出埃及記 28
28
祭司个聖服
(出埃及記 39:1-7)
1「你愛使若哥亞倫㧯厥孻仔拿答、亞比戶、以利亞撒、以他瑪對以色列人當中分別出來，到你身邊做祭司來事奉𠊎。 2愛為若哥亞倫做祭司个聖服，使佢有尊嚴又派頭。 3你愛將所有𠊎給佢有技術个師傅喊來，吩咐佢等為亞倫做衫褲，俾佢分別出來做祭司來事奉𠊎。 4愛吩咐佢等做胸牌、以弗得聖服、外衫、有刺花个內袍、帽仔、腰帶。佢等愛為若哥亞倫㧯佢該兜孻仔做這兜聖服，俾佢等做祭司來事奉𠊎。 5該兜師傅愛用金線，藍色、紫色、深紅色个肨線，㧯麻紗來刺。
6「佢等愛用金線，藍色、紫色、深紅色个肨線，㧯麻紗，用幼秀个手工做以弗得聖服。 7愛在以弗得兩片攣兩條做得繫个肩帶。 8愛用共樣个材料刺一條帶仔，攣在以弗得，俾它成做歸垤。 9愛拿兩垤紅瑪瑙，在頂高刻以色列十二個孻仔个名， 10照佢等出世个順序，在逐垤寶石頂高刻六個名。 11愛喊手工好个打石師傅在兩垤寶石頂高刻以色列該兜孻仔个名，將寶石鑲在金絲圈肚， 12然後攣在以弗得个肩帶上，代表以色列十二支族。恁樣，亞倫个肩頭會帶等十二支族个名，俾𠊎 — 上主永遠記得𠊎个子民。 13愛打兩隻金絲圈， 14㧯兩條純金个鍊仔；鍊仔愛像挼好个索仔恁樣，結在金絲圈頂高。」
胸牌
(出埃及記 39:8-21)
15「愛用幼秀个手工為大祭司造一隻判斷个胸牌，就係用來推算上帝旨意个胸牌；㧯造以弗得共樣，愛用金線，藍色、紫色、深紅色个肨線，㧯麻紗攣好。 16胸牌愛做四方形个，疊做兩層，長二十二公分，闊二十二公分。 17愛在胸牌頂高鑲四行寶石：第一行愛鑲紅寶石、黃玉、㧯紅玉； 18第二行綠寶石、藍寶石、㧯鑽石； 19第三行紫玉、白瑪瑙、㧯紫晶； 20第四行水蒼玉、紅瑪瑙、㧯碧玉。這兜全部愛鑲在金絲圈頂高。 21十二垤寶石个每一垤愛刻上以色列一個孻仔个名，代表以色列十二支族。 22愛用純金造胸牌个鍊仔，像挼好个索仔。 23愛造兩隻金圈仔，安在胸牌頂高个兩頭， 24將該兩條金鍊仔穿在胸牌兩頭个圈仔肚。 25鍊仔个另外兩頭愛穿在兩隻金絲圈肚，恁樣該兜就連在以弗得頭前个肩帶頂高。 26愛造兩隻金圈仔，安在胸牌下背个兩頭，偎近以弗得个內邊。 27愛再造兩隻金圈仔，接在以弗得頭前兩條肩帶个下背，偎近攣个地方，在手工刺个帶仔頂高。 28愛用藍色个帶仔將胸牌个圈仔㧯以弗得个圈仔䌈共下，使胸牌貼在以弗得个帶仔頂高，就毋會𢫫掉。
29「亞倫進入聖所个時，愛繫等這刻有以色列十二支族名、判斷个胸牌；恁樣，𠊎 — 上主就永遠記得𠊎个子民。 30愛將烏陵㧯土明 #28:30 「烏陵㧯土明」係祭司用來確定上帝旨意个神器 (看民數記 27:21)。放在判斷个胸牌肚，俾亞倫入到𠊎 — 上主面前个時做得繫等。恁樣，亞倫在𠊎面前个時一定愛常常帶等判斷个胸牌，佢正能推算𠊎對吾子民以色列个旨意。」
祭司其他个聖服
(出埃及記 39:22-31)
31「著在以弗得底下个長衫愛完全用藍色个肨線來刺。 32長衫个中央愛為到頭那留一個孔仔做領口；周圍愛加刺領邊，正毋會裂掉。 33長衫下背个衫塍愛用藍色、紫色、深紅色个肨線刺做石榴， 34又愛用純金个細玲琅隔在石榴中間。 35亞倫執行祭司職務个時，一定愛著這長衫。當佢進入聖所，到𠊎面前抑係退出个時，𠊎就會聽到細玲琅个聲；恁樣，佢就毋會死。
36「愛用純金造一面牌仔，頂高刻等『歸上主為聖』。 37愛用藍色个帶仔將它繫在帽仔頭前。 38亞倫愛將這牌仔掛在額頭來擔當以色列人犯到聖物條例个罪。恁樣，𠊎 — 上主就會歡喜接納人民獻給𠊎所有个禮物。亞倫愛一直將這牌仔掛在額頭。
39「愛拿麻紗做亞倫个內衫，也愛用麻紗做帽仔，用有繡花个料仔做腰帶。
40「愛為亞倫該兜孻仔做內衫、腰帶、㧯帽仔，使佢等有尊嚴㧯派頭。 41愛將這兜衫褲著在若哥亞倫㧯佢該兜孻仔身項，又愛膏橄欖油，授聖職給佢等，設立佢等做祭司事奉𠊎。 42愛用麻紗做褲給佢等著；褲愛對腰間到膝頭，遮等下體。 43亞倫㧯佢該兜孻仔進入聖帳篷到𠊎面前，抑係在聖所執行祭司職務个時，一定愛著這褲，免得現出下體致死。這係為亞倫㧯佢个後代所定永遠个例規。」
اکنون انتخاب شده:
出埃及記 28: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012