Daa 13
13
Ablaũ kɛ̃akɔ̃wa ń Lɔtuo
1Ɔ̃ Ablaũ bɔ̀ Egipi à sù Nɛgɛvɛ ń a nao ń a aizɛɛɔ pii ń Lɔtuo. 2Ablaũá ɔdeɛ, a pɔtuoɔ vĩ dasi ń ãnusuo ń vuao. 3Bɔa Nɛgɛvɛ à sɔ̃kĩikpàkpa e à gɛ̀ kàò Bɛtɛli, gu pɔ à bookpàu káau Bɛtɛli zãnguo ń Aio, 4gu pɔ à sa'okĩi bòu yãa. Ɔ̃ à Dii sìsi we.
5Lɔtu ìɔ bɛ ń Ablaũo sãnuɛ. A sãɔ ń zuɔ ń zwãakpɛɔ vĩ sɔ̃. 6An pɔtuoɔ dasi, gupi sɛ̃ i mɔmá mpiio. A yãi aa fɔ̃ aaɔ ku sãnu lɔo. 7Ɔ̃ lɛkpaa gɛ̃̀ Ablaũ pɔdãnaɔ ń Lɔtu pɔdãnaɔ guu. Zĩ́ bee sɔ̃ Kanaaɔ ń Pɛliziɔ ku busupiu. 8Ɔ̃ Ablaũ ò Lɔtuɛ: A maa lɛkpaa àɔ ku wá zãnguo, ge ma pɔdãnaɔ ń n pɔdãnaɔ zãnguoo, asa wá daɛ doũɛ. 9Busu gwa da n aɛ pii. Wà kɛ̃aa. Tó n gɛ ɔzɛɛi, mí gɛ́ ɔplaai. Tó n gɛ ɔplaaiɛ sɔ̃, mí gɛ́ ɔzɛɛi. 10Kɛ́ Lɔtu gugwà, a è Yuudɛ̃ guzulɛ pii mɔsɛ vĩ maamaaɛ. E Dii àɔ gɛ́ Sɔdɔũ ń Gɔmɔɔo kaalɛi, guzulɛpi dɛ lan Dii swaluwa,#Daa 2.10 lan Egipi busuwa, e à gɛ̀ pɛ̀ Zoaawa. 11Ɔ̃ Lɔtu Yuudɛ̃ guzulɛ sɛ̀ pii. Aa kɛ̃̀kɔ̃wa, ɔ̃ Lɔtu dà zɛ́u gukpɛ oi. 12Ablaũ gɔ̃̀ Kanaa busuu, mɛ́ Lɔtu ku Yuudɛ̃ guzulɛ wɛ̃lɛɔ zãnguo. À bookpà Sɔdɔũ saɛ. 13Sɔdɔũdeɔ sɔ̃ gbɛ̃vãiɔnɛ, duunkɛn saɔn ń ũ Diiɛ.
14Lɔtu taa gbɛa Dii ò Ablaũɛ: Gu pɔ ń zɛu, wɛsɛ ǹ gugbãntoo ń gɛɔmidɔkĩio ń gukpɛo ń bɛ'aɛo gwa. 15Tɔɔlɛ pɔ ń èɛ bee pii, má n gbaɛ, iɔ dɛ mpi ń n buiɔ pɔ ũ gɔɔpii. 16Má tó n buiɔ dasikũ lan busu'ũfãawa. Tó gbɛ̃e a fɔ̃ busu'ũfãa nao, a fɔ̃ à n buiɔ nao sɔ̃ɛ. 17Fɛlɛ ǹ bɛbɛbɛbɛ busupiu, ní a gbã̀a ń a yaasao gwa, asa má n gbaɛ. 18Ablaũ fɛ̀lɛ gɛ̀, à bookpà Mamale gbɛ̃́nɛ lí pɔ ku Hɛblɔ̃ɔ kĩi, ɔ̃ à Dii gbagbakĩi bò we.
اکنون انتخاب شده:
Daa 13: Boo2024
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Boko Bible © SIM International, 2024.