LUKA 4
4
1Jesuh cu Thiang Thlarau in a khat i Jordan tiva in a rak kir i ramcar ah Thlarau nih a kalpi. 2Cukaah khuachia nih ni 40 chung a tukforh. Cu cân ah zeihmanh a ei lo. Cu cân cu an dih hnuah a rawl a ṭâm. 3Cun khuachia nih, “Pathian Fapa na si ahcun, hi lung hi changreu i cang dingin nawl pe ngat,” tiah a ti. 4Jesuh nih, “Minung hi changreu lawngin a nung lai lo, Pathian bia kip in a nung deuh lai, tiah ṭial a si,” tiah a ti. 5Cun khuachia nih tlâng sângpi ah a kalpi i chikkhatteah vawlei pennâk vialte kha a hmuhsak. 6Khuachia nih, “Hi nawlngeihnâk vialte hi, a lianngannâk he kan pêk lai, zeicatiah ka sinah pêk an si cang i ka duhmi pauh ka pêk tawn hna. 7Cucaah ka hmai in naka biak ahcun a dih lakin nata a si ko lai,” tiah a ti. 8Jesuh nih, “Satan, ka hnu ah um! ‘BAWIPA na Pathian bia law amah lawng rian,’ tiah ṭial a si kha,” tiah a ti. 9Cuhnuah Jerusalem ah a kalpi i ṭempal zimah a umter i a sinah, “Pathian Fapa na si ahcun, hika hin vung zuang. 10Zeitintiah nangmah kilveng dingin, a vanmi nawl a pêk hna lai, 11na ke lungah nâ khawng sual nâkhnga lo an kutin an in cawi lai, tiah ṭial a si kha,” tiah a ti. 12Jesuh nih, “BAWIPA na Pathian hniksak hlah,” tiah ti a si kha, tiah a ti. 13Khuachia nih a phunphun i a tukforh hnu ah, cân rem i tukforh ṭhan dingin a kaltâk. 14Jesuh cu Thlarau thiltikhawhnâk he Galili ah a kir, a thawngpang cu cuka ram hrawngah a thang dih. 15An sinagog ah a cawnpiak hna i mi vialte nih an thangṭhat. 16Cuticun a tlawnlennâk khua Nazaret ah a phân. A tuah tawn bangin, Sabbath nih ah Sinagog ah a lut i rel dingin a dir. 17Isaiah cauk kha an pêk, cazual kha a samh i hi bia ṭialnâk zawn hi a hmuh. 18BAWIPA Thlarau cu ka cungah a um, zeicatiah sifakmi hna sin i Thawngṭha chim dingin chiti a ka thuh; lungkuaimi hna damter awkah aka thlah i saltangmi hna luatter ding le, mitcawmi hna khua hmuhter ding le, lamhchihmi hna luatnâk ding 19thanh awk le, BAWIPA lunglomh kum phuan le thanh awkah,” timi hi. 20Cuhnuah Cauk cu a zual i, a zohkhenhtu sinah a pêk i a ṭhu. Sinagog i a ummi vialte an mit cu amah cungah â fu dih. 21An sinah, “Hi cathiang hi ni hin ah nan mithmuh ah a tling cang,” tiah chim hram a thawk. 22An dihlak in a bia theihpitu ah an cang, a hmurkâ in a chuakmi zângfahnâk bia kha mak an ti ngaingai. Josef fapa kha a si ko lo maw? tiah an ti. 23Anih nih, “Hi phungthlukbia hi nanka chim hnawh ko lai lo maw? Sibawipa, nanmah i damter tuah! Kapernaum khua i na tuahmi kan rak theihmi kha, na khua le na ramah hin tuah ve ngat, nan ti ko lai hih,” tiah a ti. 24Biataktein kan chimh hna, profet ahohmanh an khua mi nih an conglawm bal lo,” tiah a ti. 25Asinain biadik kan chimh hna, Elijah chan i kumthum le a cheu van a pin i ram pumpuluk ah mangṭâm nganpi a tlun lio ah khan, Israel ram ah nuhmei tampi an um ko, 26asinain Sidon peng i Zarefat khua i nuhmei nu sinah dah ti lo, ahosinhmanh ah Elijah kha thlah a si lo. 27Cun profet Elisah chan zongah Israel ramah thinghmui tampi an um ko nain, Siria mi Naman dah ti lo cu ahohmanh thianter an si lo, tiah a ti. 28Cuticun sinagog i a ummi vialte nih cu bia cu an theih tikah an thin a hung ngai ngai, 29an tho i khua chungin lengah an nam, an khua lu tlâng i lungpang in thlak dingah an kalpi. 30An karlak in â zûk i lo diam a kal. 31Cun Galili ram khua pakhat Kapernaum ah a kal i Sabbath ni ah a cawnpiak hna. 32Nawlngei ngai i a cawnpiak hna caah an khuaruah a har. 33Cuticun sinagog ah khuachia thur thlarau a ngeimi pakhat a rak um. Thang ngaiin a ai i 34“Kanmah te kan umter ko; Nazaret Jesuh, nangmah he pehtlaihnâk zeidah kan ngeih, a kan hrawktu dingah maw na rat? Pathian Mithiang na si kha kan in hngalh,” tiah a ti. 35Sihmanhsehlaw Jesuh nih a sik i, “Dai tein um law, a chungin chuak,” tiah a ti. Khuachia nih an lakah a hlawnh ta i fahnâk tu pe loin a chuak. 36An dihlak in mak an ti ngai ngai, “Hihi zeibiadah a si? Nawlngeihnâk le ṭhawnnâk in thlarau thur nawl a pêk hna i an chuak thluahmah ko,” tiah an i ceih. 37A thawngpang cu cu ram le pawngkam vialte ah a thang. 38Cun sinagog in a tho i Simon innah a lut. Simon nupi nu cu taklin ngaiin a zaw, amah kongah an rak nawl. 39A pawngah ava dir i a taklinh kha a sik i a taklin cu a dai cawlh. A tho zau i rawl a chuanpiak hna. 40Zanlei nitlâk lai ah, zawtnâk phunkip in a zawmi kha an ratpi hna i an dihlak cungah a kut a chuan i a damter hna. 41Khuachia zong nih, “Krih Pathian Fapa cu na si!” tiah an au i mitampi chungin an chuak. A sik hna i biachim zong a sianh hna lo, zeitintiah amah cu Krih a si kha an hngalh. 42Thaizing khua a dei tikah a chuahtâk hna i hnathiannâk hmunah a kal. Mizapi nih an kawl i asin an phâk tikah, anmah kaltâk ti lo dingin tlaihbawh an timh, 43asinain an sinah, “Khua dang zongah Pathian pennâk kong hi ka chim awk a si, hi thil ruang i thlahmi ka si,” tiah a ti. 44Cun Galili ram i sinagog kipah phung a chimh thluahmah hna.
اکنون انتخاب شده:
LUKA 4: HAKABSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
