瑪拉基書 2
2
1上主 — 萬軍个元帥對該兜祭司講：「這係給你等个命令： 2你等一定愛用行為尊敬𠊎。你等毋聽從，也毋將命令放在心肚，𠊎就使咒詛臨到你等身上，將你等个福份 #2:2 「福份」抑係譯做「祝福」。變做咒詛；事實上，𠊎已經咒詛了，因為你等毋看重𠊎个命令。 3看啊！𠊎愛責罰你等个子女，將你等在節期中所獻頭牲腸肚个屎，膏你等个面；人愛將你等㧯屎共下㧒掉。 4該時，你等就會知，𠊎識給你等這個誡命；恁樣，𠊎㧯利未後代个祭司所立个約就永遠有效。𠊎 — 上主、萬軍个元帥恁樣宣佈了。
5「在𠊎个約底背，𠊎識答應賜給佢等生命㧯平安。𠊎將這兜給佢等个目的，係愛佢等尊敬𠊎。以前佢等確實尊敬𠊎，敬畏𠊎个名。 6佢等傳講真理，毋講不義个話。佢等㧯𠊎共下行平安正直个路，也使盡多人離開罪惡。 7祭司个嘴愛保存有關𠊎个真智識；人民愛對佢等个口中尋求𠊎个教示，因為佢等係𠊎 — 上主、萬軍元帥个使者。
8「總係，你這兜祭司已經離開正道；你等个教導害盡多人跌倒；你等廢掉𠊎㧯利未所立个約。 9所以，𠊎愛使你等俾眾人藐視，看做下賤；因為你等毋遵行𠊎个道，又在執行法律个時節，看情面、有私心。」這係上主 — 萬軍个元帥所講个。
人民對上帝無忠心
10𠊎等敢毋係共一個阿爸嗎？毋係共一個上帝造𠊎等嗎？𠊎等當中做麼介毋互相守信用？做麼介藐視上帝㧯𠊎等祖先所立个約？ 11猶大人無忠心，在全國㧯耶路撒冷做一項邪惡个事；因為猶大人打垃圾上主所愛个聖殿，將拜外邦神明个女子討來做𡜵娘。 12所有做這事个人，無論麼人，就算獻禮物給上主 — 萬軍个元帥，願上主從雅各个後代中將佢除掉，使佢永遠做毋得向上主獻祭。
13你等又做另外一項事：你等用噭㧯歎息遮蓋上主个祭壇；因為上主無再看重禮物，也毋接納你等手所獻个。 14你等還問：「樣會恁樣？」因為，你㧯後生時所討个𡜵娘，上主係證婚人。若𡜵娘係佢配給你个伴，你又發誓愛對姖忠心，總係你無照恁樣做。 15上帝毋係使你㧯姖成做一體嗎？#2:15 「上帝…嗎？」：希伯來文个意思無清楚。上帝恁樣做係愛你等有虔誠个後代。所以你等愛謹慎你等个心，毋好對你等後生時所討个𡜵娘無忠心。 16上主 — 以色列个上帝講：「休妻㧯用強暴對待𡜵娘个人係𠊎當恨个！所以愛謹慎你等个心，毋好做人無忠心。」這係上主 — 萬軍个元帥所講个。
審判个日仔會到了
17你等所講个話，上主聽到盡煩！你等還問：「𠊎等做麼介事俾佢恁煩呢？」就係因為你等講：「上主將所有做壞事个人全部準做好人；佢歡喜佢等。」抑係因為你等講：「公義个上帝在㖠位？」
اکنون انتخاب شده:
瑪拉基書 2: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012