ROM 10
10
1Korte marli atum, neli methang amonit atum kejok kelongji aphan neli ning hangpik-lo, lapen neli halatum aphan Arnam angno choningripiverlo! 2Halatum Arnam aphan matha-elo pu neli haki chodun un, bonta halatum kechinipame penle kematha-e kali. 3Arnam monit atum aphan dhoromi kepaplang aron halatum chininedetsi dhoromi keplangji aphan amethang methang abidi pen kebi aron kepathirjisi bor-ilo. Lasi Arnam monit aphan dhoromi kepaplang aron halatum dengdedet-lo. 4Pima kekroi abangphutin dhoromi keplang longji aphan Khristosi Aron pajutdet-lo.
Kejok Ke Kadokave Aphan
5Monit atum Aron kekroi pen ajok dhoromi keplang alam Moses ketok lapuson helo: “Aron ahukum ateng keklem abangphutin labangso Aron pen ajok rengji.”#Levi 18.5 6Bonta kekroi pen ajok dhoromi keplang alam hastro kepudam lapuson helo: “Sining angsong matsi arlu dampoma pu nangmethang aning arlo chepuri.” (Atheke, Khristo aphan nangkepahirji aphan).#Keth 30.12-14 7Lapen ke, “Aklong kave aherangpi along matsi hirdamjima puta puri.” (Atheke, Khristo aphan kethitang atum angbong pen kevanji aphan.)#Keth 30.12-14 8La hastro kepudam alam lahelo: “Arnam alam ke nanglitum adungsi dolo, nangde nangingtur along lapen nangning arlosi dolo.” Netum kepachethang akekroi alam lahelo.#Keth 30.12-14 9Nanglide, nangli ingho pen “Jisu helo Hemphulo,” pu chekobirlote, lapen Arnam alangliphan kethitang atum angbong pen pathursi parengthulo pule nangli ning arlo pen kroilote nangli jokji. 10Pima monit atum aning pen kroisi dhoromi plangji, lapen ade-angtur pen chekobirsi jokji. 11Hastro pulo, “Alangliphan kekroi abang aling aphan ke patherak-re-detji.”#Isa 28.16 12Labangso alam ke kadokave aphansi pudamlo. Pima Jihudi lapen Jihudi kalidet atum angbong thangnat akeprekta avelo, atheke kadokave a-Hemphu inutpet, lapen alangliphan kehang atum an aphan alangli ahirjume pi-o. 13Atheke hastro pulo, “Hemphu amen aphan kehang abangphutin jokji.”#Jol 2.32
14Bonta halatum jongsi kroikre tangte, halatum kopusi alangliphan hangthekjima? Lapen halatum jongsi alangli lamjir arjulongle tangte, halatum kopusi kroithekjima? Lapen alamjir thanthete halatum kopusonsi arjulongjima? 15Lapen toite-te kopusi thandam thekjima? Atheke, hastro along ketok asonthotsi, “Birta Keme kevan atum akam ke ko-an alon kedo!”#Isa 52.7 16Bonta halatum kadokave amat Birta Keme kroipettang-lo, lapu kali. Isaiah amethangsi pulo, “Hemphu, netum alam matsi kroiloma?”#Isa 53.1 17Tangte lahelo, alam karjulong pen ajoksi monit atum kroithekji, lapen Khristo alamjir kepachethang pen ajoksi monit atum la arjulongji.
18Bonta neli arjulang: Tangte labangso akepachethang alam halatum arjulonglelangma? Lapu kali! Atheke hastro pulo:
“Halatum ase pirthe adangta umphlup-lo,
halatum kepu alam pirthe kejut hei hei anta ledampet-lo.”#Lun 19.4
19Lapen neli arjuthupo: Tangte Israel amonit atum chininedetma? Mosessi labangso alam thakdun paphrang-lo:
“Khei binong kalidet amonit atum pen ajoksi ne nangtum aphan kelang-un-e atum nangpaplangji,
lapen keludet akhei atum pen ajoksi ne nangtum aning pathiji.”#Keth 32.21
20Lapen Isaiah ansose phereresi pulo,
“Nephan keriredet atumsi nephan long-lo,
nephan kehumrire atum aphansi ne cheklang-lo.”#Isa 65.1
21Bonta Israel atum alamjir alangli lapusonsi pulo, “La kekroikre lapen kechingkinodak arat aphan ne losini neri deng-elo.”#Isa 65.2
Currently Selected:
ROM 10: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
