出埃及記 27
27
祭壇
(出埃及記 38:1-7)
1「愛用金合歡木造祭壇。壇係四方个，長兩公尺兩公寸，闊兩公尺兩公寸，高一公尺三公寸。 2愛在壇个四角頂造突出來个角，㧯壇連做歸垤，並用銅將壇包等。 3愛造火灰盤，又造鏟仔、碗、肉叉、㧯火鼎；這兜用品全部愛用銅仔鑄造。 4愛為祭壇造一隻銅網，四角有四隻用來扛个銅圈仔。 5愛將網安在祭壇个周圍下半節，對壇底透到壇个一半恁高。 6愛用金合歡木造祭壇个槓仔，用銅包等， 7扛个時將槓仔插入兩邊个銅圈仔。 8愛用枋仔造祭壇；壇个中央係空殼个。你愛照𠊎在山頂指示个樣式造。」
聖帳篷个庭院
(出埃及記 38:9-20)
9「愛用麻紗刺个帳幔為聖帳篷做圍欄，圍一隻庭院。南片个帳幔長四十四公尺， 10用二十支有座个銅柱架起來，柱仔頂个鉤仔㧯橫杠係用銀造个。 11北片个帳幔也係恁樣，長四十四公尺，用二十支有座个銅柱架起來，柱仔頂个鉤仔㧯橫杠係用銀造个。 12西片个帳幔長二十二公尺，有十支有座个柱仔。 13在東片，庭院个門口，帳幔也係二十二公尺闊。 14門口个兩片全部愛有六公尺六公寸闊个帳幔， 15用三支有座个柱仔架起來。 16庭院門口愛有九公尺長个門簾，用麻紗㧯藍色、紫色、深紅色个肨線，用繡花个手工刺成，用四支有座个柱仔架起來。 17庭院四圍个柱仔全部愛用銀个橫杠連等，柱仔頂个鉤仔愛用銀造个，柱座用銅造个。 18庭院愛長四十四公尺，闊二十二公尺，高兩公尺兩公寸。帳幔愛用麻紗刺个，柱座用銅造个。 19聖帳篷內各樣个用品，聖帳篷㧯圍庭院所用个釘仔全部愛用銅造个。」
點燈个條例
(利未記 24:1-4)
20「愛吩咐以色列人民將最好个橄欖油拿來給你，做點燈火用，俾燈火常常𤏸等。 21亞倫㧯佢个子孫愛在聖帳篷內、約櫃前个帳幔外點𤏸燈火。這燈火愛在𠊎 — 上主面前對臨暗仔一直點到天光。以色列人民㧯佢等个子孫一定愛永遠謹守這命令。」
اکنون انتخاب شده:
出埃及記 27: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012