創世記 37
37
約瑟㧯厥兄弟
1 雅各繼續住在厥爸做旅客住過个迦南地區。 2以下記載雅各全家个事。
約瑟十七歲个時就常常跈佢該兜阿哥出去掌羊仔。佢常常幫助厥爸个細姐辟拉㧯悉帕該兜孻仔掌羊仔；佢也常常㧯厥爸報告該兜阿哥所做个壞事。
3 以色列特別惜約瑟贏過惜其他个孻仔，因為約瑟係佢年老个時𫱔个；佢做一領花色當靚个長衫 #37:3 「花色當靚个長衫」抑係譯做「有長袖个外袍」。給約瑟。 4約瑟該兜阿哥看到阿爸特別惜約瑟，心肚盡毋甘願，就怨恨約瑟，㧯佢講話个時常常惡擎擎。
5有一擺，約瑟發一個夢，將這個夢講給該兜阿哥聽；佢等就還較怨恨佢。 6佢講：「𠊎將𠊎發个夢講給你等聽： 7𠊎等在田肚紮麥仔，𠊎紮个麥仔企嶝嶝，你等紮个麥仔攏總圍等𠊎紮个麥仔拜。」
8佢該兜阿哥問佢講：「你想愛做王管𠊎等係麼？」因為約瑟將自家个夢講給該兜阿哥聽，佢等就比頭擺還較怨恨佢。
9後來約瑟又發一個夢，佢還係㧯該兜阿哥講：「𠊎又發一個夢；𠊎看到日頭、月光㧯十一粒星仔來拜𠊎。」
10 約瑟也將這個夢㧯厥爸講；厥爸就責備佢講：「這像麼介夢呢？你想𠊎、若姆㧯若該兜阿哥全部愛來伏在地上拜你係麼？」 11約瑟該兜阿哥非常嫉妒佢，總係厥爸一直將這件事記在心肚。
約瑟被阿哥賣到埃及
12有一日，約瑟該兜阿哥到示劍去掌阿爸个羊仔。 13以色列對約瑟講：「你該兜阿哥在示劍掌羊仔。來啊，𠊎愛派你到該位去看佢等。」
約瑟應講：「好！𠊎來去！」
14厥爸吩咐佢講：「你去看你該兜阿哥有平安麼？羊群安全麼？然後轉來㧯𠊎講。」厥爸就送佢離開希伯崙山壢。
約瑟去到示劍， 15在野外迷路。有一個人堵到佢，問佢：「你尋麼介？」
16佢應講：「𠊎愛尋吾哥。請你㧯𠊎講，佢等在㖠位掌羊仔？」
17該人講：「佢等已經走了。𠊎聽到佢等講愛到多坍去。」所以約瑟去逐佢該兜阿哥，在多坍尋到佢等。
18佢等遠遠就看到約瑟。佢還吂行到以前，佢等參詳愛害死佢。 19佢等彼此講：「看啊，該隻發夢个人來囉！ 20來啊！𠊎等㓾掉佢，將屍體㧒到燥井肚，講佢係被野獸食掉；看佢个夢愛樣般實現噢！」
21 呂便聽到佢等个陰謀，當想救約瑟；佢講：「𠊎等毋好㓾佢， 22毋好流佢个血！將佢㧒落曠野个囤水窟肚就好！毋好傷害佢！」呂便恁樣講係因為佢愛對佢等个手中將約瑟救出來，將佢送轉阿爸該位去。 23約瑟一到厥哥該位，佢等就強強脫掉佢該領花色个長衫， 24將佢捉起來，㧒落囤水窟肚；該囤水窟係空个，底背無水。
25佢等坐下來食飯个時，昂頭忽然看到一群以實瑪利人个駱駝商隊對基列來，愛去埃及；佢等个駱駝載當多香料、乳香㧯沒藥。 26猶大對佢該兜兄弟講：「𠊎等㓾死自家个老弟，將佢个血囥起來有麼介好處呢？ 27𫣆等來將佢賣給這兜以實瑪利人，恁樣𫣆等毋使出手傷害佢；因為佢還係𫣆等个老弟、𫣆等个骨肉之親。」佢該兜兄弟全部贊成。 28有米甸个生理人經過个時，佢等就對窟肚將約瑟拉上來，講定二十隻銀幣，將佢賣給以實瑪利人；這兜人就將約瑟帶到埃及去。
29 呂便轉到窟个堘頭，發現約瑟毋見掉了，就盡傷心，扯爛佢个衫。 30佢轉到其他兄弟該位講：「細人仔毋見掉了！𠊎愛樣般正好呢？」
31佢等決定㓾一隻山羊牯，將約瑟該領花色个長衫染兜羊血， 32帶轉厥爸該位，講：「𠊎等尋到這領長衫；認一下，係若孻仔个衫麼？」
33 雅各認出，就講：「這係吾孻仔个長衫！一定係野獸食掉佢！約瑟被野獸扯爛了！」 34雅各悲傷到扯爛外衫、著麻衫，為厥孻仔哀傷盡多日。 35厥該兜子女全部來安慰佢，總係佢毋接受安慰。佢講：「𠊎就係落陰間，還會為吾孻仔悲傷！」恁樣，約瑟个阿爸就一直為佢哀傷。
36同時，該兜米甸人在埃及將約瑟賣給埃及王个一個官員 — 侍衛長波提乏。
اکنون انتخاب شده:
創世記 37: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012