Daa 14
14
Ablaũ Lɔtu suabaa
1Zĩewa Babiloni busu ki Amafɛli ń Ɛlasaa busu ki Aliokio ń Elaũ busu ki Kɛdɔlaomɛɛo ń Goiũ busu ki Tidalio 2aalɛ zĩka ń Sɔdɔũ ki Belao ń Gɔmɔɔ ki Biisao ń Adema ki Sinabio ń Zeboiũ ki Semɛbɛɛo ń Bela pɔ wì mɛ tia Zoaa kiao. 3Kia gbɛ̃ɔn sɔopiɔ kɔ̃kã̀aa pii Sidiũ guzulɛu. Ɔ̃mɛ Isida Wiside ũ tia. 4Aaìɔ falubɔ Kɛdɔlaomɛɛɛ à kà wɛ̃̀ kuɛpla. A wɛ̃̀ kuɛ'aaɔ̃de ɔ̃ aa gì bɔiɛ̀. 5A wɛ̃̀ gɛ̃omɛndosaide ɔ̃ Kɛdɔlaomɛɛ ń kia pɔ kuaanɔɔ mɔ̀. Ɔ̃ aa zĩblè Lefaiɔwa Asalo Kaanaiũ. Aa zĩblè Zuziɔwa Haũ. Aa zĩblè Ɛmiɔwa Save Kiliataiũ. 6Aa zĩblè Oliɔwa an gbɛsĩsĩ pɔ wì mɛ Seiwa e à gɛ̀ pɛ̀ Ɛlipalana gbáawa. 7Ɔ̃ aa ɛ̀a sù Misipa nibɔnai, ɔ̃ wì mɛ tia Kadɛsi. Aa zĩblè Amalɛki busuwa pii ń Amɔle bui pɔ ku Asasɔ̃ Tamaaɔwa lɔ.
8Ɔ̃ Sɔdɔũ kia ń Gɔmɔɔ kiao ń Adema kiao ń Zeboiũ kiao ń Bela pɔ wì mɛ tia Zoaa kiao aa fɛ̀lɛ gɛ̀ zĩkaińnɔ Sidiũ guzulɛu. 9Aalɛ zĩka ń Elaũ busu ki Kɛdɔlamɛɛo ń Goiũ busu ki Tidalio ń Babiloni busu ki Amafɛlio ń Ɛlasaa busu ki Aliokio. Kia gbɛ̃ɔn siiɔ̃piɔ lɛ́ zĩka ń kia gbɛ̃ɔn sɔoɔ. 10Sidiũ guzulɛ kɔtaa ɛ vĩ dasi. Kɛ́ Sɔdɔũ kia ń Gɔmɔɔ kiao lɛ́ baalɛ, ɔ̃ aa kwɛ̀ a guu, ɔ̃ an gbɛ̃kĩniɔ baalɛ̀ tà gusĩsĩdeu. 11Zĩblenaɔ Sɔdɔũ ń Gɔmɔɔo aizɛɛɔ ń ń pɔbleaɔ sɛ̀lɛ pii aa tàò. 12Gɔɔ bee Ablaũ vĩi nɛ Lɔtu ku Sɔdɔũ, ɔ̃ aa aà kũ̀ tàò ń aà aizɛɛɔ lɔ.
13Ɔ̃ gbɛ̃́ pɔ pìlimá gɛ̀ a ò Hɛbɛlu bui Ablaũɛ Mamale gbɛ̃́nɛ líɔ kĩi. Mamale ń a dãunaɔ Ɛsikɔli ń Anɛɛoá Amɔle buiɔnɛ, an lɛ́ doũ ń Ablaũo. 14Kɛ́ Ablaũ mà wà a daɛ kũ̀ wà tàò, ɔ̃ à a bɛ zĩgɔ̃ɔ sɛ̀lɛ gbɛ̃ɔn ɔaa do ń basoolo plasaio (318), à pɛ̀lɛ kiapiɔzi, ɔ̃ à ń lé Dã. 15Ɔ̃ à a gbɛ̃́ɔ kpaalɛ̀, ɔ̃ aa sìńgu gwãasĩna. Aa zĩblèmá aa pɛ̀má e Hoba, Damasi gugbãntoo oi. 16À ɛ̀a sù ń aizɛɛpiɔ pii ń a vĩi nɛ Lɔtuo ń aà aizɛɛɔ. À sù ń nɔɛɔ ń gbɛ̃pãleɔ lɔ.
17Kɛ́ Ablaũ zĩblè Kɛdɔlaomɛɛwa ń kia pɔ kuaanɔɔ, àlɛ su, ɔ̃ Sɔdɔũ kia bɔ̀, à dàaalɛ Save guzulɛ pɔ wì mɛ tia Kia Guzulɛu. 18Ɔ̃ Salɛma ki Mɛkizɛdɛ#Soũ 110.4; Hɛb 7.1-10 mɔ̀ ń pɛ̃ɛo ń vɛ̃ɛo. Aapiá Lua Musude gbagbanaɛ. 19Ɔ̃ à samaa'ò Ablaũɛ à mɛ̀:
Lua Musude musu ń zĩlɛo Kɛna baaada Ablaũgu.
20Wà Lua Musude saaukpa!
À n ibɛɛɔ nànɛ n ɔzĩ.
Ɔ̃ Ablaũ pɔ pɔ à èɔ kwide kpàwà pii. 21Sɔdɔũ kia ò Ablaũɛ: Ma gbɛ̃́ɔ kpaa, níɔ aizɛɛ kũa n pɔ ũ. 22Ɔ̃ Ablaũ òɛ̀: Má sì ń Dii Lua Musude musu ń zĩlɛo Kɛnao, 23má n pɔe sɛo, baa kyale niba, kɛ́ nsu o mmɛ ń tò ma kɛ ɔde ũo yãi. 24Má pɔe sɛo, sema pɔ pɔ ma gbɛ̃́ɔ blè baasio. Ãma Anɛɛ ń Ɛsikɔlio ń Mamale pɔ aa gɛ̀manɔɔ, to aa ń baa sɛ́.
اکنون انتخاب شده:
Daa 14: Boo2024
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Boko Bible © SIM International, 2024.