出埃及記 9
9
(5) 瘟仔災
1上主對摩西講：「你去見埃及王，對佢講：『上主 — 希伯來人个上帝恁樣講：「放𠊎个子民走，俾佢等去敬拜𠊎。」 2若係你毋肯放佢等走，還係強強留佢等， 3上主愛降一個得人驚个災難來責罰你：你所有个頭牲，就係你个馬、驢、駱駝、牛、綿羊㧯山羊，全部會發瘟到當厲害。 4上主愛使以色列人个頭牲㧯埃及人个頭牲有分別，以色列人个頭牲一隻也毋會死。 5上主已經決定時間：天光日上主愛在全國實行這個事。』」
6第二日，上主照佢所講个去做。所有埃及人个頭牲全部發瘟死掉，總係以色列人个頭牲一隻也無死。 7國王打探，知以色列人个頭牲一隻也無死。總係佢个心還係恁硬，毋放以色列人走。
(6) 瘡仔災
8後來，上主對摩西㧯亞倫講：「你等對灶爐坑拿幾揢火灰，摩西愛在國王面前將這火灰委在空中。 9這兜火灰會像泥粉共樣飛到埃及全地，火灰一黏到人抑係頭牲，人㧯頭牲就全部起皰、發瘡仔。」 10所以佢等去拿火灰，到國王面前。摩西將火灰委在空中；這火灰使人㧯頭牲全部起皰、發瘡仔。 11該兜行邪術个無辦法企在摩西面前，因為佢等像其他埃及人共樣全身發瘡仔。 12照上主對摩西講過个，佢使埃及王心硬，毋肯聽摩西㧯亞倫个話。
(7) 冰雹災
13後來，上主㧯摩西講：「你天光日打早去見國王，對佢講：『上主 — 希伯來人个上帝恁樣講：放𠊎个子民走，俾佢等去敬拜𠊎。 14這擺你若毋聽話，𠊎毋單淨愛責罰你个官員㧯人民，連你也愛受刑罰。恁樣你就知在世上無像𠊎恁樣个。 15若係𠊎伸手用瘟仔責罰你㧯你个人民，你等早就對地上消滅了。 16總係為到向你顯出𠊎个力量，𠊎留你个生命，俾𠊎个名傳到滿天下。 17到這下你還係驕傲，毋放𠊎个子民走。 18天光日這時，𠊎愛降冰雹；在埃及建國以來毋識落過恁大个冰雹。 19這下你愛下令將你个頭牲㧯你在田野个一切全部逐入屋肚。若無，冰雹會打在人㧯所有在田野个頭牲身項；佢等全部會死掉。』」
20國王个一兜官員因為上主个話來驚到，就將佢等个奴才㧯頭牲全部逐入屋肚。 21總係有兜人還係毋聽上主个警告，由在俾佢等个奴才㧯頭牲留在田野。
22上主對摩西講：「你愛向天擎手，埃及全國會有冰雹降下來，落在人民、頭牲㧯所有个農作物頂高。」 23所以摩西向天擎起柺棍仔，上主就響雷公、降冰雹，𥍉爧到地上；上主降冰雹在埃及全國。 24該時大垤冰雹摻等𥍉爧打下來；這係埃及建國以來最厲害个冰雹災難。 25冰雹將埃及境內田野个一切打壞，包含所有个人、頭牲、田肚个農作物，㧯所有个樹木。 26只有以色列人住个歌珊地區無落冰雹。
27 埃及王派人喊摩西㧯亞倫來見佢，對佢等講：「這擺𠊎有犯罪了。𠊎㧯𠊎个人民全部毋著了；上主係著个。 28請你等向上主祈禱！𠊎等無法承受這雷公㧯冰雹个災難！𠊎放你等走；你等毋使再過留在這位。」
29 摩西對佢講：「𠊎一離開這城就會擎手向上主祈求；雷公就會停止，冰雹也無再落下來。恁樣，你就知大地係屬上主个。 30總係𠊎知你㧯你个官員還係毋敬畏主上帝。」
31(麻㧯大麥全部被冰雹打壞；因為該時大麥當標串，麻也當開花； 32只有小麥㧯粗麥無損傷，因為還吂標串。)
33 摩西離開埃及王，出城後，擎手向上主祈禱。雷公、冰雹黏時停止，也無再落大水。 34國王看到這災難停下來，佢又開始犯罪；佢㧯佢官員个心又硬起來。 35照上主早就通過摩西講過个，埃及王个心還係恁硬，毋肯放以色列人走。
اکنون انتخاب شده:
出埃及記 9: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012