ROM 8
8
Karjong Aning Kehang Ateng Kedo Kethak
1Lasi nonke Jisu Khristo pen kechelangpet atum an aphan ke aduk ahukum avelo. 2Pima ilitum Jisu Khristo pen kechelangpet pen ajok ilitum aphan chethe ekepi a-Karjong aronsi neliphan pap lapen kethi aron angbong pen nepajoktang-lo. 3Pima okke ajakong avedet apotsi Aron keklem un-e akam Arnamsi klemlo. Alangli methang a-Sopo aphan nangtoisi monit a-ot along kedo apap aphan aduk ahukum pilo. Alangli Sopo ke pap kepakak-i athok keplangjisi papi amonit a-arje ensi vang-lo. 4Dhoromi pen akenang, atheke ilitum akai along aron kepaplengji aphan, lake ok aning kehang ateng kengkam kechejorjedetji, bonta Karjong aningkehang ateng pen kengkam kechejorji aphan. 5Ok aning kehang ateng kedo-kethak atum anke ok aning kehang akam keklemjisi aning do-e. Bonta Karjong aning kehang ateng kedo-kethak atum anke Karjong aning kehang akam aphansi aning do-e. 6Nangli jongsi ok aning kehang akam aphansi nangli ning do-elo tangte, nangli thilotji, bonta nangli jongsi Arnam a-Karjong aning kehang akam ning do-elo tangte, nangli rengji lapen ning kangsam longji. 7Lasi inut amonit jongsi ok aning kehang akam aphansi ning do-elo tangte, alangli ke Arnam ahoturlo; pima alangli Arnam aron kroikrelo, lapen kroi thekthe. 8Ok aning kehang akam keklem atum ke Arnam aning padok un-e.
9Bonta nanglitum aning arlo jongsi Arnam a-Karjong do binong tangte, nanglitum ok aning kehang ateng klemkle, bonta Karjong aning kehang alingsi klemlo. Mane abang jongsi Khristo a-Karjong avelo tangte alangli ke Khristo amonit kali. 10Bonta Khristo jongsi nanglitum aning arlo do tangte, pap pen apot nanglitum abang arpum thilotji setta, Karjong nanglitum aphan parengji, pima Arnam nanglitum aphan dhoromi pusi lakhatang-lo. 11Jisu aphan kethitang atum angbong pen parengthusi kepathur a-Arnam a-Karjong jongsi nanglitum along dolo tangte, la Khristo Jisu aphan kethitang atum angbong pen keparengthu abang a-Karjong nanglitum along kedo pen ajok alangli nanglitum kethidetji abang arpum aphan parengji.#1 Kor 3.16
12Tangte lahelo, kortemarli atum, ilitumke epreng kedo atumlo, bonta ok aning kehang ateng keklemji aphan ok alongle ilitum apreng kedo kali. 13Pima nanglitum ok aning kehang atengle do-thak lote nanglitum thikoiji; bonta nanglitum Karjong pen ajok ok akam an pathikoilote, nanglitum rengji. 14Pima Arnam a-Karjong kejapon long atum anke Arnam asomarlo.#Asomar=Grik alam a-Baibel along ke asopo atumpusi tok-lo 15Pima Arnam nanglitum aphan kepi a-Karjong ke nanglitum aphan ban nangpaplangple, lapen kephere aningta nangpipe; bonta Karjong ke nanglitum aphan Arnam asomar nangpaplang-lo, lapen Karjong ajakong pen ajok ilitum Arnam aphan, “O po! O Po!” pu hang-lo. 16Ilitumke Arnam asomarlo pu Arnam a-Karjong mamatsi ilitum akarjong pen pen haki chodunlo. 17Ilitumke alangli somar atumlo apotsi alangli amethang amonit atum aphan kebirtipi ahirjume hei hei ilitum chepahemphudun longji, lapen Arnam Khristo aphan kebirtipi ason ilitum Khristo pen pen chepahemphu longrap rapji; pima ilitum jongsi Khristo pen sung rap rap-lo tangte, ilitumta alangli pen adak atur long rap rapji.
Mo Aphi Kelongji Adak Atur
18Non ilitum kephobom akesung aphan ke mo aphi ilitum aphan ekepaklangji adak atur pen thangnatta pangbardam un-e pusi neli mathalo. 19Kepinchongtang ason an Arnam amethang asomar kechepaklangji aphan ingtungpik pen inghongphrong-lo. 20Pima kepinchongtang ason an thangta kalidet keplangji aphansi Arnam la aphan ado padolo, lapen lake kepinchongtang ason amethang aning kehang apot kali, bonta la lapuson keplangji aphan Arnam aning hang-lo. Tebonta aning kethe lahelo,#Kech 3.17-19 21Mo arni isi kepinchongtang amar an akevir nangji pen jokphlotsi Arnam asomar atum kelong adak atur lapen akejok longdunji. 22Pima ilitum chinilo, arloso atum oso pirthe kepahache ahut akesung asonthotsi la Arnam kepinchongtang ason an nonputa sungsi ar-emjolo. 23Bonta la kepinchongtang amar anchot kali, ili la Arnam aphrangsi adan, atheke Karjong kelong atumta Arnam kur kepon asomar ekepaplangji lapen ilitum abang arpum aphan kepajokji aphan kanghong phrongbom ahut ening arlo ar-emjolo:#2 Kor 5.2-4 24Pima ilitum labangso aning kethe kedo apotsi ilitum jok-long-lo; bonta ilitum jongsi kethek-longtang-lok ason aphansi mo aphi longji pu ning thelo tangte, lake ning kethe binong kalilo; pima kethek-long-lok ason aphan ke matsi mo aphi longji pu aning thebom jilangma? 25Bonta ilitum jongsi kethek-longle ason aphan mo aphi longji pu ning chethedamlo tangte, ilitum ning chepading pen la aphan inghongphrong bompo.
26Lasonthak thaksi Karjongta ili la jakong kave atum aphan erapdunlo. Pima ilitum kopusonsi ardom nangjima, lake ilitum chinine; bonta elamthe pen kepachinidak un-e akar-em pen Karjong amethangsi ilitum aphan Arnam angno echoningripi-bomlo. 27Monit aning kepherei abang, Arnam ke Karjong akematha alam chini; pima Karjong ke Arnam aning kehang atengsi kangthir atum aphan Arnam angno choningripibom.
28Kadokave asonta Arnam ke akeme aphansi keklem athema Arnam aphan kanghon, atheke alangli kam aphan alangli ning kehang ateng kephatang atum pen kam klem rap rap-lo,#Ajehak a-Baibel hastro barim along ke, Arnam aphan kanghon atum aphan akeme aphansi Arnam kadokave asonta klemlo, pusi ketok do pu ilitum chinilo. 29Pima akorte ake-ongpi atum angbong Soposi aklengsi abang keplanglongji aphan Arnam aphrang pen kangvaitang atum Arnam a-Sopo asonthak thak keplangji aphan Arnam aphrang pen pathik-lo. 30Lapen Arnam aphrang pen kepathiktang atum an aphan alangli phalo; lapen alangli kephatang atum aphan dhoromi pusi lakhalo; lapen alangli dhoromi pu kelakhatang atum aphan alangli amethang adak aturta pilo.
Jisu Khristo Pen Ajok Arnam Akanghon Kechepaklang
31Tangte la kadokave alam pen apot ili kopisi pu apot-loma? Arnam jongsi ilitum abe tangte, matsi ephan hai unjima? 32Alangli amethang asopo aphan anta cherairesi ilitum kadokave aphan ajok alangliphan athok ason paplangsi thokdet-lo. Alangli ilitum aphan amethang a-Sopo epidet-lo, tangte alangli ilitum aphan kadokave amarta akejoi pen epipedetjima? 33Arnam kangvaitang atum aphan matsi adai tin unjima? Arnam amethang amatsi halatum aphan dhoromi pu lakhalo. 34Tangte halatum aphan komatsi ado padojima? Baduta ave. Jisu Khristota halatum aphan ado padode. Alangli thilot-lo, lapen la aparta rengthusi Arnam ar-e anat dolo, lapen ilitum aphan Arnam angno echoningripiverlo. 35Tangte ilitum aphan Khristo akanghon pen matsi epaprek unjima? Keduk ma, kesung ma, akhim ma, akephereduk ason ma, mate nokjirma? 36Hastro along ketok asonthotsi,
“Nanglitum pen apot nelitum ke kaiketa kethinangji,
lason akepherememe dolo;
netum aphan ke kethuji abiresak asonsi nepinchongdet-lo.”#Lun 44.22
37Bonta la kadokave do setta ilitumke ephan ekanghon abang pen ajok haithorlo! 38Pima ilitum aphan alangli akanghon pen thangta epaprek un-e pu neli chinilorlo. Kethi tame, kalite reng-etbom settame; sining aphe-rangke atum tame, kalite sining angsong kepangri atum, mate ajakong kedo atum settame; non keplangbom ason tame, kalite mo aphi keplangji ason settame; 39ilitum athak kedo apirthe tame, kalite ilitum arum kedo apirthe settame, kepinchongtang amar angbong pen thangnatta ilitum aphan la e-Hemphu Jisu Khristo pen ajok Arnam ekepi akanghon pen epaprek un-e.
Currently Selected:
ROM 8: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
