ROM 1
1
1Jisu Khristo aban, lapen ketoitang abang, atheke Arnam a-Birta Keme kepachethangji aphan Arnam kangvaitang lapen kephatang abang, neli Polsi labangso aloh tok-lo. 2Arnam amethang amontri atum pen ajok labangso a-Birta Keme alam aphrang pen chak-lo, lapen la kechaktang alam halatum hastro kangthir along tok-lo. 3Labangso a-Birta Keme ke Arnam a-Sopo, e-Hemphu Jisu Khristo alamjirlo. Ok anat ke alangli inut David asulo, 4lapen alangli long kedo Arnam Kangthir a-ot anat penke alangli Arnam a-Sopolo. Arnam alangliphan kethitang atum angbong pen pathursi ajakong paklang-lo, lapen labangso pen ajok alangli ke Arnam a-Sopolo pu paklangdak-lo. 5Kadokave akhei amonit atum aphan kepakroiji lapen ahukumta kepakroiji aphan neliphan Jisu Khristo akam kepaklemjisi Arnam amethang akangjinso pen Jisu Khristo pen ajok neliphan ketoitang abang nepaplang-lo. 6Lake nanglitum aphan, atheke Jisu Khristo asangho kepaplangjisi Arnam kephatang, la Rom arongsopi kedo atum aphanta lo.
7Lasi nanglitum aphan, atheke Arnam kechinghon, lapen kangthir atum keplangjisi Arnam kephatang, la Rom arongsopi kedo atum aphan neli labangso aloh tok-lo.
E-Po, Arnam lapen e-Hemphu Jisu Khristo nanglitum aphan kangjinso lapen ning kangsam nangpapinang.
Kero Akardom
8Aphrangsi neli nanglitum pen apot Jisu Khristo pen ajok Arnam aphan chorolo. Pima nanglitum akekroi alam pirthe adangta chethangphlup-lo. 9Neli Arnam a-Sopo a-Birta Keme than pachethangsi neli ning aklong pen Arnam aphan klempibomlo, lake Arnam neli hakilo. Lapen neli kardom abataitinta nanglitum aphan chematha-ponverlo, lake Arnam chinilo. 10La an arni aphi non Arnam amethang aning kehang pen neliphan nanglitum along kepavang unji aphansi neli Arnam aphan choningrilo. 11Pima karjong anat nanglitum ajakong kangtangrak thekji aphan neli nanglitum aphan kopine karjong adan nangkepijisi nanglitum along kevangji aphan ning hang-olo. 12Neli kepudam alam lahelo, labangso pen ajok ilitum cherap seroi longpo, atheke neli methang akekroi pen ajok nanglitum aphan, lapen nanglitum akekroi pen ajok neliphan ning pathe unpo.
13Kortemarli atum, nanglitum chinitha: neli nanglitum along kevangji aphan abatai batai chesik-lo setta kopine ason pen ajok vangthekthedet titilo. Jihudi kalidet, akaprek atum angbong neli athe kelong asonthotsi nanglitum angbongta athe kelongji aphan neli ning hang-lo.#Akam 19.21 14Pima Grik lapen Grik kalidet atum, giani lapen keludet atum aphan neli keklempi nangji adeng dolang. 15Lasi nanglitum la Rom arongsopi kedo atum aphanta neli Birta Keme kepachethangji ingtung-olo.
Birta Keme Ajakong
16Birta Keme pen apot neli therak-re: Pima kekroi abang aling aphan, aphrangke Jihudi atum, labangso aphisi Jihudi kalidet atum aphan Birta Keme ke Arnam akepajok ajakong-lo.#Mar 8.38 17Arnam monit atum aphan kopusonsi dhoromi paplang-loma, lake birta keme paklangdak-lo: lake kecheng pen kejut anta kekroi pen ajoksi plang-lo. Lake hastro along ketok asonthot-lo, atheke hastro along tok-lo, “Kekroi pen ajok dhoromi keplang abang rengji.”#Haba 2.4
Monit Atum Ado
18Monit atum apap lapen ake-hingno akamsi Arnam ahok alamjir akepachinidakji aphan khangthipsi la pachinidak un-edet-lo. Lasi halatum apap lapen akehingno akam apot sining angsong pen Arnam aning kethi halatum aphuthak klolo. 19Pima monit atum Arnam alamjir kechini unji abidi ke halatum aphan klangdak-lo. Arnam amethangsi la halatum aphan paklangdak-lo. 20Arnam pirthe kepinchong ahut penta, kethek-long un-edet Arnam a-ot, atheke Arnam kejut un-epin ajakong lapen a-ot thek-longdak-lo. Monit atum Arnam kepinchong amar hei hei along lahei hei thek-long unlo. Lasi halatum kechethakdunji atovar avelo. 21Halatum Arnam aphan chinilo setta alangliphan kepi nangji anong pipedet-lo, lapen kerota pipedet-lo. Tebonta halatum akematha ke ale kave saidelo, lapen halatum kematha pamethekthe aning ke ingtingthip-lo.#Eph 4.17-18 22Halatum giani pusi chepulo, bonta halatum ke kelu atumlo. 23Halatum kereng-et Arnam aphan ingduk ardomdesi kethidetji api, atheke monit, vo, marat api, pherui hei hei asonthot keselam akumlin aphansi ingduk-ardomrong-lo.#Keth 4.16-18
24Monit atum lapuson akelu apotsi, Arnam halatum aphan odunbupsi halatum amethang aning kehang aling kangthirthe akam lapen lahin lahin aketherakmeme akam cheklem setta Arnam halatum aphan panungdunkuk-lo. 25Halatum Arnam alamjir ahok alam kroikresi ahok-he alam kroirong-lo. Halatum Arnam, atheke kepinchong abang aphan ingduk-ardomdesi Arnam kepinchongtang amar aphansi ingduk-ardomrong-lo. Bonta la Kepinchong a-Bang aphansi kejut un-e akai anta ro-archo nangji apot-lo! Amen.
26Labangso apotsi halatum aning kehang aling aderi-mate akamle klem setta Arnam halatum aphan panung-dunkuk-lo. So-arlo atumta aronre pensi amethang hijan angbong akhat kave akam cheklemlo. 27Lasonthak thaksi pinso atumta arloso penke a-ok-avi kechepapho akam klemklesi pinso hijan angbong aderi-mate kedo akam kecheklemji aphan halatum aning me kangdak ason ingdak-lo. Lapusonsi halatum hijan angbong ketherakmeme akam cheklemlo, la apotsi halatum amethang methang akechokche akam apot halatum kepho nangji aduk pholo.
28Monit atum Arnam alamjir ahok agian amethang aning arlo kechebiji aning hanghedet apotsi, halatum aning kehingno pen a-ot-e akamle klem setta Arnam halatum aphan panungdunkuk-lo. 29Halatum akai angbong ot kelangno akam an, kehingno akam an, mekplengple akam an lapen kechelang selet akam an halatum klempet-lo. Halatum angbong kechelang selet, monit apran ke-en, kecharvo, kepa-chobei lapen kechelang un-e akam hei heisi plengset-lo. 30Halatum lahin lahin chesorsarlo lapen anong chejolo. Halatum ke Arnam aphan kehijim lapen kepinrem, ane kechepathe lapen kechepindak atumlo; halatum aphrang apar kehingno keklem muchotji aphan aning mathalo; halatum api apo alam kroikre; 31halatum kechoklem hingno, halatum amethang kechechak alam ateng klemkle, lapen halatum anut kaprek atum aphan akanghon lapen akangjinso ave. 32Lason keklem atum kethi nangji a-ot do pusi Arnam aron thanlo pu halatum chini. Tebonta halatum amethang mamat lahei hei akam keklembom anchot kali, lahei hei akam keklem atum aphanta mesen pusi rodunlo.
Currently Selected:
ROM 1: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
