出埃及記 18
18
葉特羅訪問摩西
1 摩西个丈人老 — 米甸个祭司葉特羅聽到上帝𢱋以色列人出埃及个時，為摩西㧯佢个人民所做个事， 2就來見摩西，並將摩西留在外家个𡜵娘西坡拉 3㧯兩個孻仔帶來。兩個孻仔一個安到革舜#18:3 「革舜」㧯希伯來話「做旅客」發音相近。，因為摩西講：「𠊎係暫時住在外邦个旅客」； 4另外一個安到以利以謝#18:4 「以利以謝」意思係「𠊎个上帝係幫助者」。，因為摩西講：「吾爸个上帝幫助𠊎，拯救𠊎脫離埃及王个刀劍。」
5 葉特羅帶等摩西个𡜵娘㧯兩個孻仔來到上帝个山，就係摩西在曠野安營个所在。 6葉特羅先喊人去㧯摩西講，佢等會來个消息。 7所以摩西出去迎接佢个丈人老，㧯佢行禮，又唚佢。佢等互相問安，然後入去摩西个帳篷。 8上主為到以色列人，對埃及王㧯埃及人所行一切个事，還有以色列人歸路所堵到个困難㧯上主樣般拯救佢等个事，摩西全部講給佢个丈人老聽。 9葉特羅聽到上主為到以色列人所做个一切好事、佢樣般拯救佢等脫離埃及人个手，就非常歡喜。 10葉特羅講：「愛讚美上主！佢對埃及王㧯佢人民个手中拯救你等出來，俾你等毋使再做埃及人个奴才！ 11這下𠊎知上主比所有个神明較偉大；因為埃及人驕傲侮辱以色列人，佢成就這所有个事。」 12所以葉特羅 — 摩西个丈人老向上帝獻燒化祭㧯其他个祭物；亞倫㧯其他以色列个長老全部來，㧯佢共下在上帝面前食飯。
指派審判官
(申命記 1:9-18)
13第二日，摩西坐等在人民當中處理紛爭，對天光到斷烏盡多人民企在堘頭緊等。 14摩西个丈人老看到佢為人民所做个一切事，就講：「你為人民到底做麼介？樣般俾恁多人圍在塍頭，對天光到斷烏等你一儕來處理。」
15 摩西應講：「𠊎一定愛恁樣做，因為人民到𠊎這位來求問上帝个旨意。 16若有兩儕相爭，就來尋𠊎解決；𠊎就代佢等判斷麼人著、麼人毋著，又愛將上帝个法律並指示㧯佢等講。」
17 摩西个丈人老對佢講：「你个做法毋好； 18你㧯你个人民全部會忒痶。因為事情恁多，你一儕做忒重。 19這下你聽𠊎講，𠊎㧯你建議，願上帝也㧯你同在。你愛代表人民，將佢等个紛爭帶到上帝面前，向佢請示； 20你也應該將上帝个法律㧯指示教導佢等，解釋給佢等聽，使佢等知愛樣般行事為人。 21你還愛選派有能力个人做以色列人个領袖：每一千人、一百人、五十人、十人全部應該有一個領袖。佢等一定係敬畏上帝、可靠、毋接受紅包个人。 22你愛指派這兜人隨時為人民判斷案件；重要个案件帶到你面前來就好，細个紛爭做得自家處理。佢等恁樣分擔你个責任，你个擔頭就會較輕。 23若係你恁樣做，上帝也恁樣吩咐你，你就毋會恁𤸁恁痶；這兜人民就做得早兜仔平平安安轉屋下。」
24 摩西接受厥丈人老个建議， 25就在以色列人當中選出有能力个人，做千人、百人、五十人、㧯十人个領袖。 26佢等隨時為人民判斷案件；堵到有較難个案件，就請示摩西，細个紛爭就自家處理。
27後來，摩西送厥丈人老離開，葉特羅就轉佢个家鄉去。
اکنون انتخاب شده:
出埃及記 18: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012