KO HĀKEAI 1
1
Ko e Fekau ‘e Sihova ke Toe Langa ‘a e Temipalé
1TOKUA ‘i hono ua ta‘u ‘o Kingi Talaiasi, ‘i hono māhina ono, mo e ‘uluaki ‘aho ‘o e māhina, na‘e ai ha folofola ‘a Sihova na‘e fakafai ‘i he palōfita ko Hākeai kia Seluipepeli foha ‘a Saletili, ko e kōvana ‘o Siuta, pea kia Siosiua foha ‘o Siosateki, ko e taula‘eiki lahi, ke fakahā:#‘Ēsela 4.24–5.2; 6.14
2Ko e folofola eni ‘a Sihova Sāpaoti, Tokua ‘oku lau ‘e he kakai na, Kuo te‘eki taimi ke mau ‘alu atu, ‘a e taimi ke langa ‘a e fale ‘o Sihova. 3Ko ia, na‘e hoko ‘a e folofola ‘a Sihova, ‘o fakafai ‘i he palōfita ko Hākeai, ‘o pehē, 4Sā! kuo taimi ‘apē ke mou nofo ‘i he ngaahi fale kuo ‘aofi, kae tuku lusa ‘a e fale ni! 5Pea ko eni, ko e folofola eni ‘a Sihova Sāpaoti, ‘Ai homou loto ke sivi homou ngaahi ‘alunga. 6Na‘a mou tō ta‘u ke lahi, ka mou utu mai ha momo‘i me‘a; ‘oku mou kai, kae ‘ikai mākona; ‘oku mou inu, kae ‘ikai topono; ‘eku mou ‘ai kofu, ka ‘oku ‘ikai te mou māfana; pea ko ia ‘oku nō ngāue ko ‘ene tali totongi ke ‘ai ki he kato ava. 7Ko e folofola eni ‘a Sihova Sāpaoti, ‘Ai homou loto ke sivi homou ngaahi ‘alunga. 8‘Alu ki he mo‘unga, ‘o fetuku ‘akau mai, pea langa ‘a e fale; pea te u lata ai, pea te u fakalāngilangi‘i au–ko Sihova ia.
9Ko ho‘omou ‘amanaki na‘e sio ki ha me‘a lahi, kae uoke ko e momo‘i me‘a; pea ‘i ho‘omou fetuku mai ki ‘api, na‘a ku ifi‘i.#1.9 na‘á ku ifi‘i; pe na‘á ku faka‘auha. Koe‘uhi ko e hā?–Ko Sihova Sāpaoti ia mei he Ta‘ehāmai–koe‘uhi ko hoku fale, he kuo tuku lusa, ka ko kimoutolu ‘oku lele leva takitaha ki hono fale ‘o‘ona. 10Ko hono ‘uhinga ia kuo ta‘ofi ai ‘e he langi ‘a e hahau, ko homou tautea, pea kuo ta‘ofi ‘e he kelekele hono fua. 11Pea u ui mai ha lusa ki he fonua, pea ki he ngaahi mo‘unga, pea ki he uite, pea ki he uaine fo‘ou, pea ki he lolo; ‘io, ki he me‘a fua pē ‘oku tupu mei he kelekele, pea ki he tangata, pea ki he manu, pea ki he fita‘a kotoa pē ‘a e nima.
Ko e Talangofua ‘a e Kakaí ki he Fekau ‘a Sihová
12Pea ko Seluipepeli foha ‘o Saletili, pea mo Siosiua foha ‘o Siosateki, ko e taula‘eiki lahi, mo si‘i toenga kakai kotoa,#1.12: mo… kotoa; pe mo si‘i kau foki maí. na‘a nau talangofua ki he le‘o ‘o Sihova ko honau ‘Otua, pea ki he ngaahi lea ‘a Hākeai ko e palōfita, ‘o taau mo hono fekau ‘e Sihova ko honau ‘Otua; pea na‘e ‘apasia ‘a e kakai ko ‘enau ongo‘i ‘a Sihova. 13Toki lea ‘a Hākeai ko e talafekau ‘a Sihova ‘i he‘ene fai ‘a e fekau ‘a Sihova ki he kakai, ‘o ne pehē, Ko Sihova eni mei he Ta‘ehāmai–‘Oku ou ‘iate kimoutolu ‘e au. 14Pea na‘e ue‘i ‘e Sihova ‘a e laumālie ‘o Seluipepeli foha ‘o Saleteli, ko e kōvana ‘o Siuta, mo e laumālie ‘o Siosiua foha ‘o Sihosataki, ko e taula‘eiki lahi, mo e laumālie ‘o e toenga kakai kotoa;#1.14: mo… kotoa; pe mo si‘i kau foki maí. pea na‘a nau omi ‘o fai ngāue ‘i he fale ‘o Sihova Sāpaoti ko honau ‘Otua, 15‘i hono ‘aho uofulu mā fā, ‘i hono ono ‘o e māhina, ‘i hono ta‘u ua ‘o Kingi Talaiasi.
اکنون انتخاب شده:
KO HĀKEAI 1: TMB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Tongan Moulton Bible © Bible Society of the South Pacific, 2011.