ROM 2
2
Arnam Akangsai
1Lahelo badu setame, nangli jongsi bang aphan ingsailo tangte, nangli jonghe setta nangli methang ado chepajok un-edetji. Pima nangli bang aphan ingsailo setta halatum keklem akamthotsi klembomlote nangli methangta ado chepadobomlo.#Mat 7.1; Luk 6.37 2Lapuson keklem amonit atum aphan Arnam kangsai ke kechok pame akamlo. 3Bonta O monit, halatum keklem akam apotsi nangli halatum aphan ingsailo setta nangli methang amatta halatum keklem akamthotsi klembomlo! Nangli Arnam akangsai pen jokji pusi chemathama? 4Kalite Arnam akechingkimepik, kangsai kepader lapen aning kechepading apotsi nangli Alangliphan langremrok tahailo. Arnam ke chingkime-o, pima alangli nangliphan aning kepachiruijisi bor-ilo, lake nangli chini binong-lo, kalima? 5Bonta nangli ning ingtangrak lapen buikluihak-lo. Tangte lahelo, mo Arnam aning kethi lapen athikpet akangsai keklangji Arni nangli methang aduk kechepapho muchotji aphansi nangli klembomlo. 6Pima amethang methang akam atengsi Arnam abangphutin aphan anam piji.#Lun 62.12; Sar 24.12 7Penang amonit atum ke akeme akam klembomsi anong kejume, aman lapen kejut un-e achethe ribomlo. Arnam halatum aphan kejut un-e achethe piji. 8Bonta akaprek atum ke amethang alesi rilo lapen kehingno akam keklemji aphansi akeme akam aning dokdedet-lo; Arnam halatum aphan aning kethi pen ingsaiji. 9Kehingno keklem amonit atum an keduk kesung phoji, Jihudi atum paphrangsi Jihudi kalidet atumta la phoji. 10Bonta keme keklem atum an aphan Arnam anong kejume, aman lapen ning kangsam piji; Jihudi atum aphan paphrangsi Jihudi kalidet atum aphan la piji. 11Pima Arnam ke kadokave aphanta kangsai pachingbarpet.#Keth 10.17
12Jihudi kalidet atum ke Moses kepi-tekang Aron ave; halatum pap klemlo lapen Aron avedet setta halatum virkoilo. Jihudi atum ke labangso Aron dolo; halatum pap klemlo lapen Aron along ketok atengsi halatum aphan ingsailo. 13Pima Aron alamthe karjulong apot-le monit atum aphan dhoromi pu kelakha kali, bonta Aron ahukum ateng keklem atum aphansi dhoromi pu lakhalo. 14Jihudi kalidet atum ke Aron ave, bonta halatum amethang aning arlo akematha pen Aron alam ateng keklem ahut halatum Aron ave setta amethang methang mamatsi halatum aphan aron cheplang-lo. 15Halatum aning arlo Aron ahukum hei hei tokdet-lo, lake halatum a-ot pen klangdak-lo. Labangso alam ke ahok pusi halatum aning angthin haki chodunlo, pima halatum akematha, ahut pen ahut ke amethang aphan adai chepadolo, lapen ahut pen ahut ke mesen pusi chepulo. 16Lasi mo Jisu Khristo pen ajok Arnam monit atum aning arlo kemathajoi alam kangsaiji Arni ahut la neli kepachethang a-Birta Keme asonthotsi plangji.
Jihudi Atum Lapen Aron Alam
17Tangte nanglitum Jihudi atum ke? Nanglitum Jihudi pusi chepulo; nanglitum Aron aphan chikilo lapen nanglitum ke Arnam kangvaitang amonit atumlo pusi chepindak-lo; 18nanglitum Arnam aning kehang akam chinilo; lapen ahokpet alam kangvaiji aphan nanglitum Aron along pen charlitang-lo. 19Nanglike amek kave abang aphan keja abang, kangting angbong kedo atum aphan kepathe-ang abang, 20kelu abang aphan kethan kepare abang, lapen osomar atum aphan kethan abang-lo, pusi nangli puthip-lo. Aron along gian lapen ahok alam longpet-lo pusi nanglitum mathathip-lo. 21Nangli anut kaprek atum aphan thanlo, tangte nangli kopi apotsi nanglimethang aphan ke chethanthedetma? “Chong-huri” pusi nangli thanlo; bonta nangli methang amatta chonghulo. 22“Beisa Klemri” pusi nangli pulo, bonta nangli methang amatta beisa klemlo, kalima? Nangli kumlin aphan hijimpik-lo, bonta nangli methang amatsi kumlin kebi ahem along kedo amar inghulo, kalima? 23Arnam aron nanglitum along do apotsi nangli chepindak-lo, bonta nangli Arnam aron kroikresi Arnam aphan patherak-lo, kalima? 24Hastro pulo, “Nanglitum Jihudi atum pen apotsi Jihudi kalidet atum Arnam aphan pinremlo.”#Isa 52.5
25Nangli jongsi Aron ateng klemlo tangte, nangli reng-rot ke-en ale do; bonta nangli jongsi Aron ateng klemkle tangte nanglike reng-rot ke-en-edet ateng-lo. 26Jihudi kalidet atum reng-rot en-e det setta halatum jongsi Aron ahukum ateng klemlo tangte Arnam halatum aphan reng-rot ke-en atum asonthotsi lakhadetji, kalima?
27Lasi Jihudi kalidet atum nangli-tum Jihudi atum aphan ado padoji, pima nanglitum along Aron ketoktang dolo lapen nanglitum reng-rot enlo setta nanglitum Aron ateng klemklelo; bonta halatum ke reng-rot en-edet setta Aron ateng klemlo. 28Tangte ahok areng-rot ke-en, Jihudi binong abang komat-lo? Lake abang athak reng-rot ke-en, athak kechepaklangchot a-Jihudi abang kali. 29Tebonta aning arlo pen Jihudi amonit keplang abang, atheke aning arlo reng-rot ke-en abangsi Jihudi binong-lo; lapen lake Arnam a-Karjong keklem akamlo. Ketoktang Aron pen ajok keplang akam kali. Labangso amonit ke Arnam pen akero long, monit pen kali.#Keth 30.6
Currently Selected:
ROM 2: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
