьлугъдин вари вилаятариъ сад йигъан, йицӀикьюбпи адар вазлин йицӀишубудпи йигъан, гьадму къарариинди паччагьди гьарсаб шагьриъ яшамиш шулайи жугьтариз, уч духьну, жвувхъанди женг гъабхуз ихтияр тувру. Эгер хилиъ яракь айи инсанар, фуну вилаятдиъ вушра, фуну миллетдикан вушра, жугьтариин алархьиш, думуган жугьтариз, дурар чпин бицӀидарра, хпарра хъади, тӀанкь апӀуз, хъа дурарин мулк тӀараш апӀуз ихтияр тувра. 13Гьадму къанундин кьувват айи кӀажарикан вари халкьариз, вари вилаятариз хабар дебккну ккундийи, жугьтар гьадму йигъахьна гьязур хьубан ва душмнариз кьисас апӀбан бадали.
14Паччагьдин илхйиригъян вуйи гьяйвнариин али чархачйир дишла рякъюъ учӀвнийи, паччагьдин амриинди. Паччагьдин амрикан Сузы гъалайиъ мялумат тувнийи. 15Паччагьдихьан Мярдягьяй беневш ва уьру хьайин ва багьа лизи гинбин палтар, гьацира кӀулʼин гъизилин аьхю таж алди удучӀвуру. Сузы шагьриъ шадвал абхънайи. 16Жугьтарин хулариъ акв ва шадвал, машкврин гьевес, лайикьлувал айи. 17Фуну вилаятдиз, фуну шагьриз паччагьдин амрикан мялумат тувубси, варишваъ жугьтари дем, шадвал, машквар ккергъри гъахьну. Ва му уьлкейин гизаф халкьари жугьтарин дин кьабул апӀуз хъюгънийи, фицики дурарик жугьтарикан къурхувал кабхънийи.
اکنون انتخاب شده:
Эстер 8: ТабГК
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Институт перевода Библии, 2010, 2013, 2016, 2018, 2023