創世記 38
38
猶大㧯塔瑪
1大約在該時，猶大離開佢該兜兄弟，去㧯一個亞杜蘭人希拉共下住。 2猶大在該位堵到迦南人書亞个妹仔，就討姖做𡜵娘，㧯姖同房。 3厥𡜵娘有身項，𫱔一個孻仔；猶大㧯佢安名珥。 4姖又有身項，𫱔第二個孻仔，安名俄南。 5姖又𫱔第三個孻仔，安名示拉；示拉出世个時，猶大在基悉。
6 猶大為佢个長子珥討𡜵娘，姖安到塔瑪。 7珥个行為邪惡，得罪上主，上主就除掉佢个性命。 8猶大對珥个老弟俄南講：「你去㧯若大嫂同房，對姖盡你做細叔个義務，好代若哥留種。」 9俄南知就算𫱔到孻仔也毋係屬自家个，所以逐擺㧯厥大嫂同房，就佻佻洩精在地泥，毋俾厥哥留種。 10佢這個行為得罪上主，上主也除掉佢个性命。 11猶大對厥心舅塔瑪講：「你轉去外家守寡，等吾孻仔示拉長大成人。」佢講這話，因為驚怕示拉會像佢兩個阿哥恁樣死掉。塔瑪就轉外家去。
12過一站時間，猶大个𡜵娘書亞个妹仔死掉。喪期過後，猶大㧯厥朋友亞杜蘭人希拉共下去亭拿，到為佢剪羊毛該兜人該位。 13有人㧯塔瑪講：「若家官堵堵去亭拿剪羊毛。」 14姖就脫掉守寡个衫，用面帕幪面，坐在愛去亭拿路上个伊拿印城門口；因為姖知猶大个滿子示拉已經長大成人，總係還係無來討姖做𡜵娘。
15 猶大看到姖，恅到係妓女，因為姖幪等面。 16猶大毋知姖就係自家个心舅，行到路堘姖該位去，問姖：「來啊！𠊎㧯你睡好麼？」
姖講：「你㧯𠊎睡愛給𠊎麼介？」
17佢應講：「𠊎對羊群中拿一隻細山羊給你。」
塔瑪講：「送山羊以前，你愛留東西給𠊎做抵押。」
18佢問：「你愛𠊎麼介東西做抵押？」
塔瑪講：「你个印仔、連印帶仔，㧯若手杖。」猶大就將這兜東西交給姖，㧯姖共下睡；塔瑪就有身項了。 19塔瑪轉外家去，拿掉幪面个面帕，照常著守寡个衫。
20 猶大託厥朋友希拉送一隻細山羊去給該婦人家，愛贖轉做抵押个東西，總係希拉尋毋到姖。 21希拉問伊拿印地方个人：「以前在這路堘該宮廟妓女㖠位去了？」
佢等應講：「這地方從來毋識有宮廟妓女。」
22 希拉轉到猶大該位，對佢講：「𠊎尋毋到姖。當地个人乜講，這位從來毋識有宮廟妓女。」
23 猶大講：「該兜東西給姖算了，免得𠊎等被人笑。𠊎有意送姖這隻細山羊，總係你卻尋毋到姖。」
24大約過三隻月，有人㧯猶大講：「若心舅塔瑪犯姦淫，已經有身項了。」
猶大發譴講：「拉出來，燒俾姖死！」
25 塔瑪被人拉出來个時，託人㧯厥家官講：「𠊎係對這兜東西个主人有身項；你認一下這印仔、印帶仔，㧯手杖；這兜東西係麼人个？」
26 猶大認到這兜東西，就講：「姖比𠊎較著。𠊎無盡到義務；𠊎本來應該喊𠊎个滿子示拉㧯姖結婚。」該時以後，猶大毋識再㧯姖同房。
27 塔瑪愛𫱔个時，正知姖所懷个係雙胞胎。 28姖𫱔个時，一個孲𤘅仔伸出一隻手來；產婆將這隻手䌈一條紅線，講：「這個係先出世个。」 29總係孲𤘅个手又跔轉去，厥哥卻先𫱔出來；產婆講：「你就係恁樣搶等出來个！」就㧯佢安名法勒斯#38:29 「法勒斯」意思係「沖破」抑係「搶出來」。。 30接等厥老弟𫱔出來，手項䌈等紅線，就㧯佢安名謝拉#38:30 「謝拉」有「紅色」个意思。。
اکنون انتخاب شده:
創世記 38: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012