ROM 9
9
Arnam Lapen Amethang Amonit Atum
1Neli ahok alamsi pulo, neli ke Khristo amonit-lo lapen neli pachobeibelo: neli ning-ingthinta Karjong Kangthir akeja pen ajok neli pachobeibe pu neliphan pachinidak-lo, 2atheke neli methang akorte atum, atheke neli methang akhei amonit atum pen apot neli ning dukpik-lo, lapen neli kaiketa matha-it-lo pu neli kepu alam neli kepachobei kali. 3Halatum aphan ale doji pu asonte neli Arnam ahirjuno longnangkok settame lapen Khristo pen nepaprekdak settame, lake meparji pusi neli mathalo. 4Pima halatum ke Arnam kangvaitang amonit atumlo; alangli halatum aphan amethang asomar paplang-lo lapen amethang adak atur halatum aphan paklang-lo; alangli halatum pen lamchak chebilo lapen halatum aphan Aron pilo; Arnam aphan ahokpet pen kardom kangduk aron halatum chinilo; halatum Arnam akechak long-lo.#Keba 9.4 5Halatum ke Jihudi atum aphusar atum aso asulo lapen monit aron penke Khristo ke halatum akhei amonit-lo. Arnam, la kadokave aphan kepangri abang ke kejut un-e akai apar akai anta kero karcho kelongver nangji abang-lo! Amen.
6Arnam kechak alam chekok un-edet-lo pule neli kepudam kali. Pima Israel amonit aso asu atum anke Arnam kangvaitang amonitpet-lo, lapu kali. 7Lapen ke Abraham aso asu atum anke Arnam asomarpet-lo, lapu kali. Arnam Abraham aphan pulo, “Isaak pen ajoksi ne nangphan kechaktang aso-asu plangji.”#Kech 21.12 8Labangso alam athe lahelo, api apo pen ajok amahang kethekchot a-osomar atum ke Arnam asomar kali, bonta Arnam kechak ateng pen amahang kethek atum aphansi Arnam asomar binong pu lakhaji. 9Pima Arnam kechak lapuson helo,#Kech 18.10 “Muning labangso apor ahut neli vangthuji lapen Sarah asopo amahang thekji.” 10Lapen la anchot kali, inut amonit, atheke ephusar Isaak pen ajok Rebeka kecherop asopo dolo. 11Bonta Arnam aning kehang atengsi asopo inut aphan ingvailo, pu alam kepachekokji aphansi Arnam Rebeka aphan pulo, “Akleng abang akebi aphan ingdukji.” 12Halatum amahang thekthe ako, halatum akeme akehingno thangta klemkle akosi Arnam labangso alam pulo. Lasi Arnam amethang akepha pen apotsi alangli ingvailo, halatum keklem akam apot kali.#Kech 25.23 13Atheke hastro along tok-lo, “Ne Jakob aphan inghonlo, bonta Iso aphan hijimlo.”#Mala 1.2-3
14Tangte ilitum pisi pu apot-loma? Arnam keklem chokchedet-loma? lapu kali. 15Pima alangli Moses aphan pulo, “Neli methang aning kehang aling aphansi neli ingjinsoji lapen neli methang aning kehang aling aphansi neli inghonji.”#Keba 33.19 16Tangte lahelo, monit aning kehang kalite keklem akam apot-le Arnam kangvai kali, bonta Arnam kangjinsoji aning hang-lo apotsi alangli ingvailo. 17Pima Arnam Ijip adet arecho Pharoh aphan kepu alam hastro along ketok lapuson helo, “Nangli pen ajok neli methang ajakong kechepaklangji lapen pirthe adang neli men kepachethangji aphansi neli nangliphan recho nangpaplang-lo.”#Keba 9.16 18Tangte lahelo, Arnam ke amethang aning kehang aling aphan ingjinso lapen amethang aning kehang aling aphan aning pangtang.
Arnam Aning Kethi Lapen Akangjinso
19Bonta nanglitum angbong mane abang neliphan puji tahai, “Jongsi lake lapusonlo tangte, Arnam kopusi monit aphan adai ketin thek langma? Arnam aning kehang matsi khang unjima?” 20Bonta, oh jirpo, Arnam aphan kehili dunji abang nangli komatma? Longle aphule ke kethip abang aphan “Nephan kopi apotsi lason nethiprong-loma?” pu pupe.#Isa 29.16 21Phule kethip abang isipet alongle angkleng pen amethang aning kehang aling kethipji lapen isipet alongle angkleng pen hini aphule, isi ke aman kedo aphan lapen isi ke kaike ke-en-iji aphan kethipji ajakong do, kalima?
22Arnam keklemta lasonthot-lo. Alangli amethang aning kethi lapen amethang ajakong kechepaklangji aning hang-lo. Lasi kevirdet nangji atum, atheke alangli ning kethi kepho nangji atum aphan alangli aning chepading-lo. 23Lapen alangli amethang kethepik adak atur kechepaklangji aning hang-lo. Ilitum aphan, atheke aphrang pen kepathiktang, la alangli akangjinso kelongji atheng, lapen alangli methang adak atur kepalongjisi kepathiktang atum aphan alangli labangso adak atur pilo. 24Pima ilitumke alangli kepha tang amonit atumlo, atheke Jihudi atum angbong penchot kali, bonta Jihudi kalidet atum angbong penta alangli phalo. 25Hosea aloh along Arnam kepu alam ketok lapuson helo,
“Ne nemethang amonit kalidet atum aphan
‘Ne methang amonit’ pusi pupo.
Ne kechinghonhedet akhei aphan ‘ne kechinghon abang’ pusi ne pupo.#Hos 2.23
26Lapen halatum aphan, ‘Nangtum ke ne methang amonit kali,’
pu kepu adimsi,
halatum aphan kereng-et a-Arnam asopo atum pusi pudetji.”#Hos 1.10
27Lapen Isaiah hangsersi Israel alamjir pulo, “Israel amonit atum talo akung asangti asonthak thak dopik setta halatum angbong pen ong-e atumsi jokchotji;#Isa 10.22,23 28pima Hemphu amethang alam atengsi pirthe athak pachekok dapprangji, lapen eboipetsi kaike aphan pachekok pameji.”#Isa 10.22,23 29Lake Isaiah aphrang pen kepu asonthak thak-lo, atheke alangli pulo, “Jakong theparpik abang, Hemphule ilitum aphan eso-esu epitekang ke asonte ilitum Sodom lapen Gomorrah arongsopi asonthak thak cheplangdetji apot-lo.”#Isa 1.9
Israel Atum Lapen Birta Keme
30Tangte ilitum kopisi pu apot-loma? Alam ke lahelo: Jihudi kalidet atum Arnam angno dhoromi keplangji aphan bor-i-elo setta halatum Arnam aphan kroilo apotsi Arnam halatum aphan dhoromi pu lakhalo. 31Bonta Israel atum ke Arnam angno dho-romi keplangji aphan aron rilo setta halatum la longledet-lo. 32Kopi apotma? Pima halatum kekroi penle kebor-i kali, bonta amethang akam pensi bor-ilo. “Kepatekung-i a-arlongsi” halatum pate-kung-lo.
33Atheke hastro pulo,
“Langtha, Zaion athak ne monit atum kepatekung-i lapen kepachingkoi-i a-arlong bipo.
Bonta alangliphan kekroi abang ke therakjokplotpo.”#Isa 28.16
Currently Selected:
ROM 9: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
