出埃及記 10
10
(8) 草蜢災
1後來，上主對摩西講：「你去見埃及王。𠊎使佢㧯佢个官員心硬，目的係愛在佢等當中行𠊎這兜神蹟， 2也愛俾你將𠊎樣般行神蹟、使埃及人無葛無煞个經過，講給你个子子孫孫聽，恁樣你等就會知𠊎係上主。」
3所以，摩西㧯亞倫去見埃及王，對佢講：「上主 — 希伯來人个上帝恁樣講：『你到麼介時節正會在𠊎面前降服呢？愛放𠊎个子民走，俾佢等去敬拜𠊎！ 4若係你繼續毋肯放𠊎个子民走，天光日𠊎愛派草蜢到你个國內。 5該兜草蜢會多到遮滿全國，使人看毋到地面。該兜無被冰雹打壞个，連賸下來个樹仔，全部會被草蜢食淨淨。 6該兜草蜢會充滿你个王宮，㧯你个官員並人民所住个地方。這得人驚个情況係你个祖先世世代代直到今晡日毋識看過个。』」摩西講完這話，就轉身對埃及王面前離開。
7國王个官員對王講：「這個人㩢耍𠊎等愛到幾時呢？放以色列人走啊，俾佢等去敬拜上主 — 佢等个上帝。埃及已經會滅亡了，敢講你毋知？」
8所以國王喊摩西㧯亞倫倒轉來，對佢等講：「𠊎俾你等去敬拜上主 — 你等个上帝，總係㖠兜人愛去呢？」
9 摩西應講：「𠊎等愛全部去，無論老个、後生个；𠊎等愛帶走𠊎等个子女㧯牛羊，因為𠊎等一定愛在該位過節，敬拜𠊎等个上主。」
10國王講：「若係𠊎俾你等帶走你等个婦女㧯細人仔，該就愛庇佑上主㧯你等同在噢！其實，你等想愛造反！ 11做毋得！若係你等愛去敬拜上主，只有你等个男人做得去。」講煞，佢就將摩西㧯亞倫逐出去。
12後來上主對摩西講：「你愛向埃及地擎手，使草蜢遮滿全國；它兜愛來食淨地上所有个植物，將無被冰雹打壞个一切食淨淨。」 13所以摩西擎起佢个柺棍仔指向埃及地；上主就吹起一陣東風，在地面上透日透夜吹；到第二日朝晨，吹來當多个草蜢。 14該兜草蜢一大群、一大群飛等來，遮滿全國。恁大群个草蜢係頭擺吂識有、將來也毋會有个。 15該兜草蜢遮蓋大地；地上歸片烏烏。該兜草蜢將無被冰雹打壞个植物全部食淨淨，連樹頂个果子也食淨淨。埃及全地，無論田肚抑係樹頂，看毋到半些青色个。
16所以，國王趕緊召見摩西㧯亞倫，講：「𠊎得罪上主 — 你等个上帝；𠊎也得罪你等。 17這下請你等再原諒𠊎一擺，向上主 — 你等个上帝祈求，將這收老命个責罰解除。」 18摩西離開王，去向上主祈禱。 19上主將東風變做一陣盡強个西風，將草蜢全部捲起來，吹到紅海#10:19 「紅海」看 13:18 。。埃及國內連一隻草蜢也無了。 20總係上主使國王心硬，佢還係毋放以色列人走。
(9) 烏暗災
21後來，上主對摩西講：「你愛向天擎手，使得人驚个烏暗將埃及全國遮到伸手不見五爪。」 22摩西向天擎手，大烏暗遮蓋埃及全國三日久。 23埃及人面對面也看毋到，三日个當中無人敢離開自家个屋下；總係以色列人住个地方全部有光。
24國王召見摩西，講：「你等去敬拜上主啊！連你等个婦女、細人仔全部做得去；總係你等个牛羊一定愛留在這位。」
25 摩西應講：「做毋得！你一定愛將獻牲祭㧯燒化祭个頭牲給𠊎等，𠊎等正做得向上主 — 𠊎等个上帝獻祭。 26𠊎等愛帶𠊎等所有个頭牲走，連一隻蹄也做毋得留下來。𠊎等一定愛親身擇頭牲來敬拜上主 — 𠊎等个上帝；因為吂到該位以前，𠊎等毋知應該用麼介頭牲獻給上主。」
27上主使埃及王心硬，佢還係毋肯放以色列人走。 28國王對摩西講：「走開！毋好俾𠊎再看到你。𠊎㖠日再看到你，你就無命了！」
29 摩西講：「你講个無毋著；你一定毋會再看到𠊎了！」
اکنون انتخاب شده:
出埃及記 10: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012