創世記 39
39
約瑟㧯波提乏个𡜵娘
1 以實瑪利人將約瑟帶到埃及，賣給埃及王个一個官員 — 侍衛長波提乏。 2上主㧯約瑟共下，使佢事事順利。佢住在埃及主人屋下。 3主人看出上主㧯佢共下、俾佢所做个事全部順利。 4波提乏中意約瑟，派佢做自家个管家，管理家務㧯佢所有个一切。 5對該時開始，因為約瑟个緣故，上主就賜福給該埃及人个屋下；厥屋肚㧯田園所有个，全部得到上主个賜福。 6波提乏將一切所有个交給約瑟管理；除了佢自家个飲食以外，佢麼介都毋使插。
約瑟身體當紮，又盡緣投。 7過無幾久，主人个𡜵娘中意到約瑟，引誘佢講：「來㧯𠊎睡！」 8約瑟拒絕姖，對姖講：「你看，因為有𠊎在這位，吾頭家毋使為家務操心；佢已經將所有个一切交給𠊎管理。 9在這屋下，無人比𠊎較大，頭家無麼介無交給𠊎管理，只有你例外，因為你係佢个𡜵娘。𠊎樣般敢做這種無道德个事，來得罪上帝呢？」 10雖然頭家娘日日引誘約瑟，總係約瑟毋聽從，毋肯㧯姖共下睡，盡量閃開。
11有一日，約瑟到屋肚辦事，該時屋肚無半個僕人。 12頭家娘揪等約瑟个外衫講：「來㧯𠊎睡！」約瑟將外衫留在頭家娘手中，遽遽走到外背去。 13頭家娘看到約瑟个外衫留在厥手中，又看到佢走到外背去， 14就大聲喊家僕來，對佢等講：「你等看，吾老公帶轉來个希伯來人侮辱𠊎等！佢入𠊎个間肚，想愛㧯𠊎睡，𠊎就大聲喊。 15佢聽到𠊎大聲喊，就將外衫留在𠊎身邊，遽遽走出去。」
16頭家娘留等約瑟个外衫，等到約瑟个主人轉屋下， 17姖就投厥老公這件事：「你帶轉來該希伯來奴僕入𠊎房間愛侮辱𠊎。 18𠊎大聲喊，佢就將外衫留在𠊎身邊，遽遽走出去。」
19 約瑟个主人聽到𡜵娘講「你該奴僕恁樣侮辱𠊎」這個話，佢就大發譴， 20將約瑟捉起來，關到王室个監獄；約瑟就在該位坐監。 21總係上主㧯約瑟共下，賜福給佢；所以監獄長盡歡喜佢， 22派佢管理所有个犯人，負責處理監獄肚个事務。 23約瑟負責辦理个事，監獄長毋使操心，因為上主㧯約瑟共下，俾佢管理个一切盡順利。
اکنون انتخاب شده:
創世記 39: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012