ROM 7
7
Pachor-parup Alam Pen Kethan Pajirmidam
1Korte marli atum, neli kepuji alamthe nanglitum chiniji binong, pima nanglitum kadokaveta aron alam chinihurlo. Inut amonit rengtik ansi aron alangli phuthak ajakong dochot. 2Pima inut penan kedotang arloso apenan rengtik anke aron pen ajok alangliphan amethang apenan pen kok-rap-het-lo. Bonta apenan thilot lote, hala apenan pen alangliphan kekok-rap-het aron pen alangli jokphlot-tang-lo. 3Tangte lahelo, apenan kereng un ahut labangpi jongsi anut kaprek apinso pen dorap rap-lo tangte, alangliphan beisapi pusi pudetji; bonta alangli penan thilot-lote labangpi halabangso aron pen jokphlottang-lo, lapen alangli anut kaprek apinso aphan penan dokok setame, lake beisa keklem kalilo. 4Nanglitumta lasonthak thak-lo, korte marli atum. Atheke nanglitum ke Khristo abang a-ok athan hei heilo apotsi, Aron anat ke nanglitumta thilot-tang-lo, lapen ilitum Arnam aphan athe kepathe pithekji aphan nonke nanglitum hala kethi pen kerengthutang abang amonit atumlo. 5Pima ilitum ok aning kehang atengle dolote ilitum pap keklemji aning kehangke Aron pen ajok ilitum abang arlo prungdutsi kam klemvoi titilo; lapen ilitum keklem akam an pen ajok ilitum thi-lo. 6Bonta nonke ilitum Aron pen jokphlottang-lo, pima aphrang ahut ilitum aphan kekokhet amar anat ke ilitum thilot-tang-lo. Nonke ilitum aphrang asonthot ke, atheke hala ketoktang aban-aron ekethan ateng ke klembombelo, bonta Karjong ekeja atengsi ning kemi pen ilitum klemlo.
Aron Lapen Pap
7Tangte ilitum kopisi pu apot-loma? Aron ke pap ma? Lapu kali! Bonta Aron ave asonte neli pap chininedetji apot-lo. Pima “Bang amar konri” pule Aron pupe asonte neli bang amar kekon chininedetji apot-lo.#Keba 20.17; Keth 5.21 8Bonta papke halabangso ahukum pen ajok neli kadokave amar kekonji aphan neli ning keparungji asoi long-lo. Aron avete papke akethitang-lo. 9Aphrang aron kave akoke neli methang amatta reng-etsi dolo. Bonta hukum vangsi pap ke cherengthusap-lo, lapen neli ke thilot-lo. 10Lapen hukum ke kepareng-iji aphansi pilo, setta neliphan ke la kethi-i asonsi nangcheplangdet-lo. 11Hukum pen ajok papke asoi longsi neliphan chobeilo lapen labangso ahukum pen ajok pap ke neliphan pathilot-lo.#Kech 3.13
12Tangte lahelo, Aron ke ingthir-et, lapen hukumta ingthir-et, chokpet lapen mesen. 13Tangte la akeme amarsi neliphan kepathi-i amar plangdet-loma? Lapu kali! Papsi la klemlo; pap amethang a-ot binong keklangdakji aphan papke akemesen amar pen neliphan pathilo. Lasi papke hukum pen ajok hingnomuchot cheplang-lo.
Monit Aning Arlo Kachedansai Alam
14Pima ilitum chinilo, Aron ke Karjong amarlo; bonta neli ke kethidetji amonit-lo, pap aphan kejordet abanlo. 15Neli kopisi klem loma, lake neli chechinine; pima neli keklemji ning kehang akam neli klemkle, bonta neli kehijim akamsi neli klem rong titilo.#Gal 5.17 16Bonta neli jongsi neli ning kehanghe akamsi klemlo tangte, neli ke aron mesen pusi kroidunlo. 17Lasi labangso akam ke neli methangle keklem kali, bonta neli long kedo apapsi la klemlo. 18Neli chinilo, neli ning arlo, atheke neli ot along thangnat akemeta ave. Pima neli keme keklemji ning hang setta neli la keklemji ajakong avelo. 19Pima neli keklemji ning kehang akeme akam ke neli klemklesi neli ning kehanghe, akehingno akamsi neli klemrong titilo. 20Jongsi neli keklemji ning kehanghe akamsi neli klemrong-lo tangte, lake neli methangle keklem kali, bonta neli ning arlo kedo apapsi la klemlo.
21Lasi neli thek-long-lo: labangso aron lasonsi kam klemvoilo, atheke neli keme keklemji ning hang-lo setta neli kehingnosi klem rong titilo. 22Neli ning arlo ke neli Arnam aron ning dok binong-lo. 23Bonta akaprek aron neli bang arlo kam keklemvoi neli chethek-long-lo. Labangso aronsi neliphan nelibang arlo kam keklemvoi apap aron akoidi nepaplang-lo. 24O ko-an keduk kepho abang la neli! La neliphan kethi anat nekeponbom abang arpum pen neliphan matsi nepajokpoma? 25Neli Arnam aphan chorolo, pima Hemphu Jisu pen ajok alangli nepajok-lo.
Tangte neli ke lapuson helo: Nelining pensi neli Arnam aron ateng klem unchot-lo, bonta ok penke neli pap aron atengsi klembomlo.
Currently Selected:
ROM 7: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
