出埃及記 19
19
以色列人在西奈山
1 以色列人離開埃及，堵好在滿三個月該日到西奈沙漠。 2佢等先離開利非訂，然後到西奈沙漠，在西奈山下安營。 3摩西上山去朝見上帝。
上主對山頂呼喊摩西講：「你愛恁樣㧯雅各个子孫以色列人講： 4『你等已經看到𠊎 — 上主樣般對付埃及人。𠊎揹等你等，就像鷹鳥乸將細鷹鳥揹在翼胛頂，將你等帶到這位來歸𠊎。 5若係你等順從𠊎，守𠊎个約，你等就愛在萬民中做𠊎寶貝个子民。全世界攏總屬𠊎， 6只有你等歸屬𠊎做祭司个國度，做聖潔个國民。』這兜話你愛㧯以色列人講。」 7所以摩西下山，召集人民个領袖，將上主命令佢个事全部㧯佢等講。 8人民同聲應講：「𠊎等愛遵照上主个話做。」摩西就將佢等个話向上主報告。
9上主對摩西講：「𠊎愛在賁賁个雲中降臨到你該位，俾𠊎个子民聽到𠊎㧯你講話，使佢等完全相信你。」
摩西將人民个話向上主報告。 10上主又對佢講：「你去㧯人民講，今晡日㧯天光日佢等愛潔淨自家，衫褲也愛洗淨， 11到第三日全部愛準備好。該日，𠊎 — 上主愛降臨在西奈山，俾所有个人民看到𠊎。 12你愛在山个四圍做記號，命令人民做毋得超過界限，也做毋得上山，抑係踏到這山。踏到這山个人，愛俾佢死。 13愛用石頭㧹死抑係用箭射死，無論麼人全部不准摸佢个屍體。人㧯頭牲全部愛遵守；犯到个愛俾佢死。愛等歕羊角个聲傳來，人民正做得上山。」
14 摩西下山吩咐人民，愛佢等潔淨自家，準備敬拜。佢等就洗淨衫褲； 15摩西㧯佢等講：「到第三日一切愛準備好；在這期間做毋得有房事。」
16第三日朝晨，雷公緊響、𥍉爧無停，有賁賁个雲在山頂出現、又聽到歕羊角个聲盡響。營肚个人民全部愊愊掣。 17摩西帶領佢等出營來朝見上帝；佢等全部企在山腳下。 18歸隻西奈山被火煙遮等，因為上主在火中降臨。該火煙像火窯肚衝出來个濃煙；歸隻山大大搖動。 19這時歕羊角个聲越來越響。摩西講話，上帝響雷公應佢。 20上主降臨在西奈山頂，喊摩西上山；摩西就上山去。 21上主對佢講：「你下去警告人民，做毋得超過界限來看𠊎，驚怕盡多人會死。 22就連祭司也一定先潔淨自家正做得行近𠊎；若無，𠊎會出來責罰佢等。」
23 摩西對上主講：「你个子民做毋得上西奈山；因為你已經吩咐𠊎等，愛在山邊立界限，將這山分別做聖山。」
24上主對摩西講：「你下去，將亞倫帶上來。總係祭司㧯人民做毋得超過界限到𠊎這位來，驚怕𠊎會出來責罰佢等。」 25所以摩西下山，轉到人民該位，將上主个話㧯佢等講。
اکنون انتخاب شده:
出埃及記 19: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012