Tùntúmə́ bé 25
25
Pwəə wò bə̀ ń nə́ ń yâl bə̀ Orɔm pyɔ̌ mɔ́ bǔr ń bùrsí
1Fesətuusi gə́ tú tənà y èmyɛ́ wa, ń dwã nə̀tɔ̀ yùwə̀, n zɛ̃̀ n zhì Səzarɛ n vò Zhərəzalɛm. 2Ń gə́ yú gàà, Yi jì y vwĩ̀-zwə́lnə bé yé né cìnə́ bé, ǹdə́ Zhwifubá lyì-fwààlɛ́ bə̀ ń sõ, bə̀ nʼê cĩ́ yò Pwəə yó wə. 3Bə cə̀ə̀lè bə̀ nʼê lwə̀l Fesətuusi ni bə̀ ń ce bə kʼa zə Pwəə bə mʼe vò Zhərəzalɛm. Bə̀ yʼà wɛ̀rhɛ́ nyí rə̀dù bə̀ nʼê yâl bə shèè bə gu Pwəə sɔ́má yó. 4Fesətuusi wɔ̀ bɛ: “Pwəə ŋwɛ́nɛ́ byə̀nə́-jù w Səzarɛ nɛ́, sə àmyɛ́ cìcì kʼâ nʼâ yâl a vò dwã nɛ́ nyɛ̀bɛ́ nɛ. 5Ǹdʼá jàlà gə wɔ̌, sə bə bə̀ bə tó ne bə vò. Bə̀ gə yúwə́, kɔn dɛ̀bɛ́ ń wɛ̀rhɛ́ rə̀ wɔ́ lwɛlɛ, bə̀ mʼa byili.”
6Sə Fesətuusi yə̀ dwã lyɛlɛ ráá shí lyɛ̃ Zhərəzalɛm nɛ́ yé, n ká n kwɛ̃̀ n vò Səzarɛ. Ń gə́ yú gàà, è zɛ̃̀ nəkɔkɔ́lɛ́ y yùwə̀, n vò n jòm bùrsí jàà y wa. N ce bə zə Pwəə bə bà. 7Pwəə gə́ tú n yí, Zhwifubá byɛ̀bɛ́ bə̀ tó bə shí Zhərəzalɛm mɔ́ zɛ̃̀ bə kə́kɛ́lɛ́ mɔ, bə̀ nʼê cĩ́ ywẽ̀ nánzhəzhɔ̌ nyɛ̀bɛ́ nə̀ jɛ̀ ń yó wə. Bə jʼà wàr kaka bə̀ nʼê byili bə̀ ywẽ̀ né nə̀myɛ́ mɔ́ wɔ́ zhə̀n yé. 8Pwəə zɛ̃̀ n wɔ̀: “À yə̀ Zhwifubá nyə́ né lyɛ̃ yé. À yə̀ Yi jì y cɔ̀ yé. À yə̀ Orɔm pyɔ̌ mɔ́ myɛ dwé yé.”
9Sə Fesətuusi yà ń nə́ ń yâl n wɛ̀rhɛ́ Zhwifubá pùbùlə̀. N zɛ̃̀ n bwə̀rh Pwəə n wɔ̀: “Ǹ bʼâ vò Zhərəzalɛm bə vò e bùr ǹ bùrsí à yírh w gàà?”
10Pwəə wɔ̀: “Wɔ́ Orɔm pyɔ̌ mɔ́ bùrsí jì y wẽ́ bə̀ zə nɛ bə zù ní. Wɔ́ gàà à bùrsí mə̂ sə sə bùr né. Ǹmyɛ́ cìcì mú yě náàcɛ̀nɛ́ bʼà yə̀ Zhwifubá ne dwé yé. 11À gə yʼà dó dóó kɔ̀bɔ́ ò bʼa ce bə gu ni, à yʼà tʼâ la à gu mú yò cõ yé. Sə ywẽ̀ né nyɛ̀bɛ́ bə̀ nʼê cĩ́ à yó w mó òdù ga gə də̀ zhə̀nà, lò bə sɔ́má zhe ń mà n zə nɛ n pə Zhwifubá ne yé. À nʼâ yâl bə̀ Orɔm pyɔ̌ mɔ́ bǔr à bùrsí.”
12Fesətuusi zɛ̃̀ n zɔ̀m ǹdə́ ń sanna bɛ́, n zɛ̃̀ n wɔ̀ Pwəə ne: “Ǹ gə́ wò bə̀ ǹ nə́ ǹ yâl bə̀ Orɔm pyɔ̌ mɔ́ bǔr ǹ bùrsí mú ce, wɔ́ ńmyɛ̌ sõ ǹ bʼâ vò né.”
Bə̀ zə Pwəə bə bə̀ pyɔ̌ Agərəpa yé né
13Dwã màngɛlɛ́ rə̀myɛ́ kwã nɛ́, pyɔ̌ Agərəpa ǹdə́ ń nəkɔ́ Bereniisi bə̀ Səzarɛ bə̀ la Fesətuusi co, 14sə bə̀ dɛnɛ gàà. Fesətuusi já n byili Pwəə yò w pyɔ̌ mɔ́ nɛ n wɔ̀: “Fyilisi yẽ̌ lò mə̀dù nì byə̀nə́-jù w nyɔ̀nɔ̀. 15À gə́ zhə̀l Zhərəzalɛm yó, Yi jì y vwĩ̀-zwə́lnə bé yé né cìnə́ bé ǹdə́ Zhwifubá náncɛsɛ́ zɔ̀m ń yò ǹdə́ nɛ. Bə̀ nʼê yâl bʼà kə́ ń bùrsì a pɔ̃ dóó, 16sə à wò bè bə̀ nyǐ Orɔm lyì bí tʼâ pɛ sɔ́má bə̀ kɛ́ lò bùrsì èta yé. Ńmyɛ̌ ǹdə́ byɛ̀bɛ́ bə̀ nʼê cĩ́ yò w ń yó w mó ga mə̂ sə bə jòm tɛ̃´, ńmyɛ cĩ́ ń nyí yò.
17“Bə jʼa zɛ̃̀ bə tó ne bə bà. È zɛ̃̀ nəkɔkɔ́lɛ́ yá, a vò a jòm bùrsí jàà y wa, a ce bə zə bal mɔ́ bə bà. 18Byɛ̀bɛ́ bə̀ nʼê cĩ́ yò w ń yó w mó myɛ bà. Àmyɛ́ yʼà nʼâ bùl bə̀ wɔ́ yò kɔ̀bɔ́ ò jɛ̀ ń wɛ̀rhɛ́, sə à pwírí è də̀ èta yé. 19Wɔ́ bə̀myɛ Yi-sɔ́má nyə̀ná nyə̀-pâr bə̀ yʼà nʼê mà, e súlí lò mə̀dù ń yíl Yezu, sə lò mó ńmyɛ̌ mɔ́ cùwə̀. Pwəə zɛ̃̀ ń zhe bə̀ ń ŋwɛ́nɛ́. 20Àmyɛ́ yə̀l à gə́ bʼa bùr bùrsí sə̀myɛ́ dwí rí ní yé. Rə̀myɛ́ ce, a bwə̀rh mò a nyǐ ǹdə́ ń gə nə́ ń yâl n vò Zhərəzalɛm bə bùr ń bùrsí gàà. 21Sə ń wò bə̀ ń nə́ ń yâl bə̀ Orɔm pyɔ̌ mɔ́ bǔr si. Wɔ́ rə̀myɛ́ è ce, a ce bə yẽ̌ mo byə̀nə́-jù w gwẽ̌, sə à bʼa wɛ̀rhɛ́ a ce bə zə mɔ bə vò Orɔm pyɔ̌ mɔ́ sõ.”
22Agərəpa zɛ̃̀ n wɔ̀ Fesətuusi ni: “Àmyɛ nʼâ yâl a cili ń zɔ̀mà nɛ́.”
Fesətuusi wɔ̀ mɔ̀: “Nəkɔl à bʼa ce n bə̀ n zɔ̀m ń cili.”
23È zɛ̃̀ nəkɔkɔ́lɛ́ y yùwə̀, Agərəpa ǹdə́ Bereniisi ǹdə́ bə̀ kwã-lyì bí bʼe zù bùrsí jì y wə, bə jòm tɛ̃´, bə̀myɛ́ ǹdə́ shə̀dɛ́ɛ́sɛ́ yó-cìnə́ bé, ǹdə́ cɔ w lyì-fwààlɛ́. Fesətuusi zɛ̃̀ n pə nyí bə zə Pwəə bə bà. 24N zɛ̃̀ n wɔ̀: “Pyɔ̌ Agərəpa, ǹdʼámyɛ̌ byɛ̀bɛ́ gakó á tó nə́ba á jě nyɔ̀nɔ̀ mɔ́, nyǐnə wɔ́ bal mɔ́ mɔ̀bɔ́ yil Zhwifubá nánzhəzhɔ̌ tú à sõ Zhərəzalɛm nɛ́ ǹdə́ nyɔ̀nɔ̀ ga, bə̀ nʼê búbwéé bə̀ ń mə̂ ǹdə́ gu mú. 25Sə àmyɛ́ pwírí kaka tɛ̀nɛ́ rə̀ nʼê byili bə̀ ń mə̂ ǹdə́ gu yé. Sə ń cìcì byili bə̀ ń nə́ ń yâl bə̀ Orɔm pyɔ̌ mɔ́ bǔr ń bùrsí. Rə̀myɛ́ ce, à bʼa ce n vò gàà. 26Kɔn jʼà tɛ̀nɛ́ à nə pamparɛ̃ɛ̃ à bʼa kɛ̃ a byili pyɔ̌ mɔ́ nɛ ń yil yé. Wɔ́ rə̀myɛ́ yil à ce bə zə mɔ bə bə̀ á yé né. Kɔn du, ń zhǐ ǹ yé né pyɔ̌ Agərəpa. Bwə̂rh mo. Ń gə byili kɔn gə́ wɔ́ nɛ́, à mʼa zɛ̃̀ a ŋwɛ̀nɛ́ a nə kɔn a kɛ̃. 27È gə wɔ́ àmyɛ́ yilə, ǹ gə ce byə̀nə́-jì lò zhə̀l pyɔ̌ yé né ǹdə́ ǹ yə̀ ń yò kùr nɛ ń byili, rə̀ bə kùr zhe yé.”
اکنون انتخاب شده:
Tùntúmə́ bé 25: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.
