馬可 8

給四千人食飽

(馬太 15:32-39)

1過無幾久，另外一大群人聚集共下。佢等無麼介好食；耶穌喊學生來，對佢等講： 2「𠊎代這群人盡擔心，因為佢等同𠊎共下已經三日，這下無東西好食囉。 3若係𠊎喊佢等餓肚笥轉去，佢等在路上會餓到半生死，因為佢等有兜係對盡遠來个。」

4厥學生就問佢講：「在這偏僻个所在，𠊎等愛去㖠位尋恁多个食物給這兜人食飽呢？」

5耶穌問佢等講：「你等有幾多餅？」

佢等應講：「七隻。」

6耶穌吩咐眾人坐在地上，然後拿起該七隻餅仔，感謝上帝後，就擘開，交給學生，喊佢等傳給大家；學生就分給眾人。 7佢等也有幾尾細魚仔；耶穌獻上感謝，吩咐學生也分給大家。 8大家全部食到飽。學生拈食賸个碎仔，裝滿七隻籃仔。 9該兜人大約有四千儕。耶穌就喊眾人散開， 10黏時㧯學生上船，去大瑪努他个地方。

要求神蹟

(馬太 16:1-4)

11有兜法利賽人來見耶穌，㧯佢辯論。佢等想愛害佢，就要求佢行一個神蹟，來證明佢所做个係對上帝來个。 12耶穌深深透一口大氣講：「這世代个人樣般愛要求神蹟呢？𠊎實在㧯你等講，無麼介神蹟好給這世代个人看！」

13佢就離開佢等，又上船過去湖个對面。

法利賽人㧯希律个發酵

(馬太 16:5-12)

14學生毋記得帶加兜餅仔，船頂只有賸一隻餅仔，無別个食物。 15耶穌警告佢等講：「你等愛細膩，愛提防法利賽人个發酵㧯希律个發酵。」

16佢等彼此暗中議論講：「佢講這個話，怕係因為𠊎等無加帶餅仔。」

17耶穌知佢等所講个，就對佢等講：「你等樣般討論無餅仔這件事呢？敢講你等還吂了解，還無明白係麼？你等个頭腦敢恁鈍？ 18你等有目珠，敢看毋到？有耳公，敢聽毋到？你等敢毋記得去了？ 19𠊎擘開五隻餅仔分給五千人食个時，你等將食賸个碎仔裝滿幾多籃仔？」

佢等應講：「十二籃。」

20耶穌又問講：「𠊎擘開七隻餅仔分給四千人食个時，你等又裝滿幾多籃仔？」

佢等應講：「七籃。」

21然後，耶穌講：「恁樣，你等還毋會明白係麼？」

醫好伯賽大瞙目个人

22佢等來到伯賽大，有人帶一個瞙目个到耶穌面前來，要求耶穌摸佢。 23耶穌牽瞙目个手，帶佢到村莊外背去，呸口潾在佢个目珠項，然後按手在佢个身上，問佢講：「你有看到東西麼？」

24佢昂頭來看，講：「𠊎有看到人；佢等像樹仔，行來行去。」

25耶穌又用手摸佢个目珠。該瞙目个擘開目珠來看，就完全恢復，逐樣東西看到清清楚楚。 26耶穌喊佢轉去，又吩咐佢講：「連這村莊也毋好再入去。」

彼得認耶穌係基督

(馬太 16:13-20；路加 9:18-21)

27耶穌㧯學生去凱撒利亞‧腓立比附近个村莊。在路上，佢問佢等講：「一般人講𠊎係麼人？」

28佢等應講：「有兜講你係施洗約翰；有兜講你係以利亞；也有兜講你係先知中个一個。」

29耶穌又問佢等講：「你等呢？你等講𠊎係麼人？」

彼得講：「你就係基督。」

30然後，耶穌警告佢等，一定毋好對別人講佢个身份。

耶穌預言自家个死㧯復活

(馬太 16:21-28；路加 9:22-27)

31耶穌就開始教示學生，人子一定愛受盡多个苦難；佢會被長老、祭司長㧯經學教師棄絕，也會被人殺害，總係第三日佢會復活。 32佢將這兜事講到清清楚楚。彼得就拉等耶穌，開始勸佢。 33耶穌轉身，看等學生，責備彼得講：「撒但，閃開！你个想法毋係對上帝來个，係人个想法。」

34然後，耶穌喊眾人㧯學生到佢面前來，㧯佢等講：「想愛跈𠊎个人，就愛放掉自家，擎起佢个十字架來跈𠊎。 35因為想愛救自家生命个人，反轉會喪失生命；為到𠊎㧯𠊎个福音喪失生命个人，反轉會得到生命。 36人若係賺到全世界，總係喪失自家个生命，有麼介路用呢？當然無！ 37佢愛拿麼介來換自家个生命呢？ 38對這淫亂㧯邪惡个世代，無論麼人，因為𠊎㧯𠊎个教訓感覺見笑，人子在厥爸个榮光中，同佢个聖天使共下降臨該時，也愛看佢做見笑个人。」

اکنون انتخاب شده:

馬可 8: THV12Hdb

های‌لایت

کپی

مقایسه

به اشتراک گذاشتن