ROM 3
3
1Tangte Jihudi kecheplang pen kopi ale doma? Kalite reng-rot ke-en pen kopi ale doma? 2Ale do, kadokave ahin pen setta lake ale do binong! Aphrangsi ale ke lahelo, Arnam Jihudi atum aphansi amethang alam pilo. 3Bonta halatum angbong manene atum jongsi kekroi thirklongklelo tangte, kopilo keplangpo? Labangso pen apot Arnamta kekroi thirklongkle detjima? 4Jonghe setta lapu kali, abangphutin amonit-le kechobei abang plang setta Arnam ke kaiketa ahokpet abang-lo. Atheke hastro pulo,
“Nangli keningje pen ajok nanglike ahokpet abang-lo pu klang nangji;
lapen nangliphan kangsai ahutta nangli lam hai nangji.”#Lun 51.4
5Bonta jongsi ilitum akechokche pen ajok Arnam ahokpet akam klangdak muchot-lo tangte ilitum pisi pupoma? Arnam ilitum aphan kepasungke Arnamsi akechokche loma? (Monit atum kepu pu asonthotsi neli la pulo.) 6Lapu kali! Arnam jongsi dhoromi abang kali tangte, alangli kopusi pirthe aphan ingsaithek poma?
7Bonta komane abang pu tahai, “Neli keklem akechokche pen ajok jongsi dhoromipet akam klangdaksi Arnam adak atur klangdak muchot-lo tangte, kopi apotsi neliphan papi pu ado ne padolangma?” 8Tangte “Akeme keklangji aphan ilitum kehingno klem lonang,” putong ilitum punangma? Chenamsi, neli labangso alam pulo pusi manene atum neliphan adai tinsi nepinremlo. Halatum kepho nangji asonthotsi halatum aphan ado padovekji.
Dhoromi Abang Inutta Ave
9Tangte Arnam angno ili Jihudi atum hala Jihudi kalidet atum apar memuchot-loma? Jonghe setta lapu kali! Neli aphrangta pulo, Jihudi lapen Jihudi kalidet atum kadokaveta pap ajakong abersi dolo. 10Atheke hastro pulo:
“Dhoromi abang inutta ave,
11kechini abang inutta ave,
lapen Arnam aphan keri abang inutta ave.#Lun 14.1-3; 53.1-3
12Kadokave amonitta Arnam pen sui-ettang-lo,
halatum chokchepet-lo,
akeme keklem abang apakta ave; inutnatta ave.#Lun 14.1-3; 53.1-3
13Halatum alangjoi ke kangpudang atipit asonthak thak-lo;
halatum ade pen chobeilo,
lapen halatum angtur along ruiphe abi dolo;#Lun 5.9; 140.3
14halatum angho ke kehingno ahirjuno pen plengset-lo.#Lun 10.7
15Halatum bang avi kepabu prap-olo;#Isa 59.7-8
16halatum kedam aling monit atum aphan pavirlo lapen pasung-lo.#Isa 59.7-8
17Halatum ning kangsam atovar chinine,#Isa 59.7-8
18lapen halatum Arnam aphan kephere charlile.”#Lun 36.1
19Lasi ilitum chinilo, kadokave amonit atum aphan kepachethak dunji atovar pavedetsi Arnam kadokave amonit aphan kangsai longji aphansi Aron along ketok alam anke Aron aber kedo atum aphanlo. 20Pima Arnam angno ke, Aron ateng keklem apot-le inut amonit aphan dhoromi pu kelakha kali. Pima Aron ke monit atum aphan amethang methang apapsi pachechinichot.#Lun 143.2; Gal 2.16
Kekroi Pen Ajok Dhoromi Keplang Alam
21Bonta nonke Arnam monit aphan dhoromi kepaplang akam paklangdak-lo, lapen lake aron-atang pen ajok kalipinlo. Tebonta Aron lapen Arnam amontri atumta labangso alamjir ahaki pilo. 22Monit atum Jisu Khristo aphan kekroi ajoksi Arnam halatum aphan dhoromi paplang-lo. Khristo aphan kekroi atum an aphan Arnam lapuson klemlo, pima Jihudi lapen Jihudi kalidet atum angbong thangnat akeprekta avelo,#Gal 2.16 23atheke kadokave amonitta pap klemtang-lo lapen Arnam adak atur pen chingbarbedettang-lo. 24Bonta Arnam akangjinso pen ajok Arnam halatum aphan akejoisi dhoromi paplang-lo, lapen lake halatum aphan kepajok abang Jisu Khristo pen ajoksi alangli klemlo. 25Monit atum Khristo aphan kroisi alangli vi pen ajok amethang apap hei hei diya kelongji aphansi Arnam Khristo aphan athok ajir ason paplangsi thokdet-lo. Arnam monit atum aphan dhoromi kepaplang akam kepaklangji aphansi alangli la klemlo. Aphrang ahut ke Arnam aning chepadingsi monit atum apap hei hei alakha en-edet-lo, 26bonta nonke alangli monit aphan dhoromi kepaplang akam kepaklangjisi monit apap hei hei alakha enlo. Lapusonsi alangli amethang dhoromipet akam chepaklang-lo, lapen Jisu aphan kekroi atum an aphan dhoromi pusi lakhalo.
27Tangte ilitum kechepindakji ason doma? Thangta ave! La kopi apotma? Ilitum Aron ateng klemsi dhoromi plang-lo pu chepindak unma? Un-e. Pima Aron ateng keklem apot kali, bonta kekroi pen ajoksi ilitum dhoromi plang-lo. 28Pima monit ke Aron ateng keklem pen ajok-le dhoromi keplang kali, kekroi pen ajoksi dhoromi plang-lo pu ilitum kroilo. 29Kalite Arnam ke Jihudi atum a-Arnamchotma? Alangli ke Jihudi kalidet atum a-Arnamta-lo, kalima? Chenamsi alangli ke Jihudi kalidet atum a-Arnamta lo. 30Arnam ke inutnat, lapen alangli Jihudi atum aphanta halatum akekroi apotsi dhoromi pu lakhaji, lapen Jihudi kalidet atum aphanta halatum akekroi apotsi dhoromi pu lakhaji.#Keth 6.4; Gal 3.20 31Tangte labangso akekroi pen ajok ilitum Aron ale pavedet-loma? Lapu kali; bonta ilitum Aron pathirlo.
Currently Selected:
ROM 3: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
