YUZÜNGTHALO 15
15
Shozüng Yakzan
(Lev 25.1-7)
1“Kam thünepü akheam aban ching nüsanü shozüng bahjihbeah. 2Tüsho hanangde thsang: sho nipjihrü abannü nihbuh yamhingrü ki shonip jihkhi bahjang; apinü ayamhingrü yungsho keoniorü kheaknü mükheanglo, tümütüsho Atungpuh zuzu zhiyukjihdo. 3Khiungkerü ki nünü akheanglopü kuklah, tüshe nü keoniorünü azüngkhi bahjang.
4“Tümütüsho, nüsa bolung sheshe zhochihrü mülabeah, tümüde A TUN GPU H nüsa Thrünpuhnü nüsa kilim yamrüplurüp jihkhi lo ching apinü nüsa suhdahde müngühjihbah, 5nüsanü lang inü khihni nüsa kilim jihkhi thiyukhümbo anide Atungpuh nüsa Thrünpuh ki mihyuanisho. 6Tümüde Atungpuh nüsa Thrünpuhnü thiyuchihchimkhi nangde nüsa suhdahde müngühjihbah; nüsanü trükshih ahihdo kilim nipjihbah, tüshe nüsanü nipa mulu; nüsanü trükshih ahihdo kurungkheak kiulongthsübah, tüshe arünü nüsa kurungkheak kiulong müthsü.
7“Atungpuh nüsa Thrünpuhnü ajihkhi lo ching nüsa kiutobo khürü ching nüsa bolung keoniorü zhochihrü lasho, nünü nü mulong dümüküp yungsho nü keoniorü zhochihrü ki düzhimdang; 8tüshe nünü api kilim nü khah trünang tüsho api yihnüpü lakhi salade api kilim suhdahde nipjang. 9Kümkangang, jude yungsho nü mulong ching amütsü lümkhi ha labah, ‘Zuzu thsüpü kam athünepü khah ki lah.’ Jumonü nünü nü keoniorü zhochihrü azhihde nü mük zhipzhipbah tüsho nünü api kilim tümü müjih; tüsho nüsa azhihde apinü Atungpuh ki zhikhi hode nüsa bolung neak hande arübah. 10Nünü tsükjide api kilim jihang tüsho nünü api kilim jihchoki nü mulong düthsümünim, tümütüsho ha dünkheak Atungpuh nü Thrünpuhnü nünü arhimokhi alala ching müngühjihbah. 11Tümüde zhochihrübo alomi chingnü küyimkishe mükheam; jumonü inü nüsa ki thiyukhüm jihchoh, nünü nü lomi ching nüsa keoniorü zhochihrü tüsho mülamüthsürü kilim nü khah trünang.
Azhorübo Yakzan
12“Nü keoniorü Ibrirü athrürü yungsho aliberü nü ki yinbahle kam thuruk tankihsho, kam athünepü ching a nünü api zuzu thsüde nü kheaknü dükheang. 13Tüsho küyimki nünü api dükhea zuzu thsüde atsoshihbanü nünü api khahkeang dütsoshih; 14nünü nü mihnu bolungnü, rhimopung chingnü tüsho kurungasoke nitpung chingnü api kilim salade jihang. Atungpuhnü müngühjihkhi chingnü api kilim jihang. 15Nüsa Ijip ching azhorü lakheah de nüsanü lümkhitang, tüsho Atungpuh nüsa Thrünpuhnü rhokhit; jumonü khihni ha inü nüsa ki thiyukhüm jihchoh.
16“Tüshe apinü nü tüsho nü yamkhün muzhokhi hode tüsho nü lung tsüde lade arükhi hode bahbah mutso de thasho, 17nünü dübean lubahle anuku müzhean chingnü khimdopü ching phityukjang, tüsho api lünnü nü yo azhorü thsübah. Kheaküshe yamlaberü ki she junangde rhimoang.
18“Nünü api zuzu thsüde dükhea tsoshihpü khide müchakde alabah; tümüde api nü yamlarü thsüde mulokhinü alü thsüde nü kam thuruk tankihdo. Junangde A TUN GPU H nü Thrünpuhnü nünü arhimokhi alala ching müngühjihbah.
Akhuh Adrekhi Yakzan
19“Nü moshi tüsho mihnu bolungnü akhuh adrekhi pung alala Atungpuh nü Thrünpuh ki müsühkhitang; nünü akhuh adrekhi moshinü tümü dürhimo, yungsho akhuh adrekhi mihnu kheaknü anam dünip. 20Nü tüsho nü yambuknü ju Atungpuhnü amokhitkhi dangpung chingnü kam abande Atungpuh nü Thrünpuh mikinü tsühang. 21Tüshe ju kheak tümükhüh athsareak kihsho, akikkhi yungsho amüktukkhi yungsho thsara zahkhi nünü Atungpuh nü Thrünpuh ki laksah-a dükingaün. 22Nüsanü ju nüsa kiutobo chingnü atsühpü kuklah; ju dakdakpü yungsho shihmüchi nangde, amüsüh tüsho amümüsüh mihtsürünü ju tsühpü kuklah. 23Nüsanü athiyih lang mütsüh; nüsanü ju ke nangde alo kheak buka bahang.
اکنون انتخاب شده:
YUZÜNGTHALO 15: YIMCBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.