馬可 7
7
祖先个傳統
(馬太 15:1-9)
1法利賽人㧯幾個對耶路撒冷來个經學教師共下來見耶穌。 2佢等看到耶穌个學生中有人用無淨浰个手食飯，無像法利賽人恁樣先洗手。
3(原來法利賽人㧯一般个猶太人全部遵守祖先个傳統，若係無照規定个方法先洗手就毋食飯； 4對街路買來个東西，若無先洗過也毋食 #7:4 「對街路…毋食」抑係譯做「佢等對街路轉來，若無先洗好勢，就毋食麼介東西」。。佢等還遵守盡多其他傳統个規定，像愛樣般洗杯仔、鑊仔、銅器㧯眠床 #7:4 有兜古卷無「㧯眠床」。等等。)
5所以法利賽人㧯經學教師問耶穌講：「樣般你个學生無遵守𠊎等祖先个傳統，反轉用無淨浰个手食飯呢？」
6耶穌講：「以賽亞指你等這種假冒為善个人所講个預言實在無毋著！像聖經所記：
上帝恁樣講：
『這兜人用嘴唇皮尊敬𠊎，
總係佢等个心遠遠離開𠊎。
7佢等將人个規定準做𠊎个命令來教人；
佢等敬拜𠊎也係空空。』」
8耶穌講：「你等遵守古早人个傳統，總係違反上帝个命令。」
9佢又講：「你等用盡高明个藉口來拒絕上帝个命令，目的就係愛保守自家个傳統。 10摩西講：『愛孝敬爺𡟓』；又講：『咒罵爺𡟓个，愛判佢死刑。』 11你等偏偏講，無論麼人對爺𡟓講：『𠊎將奉養你等个東西準做可板』 (意思係獻給上帝个東西)， 12佢就毋使奉養爺𡟓。 13你等恁樣做，就係拿你等教人个傳統來廢掉上帝个話。你等還做盡多像這種个事。」
使人無淨浰个東西
(馬太 15:10-20)
14耶穌又召集眾人到佢面前，對佢等講：「你等大家愛聽𠊎个話，也愛明白。 15對外背入到人底背个，毋會使人無淨浰；反轉，對底背出來个正會使人無淨浰。#7:15 有兜古卷加 16 節：「有耳公好聽个人，就愛聽！」」
17耶穌離開眾人入去屋肚个時，厥學生問佢這比喻个意思。 18耶穌㧯佢等講：「你等同佢等共樣無明白嗎？敢講你等毋知？對外背入去个毋會使人無淨浰； 19因為對外背入去个毋係到佢个心中，係到佢个腸肚底背，然後就屙出來。」 (耶穌講這個話，意思係講一切食物全部係淨浰个。)
20佢繼續講：「使人無淨浰个係對人底背出來个。 21因為對人心中出來个，有種種个惡念；這兜惡念會使佢犯通姦、偷拿、兇殺、姦淫、 22貪心、邪惡、詭詐、放蕩、嫉妒、譭謗、驕傲、癲狂等罪惡。 23這一切个邪惡全部係對人底背出來，也正經會使人無淨浰个。」
一個外邦婦人家个信心
(馬太 15:21-28)
24耶穌離開該所在，到泰爾城附近个地方去。佢住在一個人家，無愛俾人知，總係囥毋住。 25有一個婦人家，姖个妹仔被邪靈附身。姖聽到耶穌个事，即時來見佢，跪在佢个腳前。 26這婦人家係一個外國人，在敘利亞个腓尼基出世个。姖求耶穌將厥妹仔身上个鬼逐出去。 27耶穌對姖講：「愛給子女先食飽；拿子女食个餅仔㧒給狗仔食係毋著个。」
28該婦人家應講：「主啊，無毋著，總係桌底下个狗仔乜食子女所賸个餅碎仔啊！」
29耶穌對姖講：「憑這句話，你好轉去了；鬼已經對若妹仔身上出去了！」
30該婦人家就轉屋下，看到妹仔睡在眠床頂；鬼已經離開姖。
耶穌醫好一個聾啞个人
31耶穌離開泰爾附近个地方，經過西頓，對十邑轉到加利利湖。 32有人將一個又聾又啞个人帶到耶穌面前來，求耶穌為佢按手。 33耶穌帶佢離開人群，到堘頭去，用自家个手指探佢个耳公，又用口潾膏佢个舌乸。 34耶穌昂頭望天，深深透一口大氣，對該人講：「爾發大！」意思就係「打開來！」
35該人个耳公就打開來，舌乸筋也襛下來，佢就開口講話，全無困難。 36耶穌吩咐大家千萬毋好對人講起這項事；總係佢越吩咐，佢等就越宣傳。 37所有聽到个人全部十分奇怪；佢等講：「佢逐樣事情全部做到恁好！佢甚至使耳聾个聽到，使啞仔講話！」
اکنون انتخاب شده:
馬可 7: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
