YUZÜNGTHALO 16
16
Phungho-thünio Thalokhi
(Abe 12.1-20)
1“Abib khinu leangkhiang, tüsho Atungpuh nüsa Thrünpuh ki phungho-thünio mungang, tümüde Abib khinu ching Atungpuh nüsa Thrünpuhnü nüsa azhing ching Ijip chingnü bekhit. 2Jumonü nüsanü mihnu tüsho moshi bolungnü yihkhitbah api mung zopü Atungpuhnü mokhitkhi dangpung chingnü Atungpuh nüsa Thrünpuh kilim phungho-thünio shuhmülanga kingaünang. 3Nüsanü ju phaüm yukkhi yikhap lung dütsüh; nimung thüne nüsanü ju lung phaüm muyukkhi yikhap tsühbah, ju thsünükhi yikhap (tümüde nüsa Ijip chingnü niokheamde akhiuk), junangde nüsanü nüsa Ijip chingnü akhiukkhi rhangdung amuyung lümkhitbah. 4Tüsho nimung thüne nüsa lomi alala ching nüsa bolung phaüm düngüshih, yungsho nüsanü atan ni shuhyini ching kingaünkhi shih yapsu khiungde daningshih.
5“Nüsanü phungho-thünio ju Atungpuh nüsa Thrünpuhnü ajihkhi chipimurung khüpnü dükingaün; 6tüshe Atungpuh nüsa Thrünpuhnü api mung zopü mokhitkhi dangpung chingnü ani yüzahchoki, shuhyini ching nüsa Ijip chingnü akhiukkhi kim ching kingaünang. 7Tüsho nüsanü ju ngübahle Atungpuh nüsa Thrünpuhnü mokhitkhi dangpung chingnü tsühang, tüsho yapsu nüsanü alode nüsa khimyambo ching yüang. 8Nimung thuruk nüsanü phaüm muyukkhi yikhap tsühbah tüsho athüne nipü nüsanü Atungpuh nüsa Thrünpuh kilim amüsüh amukhung labah. Nüsanü ju ni tümü dürhimo.
Yimlukhi Thünio
(Abe 34.22; Lev 23.5-21)
9“Nüsanü nüsa thsungkheak amunimung thüne kheang; nüsa hirhüpbenü hi rhüpmusuchoki kimnü rünbah amunimungbo ju kheang. 10Tüsho Atungpuh nüsa Thrünpuhnü amüngühjihkhi chingnü salade nüsanü kingaün jihkhinü yimlukhi thünio ju mungang. 11Nü tüsho nü tsührü le tsührübe, nü yamlabuhrü le yamlaberü, nüsa chipimurung khüp lakhi Levirü, hanrü tüsho mürerü tüsho nüsa lung lakhi khimoberü alalanü Atungpuh nüsa Thrünpuhnü api mung zopü mokhitkhi dangpung chingnü Atungpuh Thrünpuh miki asühachihang. 12Tüsho nüsa Ijip ching azhorü lakheah de nüsanü lümkhitang, tüsho nüsanü harü yuzüngbo anide arhimopü kümkangde alabeah.
Arüngkhimyam Thünio
(Lev 23.33-43)
13“Küyimki nüsanü rhimopung chingnü hi tüsho yukhu nitpung ching kurungaso hanmukhungbanü arüngkhimyam thünio nimung thüne mungang; 14tüsho nü le nü tsührü tüsho tsührübe, nü yamlabuhrü tüsho yamlaberü, Levirü tüsho nüsa chipimurung khüp lakhi hanrü, mürerü tüsho khimoberünü thünio jimpung thsakhamkhi ching asühachihang. 15Atungpuhnü amokhitkhi dangpung ching nüsanü Atungpuh nüsa Thrünpuhnü nüsa rhimokhibo tüsho nüsa khahnü arhimokhi ching müngühjihbah; junangde nüsa tsükjide asühachihbah.
16“Kam chingnü mahsam ki nüsa athrürü alala apinü amokhitkhi dangpung ching Atungpuh nüsa Thrünpuh miki mukhungbeah: Phaüm muyukkhi yikhap thünio ching, yimlukhi thünio ching tüsho arüngkhimyam thünio ching; tüsho arünü khahkeangnü Atungpuh miki marübeah. 17Athrürü abannü A TUN GPU H nüsa Thrünpuhnü müngühjihkhi ayannü nihbuhnü akukkhi thülün jihbeah.
Thiyuronü Arhimobe
18“Atungpuh nüsa Thrünpuhnü ajihkhi chipimurungbo ching nüsanü mahkhaprü tüsho atorübo nüsa trükbo yande moyukang, tüsho arünü thiyuro mahkhapkhi yande mihtsürübo ki mahkhapbah. 19Nünü thiyuro amülim dükamshih; nünü jakkheahkukheah dühuh, yungsho buknim düleangkhi, tümüde buknimnü lümlung larü mük tukshihchoh tüsho thiyuro tharü yu thophülapjihchoh. 20Nünü küju thiyuroanü ju yimang, junangde nü rhangdung labah tüsho Atungpuh nüsa Thrünpuhnü ajihkhi lo yamrüplurüp lubah.
21“Nünü Atungpuh nü Thrünpuh kingaün sadam thsükhi ki sangthsü tümü dükhim. 22Atungpuh nü Thrünpuhnü athraneankhi amüsüh dungjing nünü dükhim.
اکنون انتخاب شده:
YUZÜNGTHALO 16: YIMCBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.