LUKA 5
5
1Mizapi nih Pathian bia ngaih awkah amah an panh cuahmah lio ah, anih cu Genesaret Tidil kamah a dir, 2tidil kamah tilawng pahnih a dirmi kha a hmuh i ngatlaitu nih an sur an thenh ruang i tilawng an chuahtâk lio a si. 3Cuticun tilawng pakhat Simon ta ah khan â cit i tikam in tlawmpal thawlh deuh kha a fial. Cuticun a ṭhu i mizapi kha a cawnpiak hna. 4Bia a chim dih hnu ah, Simon sinah, “Tithuhnâk lei panh in na sur kha nga tlaih awkah vorh tuah,” tiah a ti. 5Simon nih, “Cawnpiaktu, zan khaudei ka vorh cang i zeihmanh ka tlai lo, asinain na bia in sur ka vorh lai” tiah a ti. 6A chim bangin a hun vorh tikah, nga tampi an tlaih i an sur zong a tlek cuahmah. 7Tilawng dang i an hawile kha anmah bomh awkah an kut in an hei zauh hna. An ra i tilawng pahnih pil dengmang tiangin an pon. 8Simon Peter nih cucu a hmuh tikah, Jesuh kehram ah a bawk i, “Maw, Bawipa, misual ka si, ka kaltâk,” tiah a ti. 9Zeitintiah cutluk tam i nga an tlaihmi kha amah le a hawi le an khuaruah a har tuk hringhran. 10Simon rian`uanpi hawi Zebedi fapa Jeim le Johan zong nih mak an ti ngaingai. Jesuh nih Simon sinah, “Ṭihhlah, atu thawkin minung na tlaih cang lai,” tiah a ti. 11Cuticun an tilawng kha tikam ah an kalpi i zeizong vialte kaltâk in amah kha an zulh. 12Cun khua pakhat i a um lio ah, ngaihmanh, mi pakhat thinghmui in a khatmi nih Jesuh a hmuh, a hmai ah bawkin, “Bawipa na duh ahcun naka thianter khawh,” tiin a nawl. 13Anih nih, a kut in a hun banh i a tongh hnu ah, “Ka duh, thiang cang” tiah a ti. Chikkhatteah a thinghmui nih a chuahtak cawlh. 14Ahohmanh chim hlah tiah cupa cu a ti. “Tlângbawi sin tu ah va zohter law, nâ thenhnâk caah Moses nih nawl a rak pêk bangin va pe, minih na dam cang tiah an theih khawh nâkhnga,” tiah a ti. 15Asinain a thawng cu a thang chinchin i a bia ngaihduh le an zawtnâk damter duh ah mi tampi an i pum. 16Cuticun ramking ah amah te lawng â zûk i thla a cam tawn. 17Nikhat cu a cawnpiak hna lio ah Farasih le nawlbiacawnpiaktu kha an ṭhu ve, cu hna cu Galili ram le Judia ram kip le Jerusalem in a rami an si. Mi damter khawhnâk Bawipa thiltikhawhnâk kha a sinah a um. 18Cun ngaihmanh zeng pakhat a ihkhun he an rak zawnh i a chungah lut in, a hmai ah chiah an va timh. 19Mizapi ruangah luhpi khawhnâk lam a um lo, inn cungah an kaipi i inn cung kha an ṭheh, cu awng ah cun a ihkhun he Jesuh hmai zawnah an vun ṭhumh. 20Anih nih an zumhning a hmuh i, “Mipa, na sualnâk ngaihthiam a si cang,” tiah a ti. 21Cun nawlbiacawnpiaktu le Farasih hna nih, “(Pathian)cawhdehnâk bia a chimtu hi mizeidah a si? Pathian dah tilo, ahodah sual a ngai thiam kho? tiah khua an ruat. 22Jesuh nih an ruahmi kha a hngalh i, “Nan lungthin ah zeidah nan ruah? 23‘Na sualnâk ngaihthiam a si cang, timaw chim a fawi deuh, tho law, ke in kal cang, ti hi dah? 24Sihmanhsehlaw vawlei ah Mi Fapa nih sualngaihthiam khawhnâk a ngei ti nan hngalh nâkhnga caah a ti i mizeng sinah, ‘Tho law, na ihphah la law, na inah kal,”’ tiah a ti. 25Hmakhatteah an mit hmuh ah a tho cawlh i a ihphah kha la in, Pathian thangṭhat pahin a inah a tlung. 26An dih lakin mak an ti ngaingai i Pathian thangṭhat in, “Nihin ah thilmak ngai kan hmuh,” tiah an ti i an ṭih ngaingai. 27Cuhnuah a chuak i ngunkhuai khawlhnâk hmun i a ṭhumi, ngunkhuai khawltu pakhat, a min Levi kha a hmuh i, “Ka zul” tiah a ti. 28Cun a tho i zeizong vialte kaltâk in a zulh. 29Levi nih a innah Jesuh caah rawldanghnâk nganpi a tuah i cuka ah ngunkhuai khawltu tampi le midang kha an sinah an ṭhu. 30Cun nawlbiacawnpiaktu le Farasih kha a lamkaltu sinah an phunzai, “Zeiruangahdah, ngunkhuai khawltu hna he nan ei i nan din?” tiah an ti. 31Jesuh nih, “Ngandammi nih sibawi an herh lo, a zawmi hna nih an herh,” tiah a ti hna. 32Midingmi hna auh awkah ka ra lo i misual hna auh i ngaihchihter awkah ka ra, tiah a leh hna. 33Annih nih, “Johan zultu hna nih rawl an ulh i thla an cam tawn, cun Farasih hna zong nih cubantukin an tuah tawn, asinain nan nih nan ei i nan din kun? tiah an ti. 34Jesuh nih, mo ngeitu an sinah a um chung pauh cu mo ngeitu hawi le rawl nan ulhter kho lai maw? 35Sihmanhsehlaw mo ngeitu kha an sinin lak cân a phân te lai, cu cân ah an ulh te lai,” tiah a ti. 36An sinah tahchuanhnâk bia a chim, “Ahohmanh nih puanthar in puanhlun an belh ballo, an belh ahcun a thar nih a hlun kha a thleh chin lai. Cucaah a thar le a hlun cu â rem kho lo. 37Ahohmanh nih misur hang thar saphaw hlun thawl ah an rawn bal lo, an rawn ahcun misur hang thar nih a khuai lai i a tle dih lai. Saphaw thawl zong a rawk dih lai. 38Cuticun misur hang thar cu saphaw thawl thar ah rawn ding a si i an pahnih in an him. 39Cun ahohmanh nih misur hang hlun an din dih in, misur hang thar an duh bal lo; “A hlun a ṭha deuh’ an ti tawn,” tiah a ti.
اکنون انتخاب شده:
LUKA 5: HAKABSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
