MARK 2
2
Inut Thi-klak Abang Aphan Jisu Kepame
(Mat 9.1-8; Luk 5.17-26)
1Penang arni aphi Jisu puthot Kapernaum arongsopi chevangthulo, lapen alangli hemsi do pu alam chethangphlup-lo. 2Ansi monit chingrumpik-lo; lasi inghap athengno anta adim chejangjedet-lo, lapen alangli halatum aphan lam thanbomlo. 3Halabangso ahut bangphli amonit atum inut thi-klak abang aphan nang-charchongrinsi Jisu adung vanlo. 4Bonta hadak armu ongpik-lo apotsi halatum labangso amonit aphan Jisu adung ponthekthedet-lo. Lasi Jisu kedo angdenchit hem asarnung phrivongsi thi-klak abang aphan atar pen pasunlo. 5Jisu halatum akekroi thek-longsi thi-klak abang aphan pulo, “Nangpap hei hei diyatang-lo, po.” 6Ansi hadak kangniphrong manene atum amethang methang aning arlo mathalo, 7“Labangso amonit kopusi lason ningje hailoma? Lake Arnam aphan kepinremlo. Inutnat, atheke, Arnam apar matsi pap diya unjima?” 8Jisu hala mamat halatum aning arlo kematha alam chinisi halatum aphan pulo, “ Nangtum kopi apotsi nangtum aning arlo lason alam mathaloma? 9La thiklak abang aphan, ‘Nangpap hei hei diyatang-lo,’ pu keputong kejoima, mate, ‘Thurra, nang tar cheponra kengkam chejornon,’ pu keputong joimuma? 10Tangte pirthe athak Monit a-Sopo pap hei hei kediyaji ajakong do pu angthek nang paklangpo.” Lasi alangli hala thi-klak abang aphan pulo, 11“Ne nangphan nangpulo, thurnon, lapen nangtar cheponra nanghem chedamnon.” 12Alangli thurlo, lapen hala mamat atar cheponsi kadokave angno damlo. Kadokave atum manghuphrong-lo, lapen Arnam anong pathesi pulo, “Netum lason ke thek-longle-pinlang!”
Jisu Levi Aphan Kehang
(Mat 9.9-13; Luk 5.27-32)
13Jisu puthot Galili atalo akung-kung damlo. Armu atum alangli long vangbomlo, lapen alangli halatum aphan lam thanbomlo. 14Alangli dambom dambomsi Alpheus asopo, Levi aphan midu kerung ahem amaro along kangnilun thek-long-lo, lapen Jisu alangliphan pulo, “Ne long nangdunnon.” Levi thursi alangli phi phi dunlo.
15Aphi Levi ahemsi Jisu an cholo. Midu kerung ake-ongpi atum lapen papi atumta Jisu lapen asangho atum along ingni-dunphrong-lo, pima ake-ongpi atum Jisu along dunlo. 16Pharisi abe atum angbong aron thekser atum Jisu aphan papi atum lapen midu kerung atum pen an kechorap rap thek-longsi asangho atum aphan pulo, “Alangli kopi apotsi midu kerung lapen papi atum pen chorap-rap-loma?” 17Jisu la arjulongsi halatum aphan thakdunlo, “A-ok apran kemesen atum ke daktor nangne, bonta kesodet atumsi daktor nangji. Dhoromi atum aphan kephajisi ne vang-lo, lapu kali, bonta papi atum aphan kephajisi ne vang-lo.”
An Kehum Alam
(Mat 9.14-17; Luk 5.33-39)
18Halabangso ahut Jon asangho atum lapen Pharisi asangho atum an humlo. Manene atum Jisu adung vangsi alangliphan arjulo, “Kopi apotsi Jon asangho atum lapen Pharisi asangho atum ke an humlo setta nang sangho atum ke an humhedet-loma?”
19Jisu halatum aphan thakdunsi pulo, “Piso kepangri along nangkedun atum an hum nangjima? Lapu kali. Piso kechepangri apinso abang halatum angbong dotik ke halatum an humhe. 20Bonta mo lason arni vangji, halabangso arni piso kechepangri apinso aphan halatum angbong pen pondetji. Anke halatum an humhurji.
21“Baduta kechetuttelang ape kemi pen pe ban bang-i-e. Lapuson bang-lote, hala akemi ape chetutsi aban ape aphan vungphlinji, lapen kerak adim thethumuchotji. 22Lapen baduta ok-reng abong aban along drakha ahorlang kemi pangpenpe. Lapuson pangpen lote, drakha ahorlang ok-reng abong pangbopdakji. Anke drakha ahor lapen abongta virdetji. Drakha ahorlang kemi ke ok-reng abong kemi alongsi pangpen nangji.”
Sabbath Arni Alam
(Mat 12.1-8; Luk 6.1-5)
23Sabbath Arni Jisu sok ajo dongponputsi damlo. Alangli sangho atumta alangli long dunlo, lapen halatum sok abu ingthon ponbomlo.#Keth 23.25 24Ansi Pharisi atum Jisu aphan pulo, “Langtha, nangli sangho atum ke kopi apotsi Sabbath Arni keklem longle akamta keklem loma?” 25Jisu halatum aphan thakdunsi pulo, “David akenang kedo ahut lapen alangli an kangchir ahut alangli kopi klem loma, labangso alam nangtum porhehe pin langma?#1 Sam 21.1-6 Alangli lapen alangli long kedo amonit atum an ingchirlo; 26lasi alangli Arnam ahem arlo lutdamsi Arnam aphan kethok ahim cholo. Lake Abiathar Kurusar Kethenei keplang ahut-lo. Ilitum Aron ateng ke kurusar atum apar ke baduta la cholongle. Bonta David ke la cholo, lapen ari asangho atum aphanta pilo.”#Levi 24.9 27Lapen Jisu halatum aphan pulo, “Arnam ke Sabbath Arni aphansi monit pinchong-lo, lapu kali, bonta monit aphansi Sabbath Arni pinchongpilo. 28Lasi Monit a-Sopo helo Sabbath arni anta a-Hemphulo.”
Currently Selected:
MARK 2: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
