Tùntúmə́ bé 24
24
Bə̀ zə Pwəə bə vò cɔ cə́bal Fyilisi yé né
1Shə̀dɛ́ɛ́sɛ́ gə́ zə Pwəə sə vò sə pə cɔ w cə́bal Fyilisi ni, è dwã nə̀nu yùwə̀, Yi jì y vwĩ̀-zwə́lnə bé yé né cìnə́ bé gakó náncɛ y Ananyaasɛ ǹdə́ Zhwifubá náncɛsɛ́ jàlà zɛ̃̀ bə vò bə nə cɔ w cə́bal mɔ́, bə̀myɛ́ ǹdə́ lò mə̀dù ń nyí yě zɔ̀mà bùrsì jàà wà, ń yíl Tərtuluusi, mùnì ga bə cĩ́ yò Pwəə yó w cɔ w cə́bal mɔ́ yé né.
2Bə ce bə byẽ̀ Pwəə n bà. Tərtuluusi zɛ̃̀ n ji kùr ń nə́ ń cĩ́ yò Pwəə yó w ń zhe: “Cɔ cə́bal, nə́ zhe yə̀-zùlə́ nántwə̂ nə́ cɔ w wẽ́, sə wɔ́ ǹmyɛ́ jàn yilə. Ǹ tumə né ce nə́ cɔ w kwɛrhɛ dɛ̃´dɛ̃´. 3Nə́ nə cɛ̀nɛ̀ rɛ́ rə̀myɛ́ mɔ́ twéé twéé, jààsɛ́ gakó, nə́ zɛ̃̀ nə́ rʼé ce ǹ nə̀bán dɛ̃´dɛ̃´ rə̀myɛ́ gakó yilə. 4À tʼâ yâl a lyɛ̀ɛ̀ mɔ́ dɛ̃´dɛ̃´ yé, sə à nʼâ lwə̀l mó ǹ wu-bɔ̀nɔ̀ w yilə, sə́ cili kɔn dɛ̀bɛ́ nə́ la byilu mú námpɔ́lɛ́.
5“Nə́ pwírí bal mɔ́ mɔ̀bɔ́ wɔ́ lyì-bəlwɛ̀lɛ́. Ń nə́ ń lwe Zhwifubá dwã nɛ lũ w púlə́púlə́ wẽ́. E jà ń wɔ́ Nazarɛtɛ lyì bí gùlú w yé né cə́bal. 6Ń gaga mɔ́ yà ń nə́ ń yâl n wɛ̀rhɛ́ ywẽ̀ jàlà rə̀ nʼê byili bə̀ ń tá ń nyàm Yi jì y yé. Nə́ zɛ̃̀ nə́ zə mɔ. [Nə́ yʼâ nʼé yâl nə́ bùr ń bùrsí sə tó ǹdə nə́ nyí rí gə́ nʼê byili ní, 7sə shə̀dɛ́ɛ́sɛ́ yó-cə́bal Ləzhaasɛ zwẽ mo nə́ jɔ̃̀ w ǹdə́ jàn. 8N zɛ̃̀ n pə nə́ba nyí bə̀ nə́ zə mɔ nə́ bʼě byili yò w ǹmyɛ́ nɛ.] Bwə̂rh mo ǹ cìcì ni. Ǹ bʼâ lwar bə̀ tɛ̀bɛ́ gakó nə́ rʼé byili bə̀ ń wɛ̀rhɛ́ mɔ́ wɔ́ zhə̀nà.”
9Sə Zhwifubá swéné tɛ̀bɛ́ Tərtuluusi byili mú. Bə wɔ̀ bə̀ wɔ́ èta cìcì.
10Cɔ w cə́bal mɔ́ zɛ̃̀ n zhẽ̌ ń jɛ̃̀ dɛ̃̌ n wɔ̀ Pwəə ne bə̀ ń zɔ̌m. Pwəə zɛ̃̀ n wɔ̀ mɔ̀: “À yě bə̀ ǹ gə́ wɔ́ dwí rí tɛ̀bɛ́ bùr-kárna mɔ́ byinə né já. Wɔ́ rə̀myɛ́ è ce à zhǐ ǹ yé né à nʼâ byili mú à yò w kùr ǹdə́ wu-jɔ̀, bʼà yě bə̀ ǹ bʼâ nyɛ̀ɛ̀ ò kùrə̀. 11Ǹ cìcì mú wɔ̌ ǹ lwar rɛ: à gə́ tú Zhərəzalɛm Yi còrhó yil mó bə dwã shí ǹdə́ nə̀lyè du yé. 12Bə̀ yə̀ nɛ nɛ à zhǐ Yi jì y kɔ̀nɔ́ w ráá Zhwifubá dwã-gùúlí jìsí wə, ráá cɔ w wa, àmyɛ́ ǹdə́ lò nʼé mà dwã nyə̀-pâr, ráá à ce lyì-zhâ nʼê bwí dwã yé. 13Ywẽ̀ né nyɛ̀bɛ́ gakó bə̀ nʼê cĩ́ à yó w mó, kaka tɛ̀nɛ́ rə̀ nʼê byili bə̀ nə̀ wɔ́ zhə̀n yé.
14“Cili kɔn dɛ̀bɛ́ à la mɔ́ byilu mú: àmyɛ́ nʼâ tó Yezu Kristə sɔ́má y à bʼâ cèrhé nə́ nàmbala bɛ́ Yi rí. À jʼà nʼâ zwẽ kɔn dɛ̀bɛ́ gakó rə̀ kɛ̃ Muyiisi nyə́ né sɛ́bɛ́ rɛ́, ǹdə́ Yi nyì-zwennə bé sábá nɛ́ wẽ́ mó nyí. Bə̀myɛ́ zɛ̃̀ bə̀ nʼê wə̀l bə̀ sɔ́má y èmyɛ́ də̀ zhə̀n yé. 15Kɔn rə̀dù à nʼâ dɛ̃̀ Yi sõ: byɛ̀bɛ́ bə̀ nʼê cĩ́ ywẽ̀ né à yó w mó myɛ nʼê dɛ̃̀ kɔn dɛ́ rə̀myɛ́ mɔ́. Nə́myɛ̌ ga yě bə̀ Yi bʼa bwìrhì wu-cángá cìnə́, ǹdə́ byɛ̀bɛ́ bə̀ də̀ wu-cángá cìnə́ ga. 16Wɔ́ rə̀myɛ́ è ce àmyɛ nʼâ ce jàn nɛ́ twéé gakó mùnì ga à bə̀kʼa gwar Yi ráá lò yé.
17“À zhǐr Zhərəzalɛm nɛ́, a wɛ̀rhɛ́ byinə nánzhəzhɔ̌ ǹdə́ à kʼâ yə̀ gàà zhə̀l yé. Rə̀myɛ́ kwã nɛ́, a zɛ̃̀ a zə sə̀byǐ a bə̀ à la mʼa sɛ̃ à dwí rí ni, sʼa pə à jɛ̃̀-kɔn Yi ni. 18À gə́ tó a wɛ̀rhɛ́ jìmdì vǔr tum dí a zhɛ̀, wɔ́ Yi jì y kɔ̀nɔ́ w wẽ́ bə̀ nɔ nɛ nɛ́. Lyì-zhâ yʼà tɛ̀nɛ́ gàà, búlə́ myɛ yʼà tɛ̀nɛ́ gàà yé.
19“Azhi tənà y Zhwifubá jàlà yʼà ŋwɛ́nɛ́ gàà. Kɔn gə yʼà ŋwɛ́nɛ́, wɔ́ bə̀myɛ́ bə̀ yʼà mə̂ sə bə zhì ǹ yé né èlâsɛ̃´ bə byili ri. 20Ráá bə̀ gə́ zə nɛ bə vò Zhwifubá bùrsí gùlú w nánfɔ̀lɔ̀ w lyì bí yé né mó yi ní, lyì bí byɛ̀bɛ́ bə̀ ŋwɛ́nɛ́ nyɔ̀nɔ̀ mɔ́ gə pwírí à wɛ̀rhɛ́ kɔn dɛ̀bɛ́ rə̀ bə càn, sə bə byili wɛ̀. 21À zhì bùrsí cìnə́ yé né a bya a wɔ̀: ‘E zɛ̃̀ wɔ́ à gə́ wò bə̀ nyǐ à nʼâ zwẽ nyí bə̀ Yi bʼa bwìrhì cùùrì mú yil bə̀ zə nɛ bə bʼâ yé né?’ Wɔ́ rə̀myɛ́ dúdú à zɔ̀m.”
22Bə̀ yʼà zɔ̀m Yezu Kristə sɔ́má y zɔ̀mà Fyilisi sõ ń yě è yò zhə̀nà. Sə ń yə̀ bùrsí kɛ́ rə̀myɛ́ yó yé. N zɛ̃̀ n wɔ̀ Zhwifubá ne: “Shə̀dɛ́ɛ́sɛ́ gakó yó-cə́bal Ləzhaasɛ gə túwə́, à bʼa nyǐ á yò w ma.”
23N zɛ̃̀ n pə nyí shə̀dɛ́ɛ́sɛ zɔ̌m yó-cə́bal mɔ́ nɛ bə̀ ń yìlì Pwəə ne, sə ń bə̀ká n lyẽ mo yé, bə̀ ń dɔwabá gə tú bə̀ nʼê yâl bə sɛ̃ mɔ, sə ń bə̀ká n cə̀r be yé.
Pwəə cĩ́ ń nyí yò Fyilisi ǹdə́ ń kɛ̃ mɔ́ yé né
24Dwã màngɛlɛ́ rə̀myɛ́ kwã nɛ́, cɔ cə́bal Fyilisi ǹdə́ ń kɛ̃ Dərəshii bà. Ń kɛ̃ mɔ́ ńmyɛ̌ mɔ́ yà ń wɔ́ Zhwifubá bə̀kɔ́. N zɛ̃̀ n ce bə byẽ̀ Pwəə n bə̀ ń nə́ ń zɔ̀m Yezu Kristə ne zhú mú yò, n zɛ̃̀ ń nə́ ń cili. 25Sə Pwəə yà ń nə́ ń byili lò gə́ mə̂ sə́ zə ǹ cìn ní, ǹdə́ ǹ gə́ mə̂ sə́ wɛ̀rhɛ́ nɛ́, mùnì ga ǹ tùntwə̃̀ə̃̀ né sú Yi yírhə́. Sə ń byili n súlí bə̀ nyǐ Yi bʼa kə́ lyì bí gakó bùrsì. Rə̀myɛ́ ce ywẽ zə Fyilisi, n zɛ̃̀ n wɔ̀ Pwəə ne: “Yẽ̌ èta sə́ vò. À gə tú à zhe ǹ tum dɛ̃, à mʼa byẽ̀ mó.”
26Ń yà ń nə́ ń bùl bə̀ Pwəə gə ń mà n pɔ̃ wársɛ. Rə̀myɛ́ ce, ń yà ń nə́ ń byẽ̀ mò ń twí ń sõ bə̀ zhərhə.
27Kɔn wɛ̀rhɛ́ byinə nə̀lyè, rə̀myɛ́ kwã nɛ́, Porəshuusi Fesətuusi bə̀ n zwẽ Fyilisi jàà yá. Sə Fyilisi gə́ yà ń nə́ ń yâl n wɛ̀rhɛ́ Zhwifubá pùbùlə̀ mó ce, ń já n yẽ̌ Pwəə ne byə̀nə́-jì y wə.
اکنون انتخاب شده:
Tùntúmə́ bé 24: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.
