YUZÜNGTHALO 14
14
Tüzhopü Zhipdokhi
1“Nüsa ju Atungpuh nüsa Thrünpuh tsührü ah; asherü thsungkheaknü nüsanü nihbuh küdah thsüde dütsüt yungsho kingkang kheak kuyü dühüt. 2Tümüde Atungpuh nüsa Thrünpuh kilim nüsa amüsüh mihtsürü ah, tüsho alomi mihtsürü alala kurungkheak lakhit atsübe Atungpuhnü api thsungkheak nüsa mokhit.
Amüsüh tüsho Mümüsühkhi Shiwühbo
(Lev 11.1-47)
3“Nünü athraneanbe mungji tümü she dütsüh. 4Nünü shiwüh harü tsühpü kuklah: moshipung, namfimihnu, mihnu, 5shihmüchi, dakdakpü, khuduhshih, mütüm mihnu, awung mihnu, shahyih, awung namfimihnu. 6Tüsho nünü shiwüh bolung abiuo dübeakkhi tüsho sangrung mukhiuhkhitloa müjakbebo tsühpü kuklah. 7Judüalalashe sangrung müjakbe yungsho abiuo dübeakkhi harü ha mütsüh: kemel, ayipungshih tüsho loyeak, tümüde arübonü sangrung müjakchoh tüshe abiuo müdübeak; arübo nüsa thsungkheaknü mümüsüh. 8Tüsho kheaknu she nüsa thsungkheaknü mümüsüh, tümütüsho abiuo dübeaklah tüshe sangrung mümüjak; nünü jurü shiwüh dütsüh yungsho ashemi düqiu.
9“Ke ching lakhi aghi tüsho aphülap kihkhi alala nüsanü atsühpü kuklah. 10Tüshe tümüpürü aghi tüsho aphülap mükihnü nüsanü dütsüh; ha nüsa thsungkheaknü mümüsüh.
11“Nüsanü amüsüh wuhnu alala tsühpü kuklah. 12Tüshe nüsanü harü dütsüh: müleang, müleangtopü, ke müleang, 13chitri, tüsho müleangmuchu mungjibo, 14khüyak mungjibo; 15wuletopü, yapnebe, ke khüjak, tüsho arilupü mungjibo; 16lungru trüngzapü, lungrutopü, kewunu, 17ke fadak, merham, thüngüh tsühbe lungru, 18ke wuhnu, kewüh mungjibo; asherü wuhnu tüsho phihnuliplip.
19“Aghi kihkhi rireakrikobo nüsa thsungkheaknü mümüsüh; jurübo dütsüh. 20Nüsanü wuhnu amüsüh alala tsühpü kuklah. 21Nüsanü tümükhüh akeangnü ashekhi dütsüh; nüsanü ju nüsa kiuto ching lakhi hanrü ki jihpü kuklah, junangde apinü ju tsühbah, yungsho nüsanü ju khiungkerü ki yinjang; tümüde nüsa ju Atungpuh nüsa Thrünpuh kilim amüsüh mihtsürü ah. Nüsanü mihnu nunu abe niuhke ching dükhiung.
Thürü Shihcham Yakzan
22“Kam abande thulu chingnü akhiukkhi hi thürü shihcham nünü dükde jihang. 23Tüsho nünü kingaünkhi hi, yukhu aso tüsho oliv müdangke, tüsho moshi le mihnu boto chingnü akhuh adrekhi api mung lashihpü mokhitkhi dangpung ching Atungpuh nü Thrünpuh mikinü tsühang, junangde nünü kamruhroro Atungpuh nü Thrünpuh wüntrepü mükheahbah. 24Tüsho Atungpuh nü Thrünpuhnü api mung lashihpü mokhitkhi dangpung ju khide limshukhi hode Atungpuhnü amüngühjihkhi thürü shihcham hande müyükhuksho, 25nünü ju sho mo müthriang, tüsho nü khah ching zhimbahle Atungpuh nü Thrünpuhnü mokhitkhi dangpung ching yüang, 26tüsho sho ju nünü amulongkhi ching bahang–moshipung, namfimihnu, yukhu yungsho ayungbe amüküp yungsho nünü akünkhibo; tüsho nünü ju ching Atungpuh nü Thrünpuh miki nü tüsho nü yamkhünnü tsühde asühachihang.
27“Tüsho nüsanü kiutobo ching lakhi Levirü dübahyuk, tümüde api nüsa lung shihcham yungsho yamrüplurüp müla. 28Kam asampü akheam aban ching ju kam akhiukkhi thürü shihcham hande arang tüsho nüsa kiutobo ching zomukhungang, 29junangde nüsa lung shihcham yungsho yamrüplurüp mülarü Levirü, müshihyih-larü, mürerü, khimoberübo nüsa kiutobo ching larübo arübah reangkeamde atsühbah; junangde Atungpuh nüsa Thrünpuhnü nüsa khahnü arhimokhi alala ching müngühjihbah.
اکنون انتخاب شده:
YUZÜNGTHALO 14: YIMCBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.