ACT 6
6
1Cu cân i zultu an hun karh lengmang lioah, nichiarte thil an i phawtnâk kongah an nuhmei zei i an rel hna lo ruangah Grik holh a hmangmi Judah mi kha an phunsaih hna. 2Cuticun hleihnih hna nih zultu vialte an kawh hna i, “Pathian bia chim chia tain cabuai i rian kan ṭuan ahcun a ṭha lai lo. 3Cucaah ule nau hna, nan lakah mi pasarih, mi thangṭhatmi, Thiang thlarau le fimnâk i a khatmi thim hna ulaw, cu hna cu hi thil tawlreltu ah kan ruah hna lai. 4Kannih tu cu thlacam le phungchim ah kan i pe peng ko lai,” tiah an ti. 5An chimmi nih mi vialte an lung a lomhter, cuticun mi an thim hna; cu hna cu; zumhnâk le Thiang thlarau in a khatmi Steven, Filip, Prokhoras, Nikanor, Timon, Parmenas le Antiok khua mi Nikolas Judah phung zulmi an si. 6Cu hna cu lamkaltu hmaiah an dirter hna i annih nih an cungah kut chuangin thla an camh hna. 7Pathian bia cu a karh chin lengmang; Jerusalem khua ah zultu an karh chin leng mang i tlângbawi lak zongah mi tampi nih zumhnâk kha an pom. 8Steven zumhnâk le thiltikhawhnâk in a khatmi nih khuaruahharnâk nganpi le hmelchunhnâk kha zapi hmai ah a tuah tawn. 9Asinain salchuak mi hna Sinagog timi i â pummi (Sairinmi hna le Alexandria mi hna le, Silisiami le Asia mi ) cheukhat hna nih Steven kha an rak al. 10A fimnâk le amah chimpitu Thlarau kha an tei kho lo. 11Moses le Pathian a thangchiat kha kan theih, tiah sual puhtu ding a thli tein zik an nawh hna. 12Cun zatlâng le, upa hna le nawlbiacawnpiaktu an forh hna i an tlaih i biaceihtu hna sinah an kalpi. 13Lih chimmi theihpitu kha an i ser i, “Hi pa nih hin hi in thiang le nawlbia ralchanh in bia a chim lengmang, 14zeitintiah Nazaret Jesuh an timi nih hi in hi a hrawh lai i Moses nih nawlbia a kan pekmi zong a thlen dih lai tiah a chimmi kan theih,” tiah an ti. 15Biaceihnâk i a ṭhumi vialte nih Steven cu cat loin an zoh peng i a hmai kha vanmi hmai bantukin an hmuh.
اکنون انتخاب شده:
ACT 6: HAKABSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
