ROM 14
14
Nangli Korte Aphan Ingsairi
1Kekroi ajakong kave abang aphan dengnon, bonta alangli akematha alam hei hei pen apot ke alangli pen lam chehiliri.#Kolo 2.16 2Mane abang ke pholok aling cho tame pusi mathaji, bonta kekroi ajakong kave abang ke ajat a-okta choche. 3Pholok aling kecho abang hala kechorupre abang aphan ingsai nangnelo, lapen ajat a-ok kechoche abang hala kechorup abang aphan ingsai nangnelo, pima Arnam alangliphan dengtang-lo. 4Bang aban aphan kangsaiji abang, nangli komatma? Alangli arjap setta, kalite krep setta, alangli amethang a-Hemphu angnosi krepji mate arjapji. Lapen alangli arjapji, pima Hemphu alangliphan keparjapji ajakong do.
5Akaprek arni hei hei apar isi a-arni abang memu pusi komane abang matha, bonta anut kaprek atum ke, kadokave a-arnita chingbarpet-lo pusi matha. Abangphutinta amethang methang akematha alam chokpamelo pu cheputhek pame nangji. 6Hala isi a-arni abang memuchot pu kematha abangta hemphu anong aphansi la mathalo, hala kechorup abangta Hemphu anong aphansi la klemlo, pima alangli Hemphu aphan kero pilo. Ok kechoche abangta Hemphu anong aphansi la klemlo, lapen alanglita Hemphu aphan kero pilo. 7Ilitum baduta emethang methang aphan rengchot nangnelo, ilitum baduta emethang methang aphan thichot nangnelo. 8Ilitum jongsi reng-lo tangte, ilitum Hemphu anong aphansi reng-lo, lapen ilitum jongsi thilo tangte, ilitum Hemphu anong aphansi thilo. Tangte ilitum thi tame, kalite reng settame, ilitumke Hemphu amonit atumlo. 9Pima kereng-etlang lapen kethitang atum a-Hemphu kecheplangjisi Khristo thilo, lapen rengthusi thurlo. 10Tangte nangli kopi apotsi nangli korte aphan ingsailoma? Lapen nangli kopi apotsi nangli korte aphan langremloma? Pima ilitum kadokaveta Arnam akangsai angno arjapji.#2 Kor 5.10 11Pima hastro pulo,
“Hemphu pulo, neke reng-et binong-lo,
asonthotsi abangphutinta ne ingno akengphu patongji.#Isa 45.23
Lapen ne helo Arnamlo pu abangphutinta chekobirji.”
12Lasi ilitum abangphutinta Arnam angno emethang methang akam alakha chepinangji.
Nang Korte Aphan Pap Paklemri
13Tangte lahelo, non pen apara ilitum lahin lahin aphan chingsai nangnelo. Labangso alar nanglitum akorte atovar along kepatekung-i athengtut, kalite kekhang-i amar kaiketa bibelo pule nangning mathathipnon. 14Neli Hemphu Jisu pen kechelangpet pen ajok, neli chinipamelo, thangnat amarta amethang amat ke thangnat akangthirtheta ave, bonta inut abang jongsi isi amar aphan ingthirthe pusi kroilo tangte, alangliphan ke labangso amar ingthirthedettang-lo. 15Nangli jongsi nangli kecho amar pen ajok nangli korte aphan aning aduk pilo tangte, nanglike kanghon penle keklem kalilo. Nangli kopine amar kecho pen ajok hala Khristo amethang apran kechepidet abang aphan pavirlongri. 16Anut kaprek atum nangli mesen pu kehok ason aphan hingno pu papinrem longlenang. 17Pima Arnam a-Rat ke kecho kejun alam kali, bonta lake Karjong Kangthir pen ajok dhoromipet pen kedo, ning kangsam lapen ning arong helo. 18Lapen Khristo aphan lapuson keklempi abang ke Arnam aning padok, lapen monit aphanta aning padok.
19Tangte, ilitum angbong ning akechingsam kevanji lapen lahin lahin akekroi kechepathirjile ilitum kaiketa bor-ilonang. 20Kecho amar pen ajok Arnam keklemtang akam pavirri, kado-kave amarta chotame tema, tebonta kecho amar pen ajok bang aphan pap kepaklo ke hingno. 21Nangli korte jongsi pap klodetji tangte, nangli ok choche, hor junje, kalite lason akaprek akamta klemkledetsi keme. 22Lahei hei alam aphuthak nangli methang akekroi alam ke nangli lapen Arnam angbongle pachinichotnang. Inut amonit eson akam mesen pu mathasi klemdet aphi amethang aphan ado kechepado movedet abang rengme. 23Bonta choji choche, lason aning ketekuk-rem abang ke, cholote Arnam alangliphan ado pado. Pima alangli kekroi penle kecho kalilo. Klem aling setta kekroi penle paklongra keklem kalite pap-lo.
Currently Selected:
ROM 14: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
