瑪拉基書 3
3
1上主 — 萬軍个元帥講：「看啊，𠊎愛派𠊎个使者為𠊎預備道路。然後你等所尋个主會忽然間來到佢个聖殿；看啊，你等所渴慕立約个使者，佢會來了！」
2總係，佢來个日仔，麼人奈得何呢？佢出現个時節，麼人企得在呢？因為佢像鹼當重个茶籸，像煉金用个火。 3佢愛來審判，像煉銀仔个人；佢愛潔淨利未後代个祭司，煉淨佢等像煉金銀；恁樣佢等就會知向上主獻合適个祭物。 4該時，猶大㧯耶路撒冷人民所獻个祭物，正會得上主个歡喜，就像頭擺个年日一樣。
5上主 — 萬軍个元帥講：「𠊎愛到你等該位去，執行審判。𠊎愛遽遽做證，來告該兜行邪術个、犯姦淫个、做假見證个、剝削工錢个、欺負孤兒寡婦个、冤枉外族人个，㧯所有無敬畏𠊎个人。」
十分之一奉獻
6「因為𠊎係上主，𠊎永遠無改變；所以，雅各个子孫啊，你等還吂完全消滅。 7㧯你等个祖先共樣，你等常常偏離𠊎个法律，無愛遵守。𠊎 — 上主、萬軍个元帥講：你等愛轉向𠊎，𠊎就轉向你等。你等反轉問：『𠊎等愛樣般做正算轉向你呢？』 8𠊎問你等：人做得騙上帝麼？當然做毋得！總係你等騙𠊎！你等問講：『𠊎等樣般騙你呢？』𠊎講：就係在應該納个十分之一，㧯應該獻个祭物上騙𠊎。 9咒詛會臨到你等，因為你等全國个人民攏總騙𠊎。 10你等愛將十分之一全數送入𠊎个倉庫，使聖殿 — 𠊎个屋下有豐富个糧食。𠊎係上主 — 萬軍个元帥；試看𠊎啊！𠊎係毋係會將天頂个窗門為你等打開來，將各樣个福份豐豐富富倒給你等。 11𠊎 — 上主、萬軍个元帥毋俾害蟲毀壞你等个農作物。你等个葡萄園會結滿葡萄。 12該時，萬國个人會講你等係有福氣个，因為你等个土地會成做安居樂業个地方。」這係上主 — 萬軍个元帥所講个。
上帝應許施行憐憫
13上主講：「你等講魯夫話堵𠊎。你等還問：『𠊎等講麼介話堵你呢？』 14你等講：『事奉上帝係無意無思个。𠊎等遵行佢所吩咐个，抑係在上主 — 萬軍个元帥面前表示哀傷，有麼介用呢？ 15這下照𠊎等看，驕傲个人有福氣，作惡个人興旺；雖然佢等試探上帝，還係毋使堵到災難。』」
16該時，敬畏上主个人共下談論；上主也認真聽佢等个話。在佢面前有一卷紀念冊，登記敬畏上主㧯尊重上主聖名个人。 17上主 — 萬軍个元帥講：「在𠊎所定个日仔，佢等愛屬𠊎，做𠊎寶貝个子民。𠊎愛痛惜佢等，像阿爸痛惜該服事佢个孻仔。 18該時，你等會再一擺看出，義人㧯壞人中間有麼介無共樣，服事𠊎㧯無服事𠊎个人有麼介差別。」
اکنون انتخاب شده:
瑪拉基書 3: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012