ACT 7
7
1Tlângbawi nganbik nih, “Hihi a dik maw?” tiah a ti. 2Anih nih, “U le nau le pa le hna, ngaihmanh u: Kan pa Abraham cu Haran khua a um hlan i Mesapotamia ram i a um lio ah, sunparnâk Pathian kha a sinah â lang i 3a sinah, “Na ram le na rualchan kha kaltâk hna law ram kan hmuhsak laimi leiah kal,” tiah a ti. 4Cuticun Khaldia mi hna ram kha chuahtâk in Haran khua ah khua a sa. Cun a pa a thih hnuah, cuka cun atu i nan umnâk ramah Amah nih a pêmter. 5Pathian nih ro zeihmanh a pe lo, a ke chiahnâk khim hmanh a pe lo. Asinain fa a ngeih hlan hmanh in amah le a techin fapar tiang i an co hngami pe dingin bia a kamh. 6Pathian nih hitihin a chim, a tefa hna cu mi ramah kum zali khual an si lai i cu cân ah serhsatnâk tuar in sal ah an tâng lai. 7Pathian nih sal i an tannâk ding miphun cu keimah nih ka ruah lai, cu hnu ah an chuak lai i hi hmun ah hin ka rian an ṭuan lai. 8Amah nih a sinah cuarpar tannâk bia kha a kamh. Abraham nih Isak a hrin i niriat ni ah a cuarpar a tan. Isak nih Jacob a hrin i Jakob nih hringtu hleihnih kha a hrin hna. 9Hringtu hna nih Josef kha an hnahchuah i Izip ramah an zuar. Asinain a sinah Pathian a um i 10a harnâk vialte chungin a khamh i Izip siangpahrang Faraw hmai ah fimnâk le duhpiaknâk a pêk. Cun Izip mi vialte le a inchung mi vialte uktu ah a canter. 11Cun Izip le Kanan ram vialte ah mangṭam le harnâk nganpi a tlung i kan pu le nih ei awk an ngei ti lo. 12Asinain Jakob nih Izip ramah buh a um ti a theih tikah kan pu le cu a thlah hmasa hna. 13Cun a voi hnihnâk an va kal ah khan Josef nih a unau sinah â hngalhter i Josef chungkhar kha Faraw zong nih a rak hngalh hna. 14Josef nih a pa Jakob le a chungkhar vialte a auh hna i mi 75 an si. 15Cuticun Jakob cu Izip ramah a pêm i cuka ah amah le kan pu le kha an thi. 16Sekem khua ah an rak zawnh hna i Abraham nih Sekem fapa Hamon fale hna sin i phaisa in a cawkmi hmun ah an chiah hna. 17Asinain Pathian nih Abraham sin i bia a kamhmi a tlin cân a naih tikah, Izip ramah kan mi le cu an karh ngaingai. 18Josef a hngal lomi siangpahrang a chuah tiang khan an karh cuahmah ko. 19Cupa nih kan phunhawi kha diriam ngai in a serhsat hna i an lamhchih hna, an fale cu nung kho lo dingin an hlawnh hna. 20Cu cân ah Moses a rak chuak i Pathian duhmi a si i a pa innah thlathum tiang an zohkhenh. 21Lêng i an chuah tikah Faraw fanu nih a rak char i amah fa bantukin a cawm. 22Moses nih Izip fimnâk vialte a cawn dih i bia le tuahsernâk ah a min a thang ngai ngai. 23Kum 40 a tlin tikah, a unau Israel fa le kha vehvat duhnâk lungput a ngei. 24An lakah mi pakhat ningcang lo i an tuar termi a hmuh tikah, a kilvennâk ah serhsattu cu teirul cham in Izip pa cu a thah. 25Zeitintiah a kut in Pathian nih a khamh tiah a unau nih an theithiam lai tiah a ruah, asinain an theithiam lo. 26A thaizing ah an lak i mi pahnih â sualmi hna ṭhen dingin a va panh hna i, “Minung hna unau nan si khah. Zeiruangahdah nanmah le nanmah fahnâk pêk nan i timh?” tiah a ti hna. 27Asinain a inpa sin i fahnâk tuah a timtu pa nih a nam i, “Kan cungah uktu le biaceihtu ah ahonihdah an ser? 28Nizan i Izip pa na thah bang khan thah nakan duh maw?” tiah a ti. 29Cu bia ruangah Moses cu Midian ramah a zâm i fa pahnih a ngeih tiangin cuka ah a um. 30Kum 40 a liam hnuah Sinai tlâng ramcar ah burbuk a alhmi in Bawipa vancungmi a sinah â lang, 31Moses nih cucu a hmuh tikah mak a ti ngaingai i zohfiang ding i a va panh lioah Bawipa aw a sinah a phân. 32‘Keimah cu na pupa hna Pathian - Abraham Pathian, Isak Pathian, Jakob Pathian’ Ka si, tiah a ti. Cun Moses cu a therh i a zoh ngam lo. 33Bawipa nih, “Na kedan kha i phoih; zeitintiah na dirnâk vawlei kha hmunthiang a si. 34Izip ram i ka mi le hna harnâk ka hmuh ko, an hrum ai zong ka theih, anmah khamhtu dingah ka ra. Ngaihmanh, Izip ramah kan thlah lai,” tiah a ti. 35“Moses, ‘uktu le biaceihtu ah ahonihdah an ser’ tiah an hlawtmi cu, burbuk i vanmi a sin i â langmi nih khan a bomh i amah cu uktu le khamhtu dingah Pathian nih a thlah. 36Izip ram le, Rihli sen le, Ramcar hna ah kum 40 chung khuaruahhar thil le hmelchunhnâk hna a hmuhter hnuah, anmah kha a hruai hna. 37“Hihi Moses nih Israel tefa hna sin i a chimmi cu a si. BAWIPA nan Pathian nih keimah bantuk profet pakhat nan unau hna chungin a chuahter te lai, amah bia cu nan rak ngaih lai. 38“Amah hi a si, ramcar i â pummi hna lak i a rak ummi, Sinai tlâng i vanmi nih a chawnhmi, kan pu le hna sin i bia chimtu le kan sin i pêkding bia nung rak hmutu kha, 39hringtu hna nih a bia an ngaih duh lo i an hlawt. An lungthin nih Izip ram lei a hawih, 40Âron sinah, ‘a kan hruaitu dingah pathian kan tuahpiak ko; hi Moses Izip ram in a kan chuahpitu hi a thawng kan thei ti ṭung lo,’ tiah an ti. 41Cu cân ah cawtum lem an ser, milem hmaiah rai an thawi i ankut in an serchawmmi cungah an i lawm. 42Cuticun Pathian nih a mertâk hna i van i arfi an biak khawh nâkhnga annih cu hnulei a chit hna. Profet hna ca-uk ah, ‘Ramcar ah kum 40 chungin raithawinâk sa that in nanka pêk maw, maw Israel chungkhar hna? 43Molok biakthlâm nan ser i nan pathian Refan arfi lem biaknâk i nan sermi hna cu; Cucaah Babilon khua pinlei ah kan kalpi hna lai,” tiah an rak ṭial bang khan. 44Moses sinah tuah awk i muisam a langhter bang khan kan pu le nih ramcar ah theihpitu puanthlâm kha an rak ngei. 45Cu puanthlâm cu kan pu le nih an i kalpi peng i Pathian nih kan pu le hmai i Gentel a ṭhawlmi hna nâk ram i an um lioah Joshua le a mi le hna nih an umpi hna i David chan tiangin cuka ah an um. 46David nih Pathian duhpiaknâk a hmuh i Jakob Pathian caah umnâk tuahpiak a timh. 47Asinain Solomon nih a inn cu a sakpiak. 48“Sihmanhsehlaw Cungnungbik cu kut i sakmi ṭempal ah khua a sa bal lo: Profet nih: 49‘Van khi ka ṭhutdan a si i lei hi ka ke chiahnâk a si. Zeibantuk inn dah nan ka sakpiak lai? BAWIPA nih a ti. Kâ dinhnâk hmun zong zeidah a si? 50Keimah kut in thil vialte hi ka ser hna lo maw? a ti,’ timi bang khan. 51“Mi lungkhong, lungthin le hnakhaw cuarpar tan lomi hna! Thiang Thlarau hi nan ralchanh zungzal ko lai maw; nan pupa hna tuah bantukin nan tuah ve a si hih. 52Nan pupa hna nih an sersat lomi profet an um maw? A ra dingmi Mifel kong chimchungtu kha an thah hna, nannih hi cu Mifel tlaitu le thattu nan si, 53Nawlbia, vanmi hna pêkmi a hmu i a zul lomi hna,” tiah a ti. 54Cu bia an theih tikah an lungthin fei chunh bantuk a si i Steven cu an hacang an rial hnawh. 55Asinain a nih cu Thiang Thlarau in a khatmi a si i van lei a zoh peng, Pathian sunparnâk le Pathian orhlei ah Jesuh a dir kha a hmuh; 56“Zohhmanh u, van â ongmi ka hmuh i Pathian orhlei i Mi Fapa dir zong ka hmuh! tiah a ti. 57Annih cu thang ngaiin an au, an hna an phih i amah cu an namchih. 58Khuapi lengah an hnuh i lungin an cheh. Cu thil hngalhpitu hna nih tlangval pakhat a min Saul kehramah an puan kha an chiah. 59Steven nih, “Bawipa Jesuh ka thlarau rak cohlang ko, tiah Pathian a auh lioah lungin an cheh. 60Cuticun a khuk â bil i aw thang ngaiin, “Bawipa hi sualnâk mawh hi an cungah tlunter hlah,” tiah a ti. Cu bia a chim dihin â hngilh.
اکنون انتخاب شده:
ACT 7: HAKABSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
