MARK 3
3
Jisu Inut Ari Kekrenghak Abang Aphan Kepame
(Mat 12.9-14; Luk 6.6-11)
1Jisu puthot sinagog arlo damthulo. Hadak inut ari ehong ke krenghak amonit dolo. 2Hadak kedo manene atum ke alangliphan adai ketinji abidi risi, alangli Sabbath Arni labangso amonit aphan keso pamejima pusi alangliphan langdunding-lo. 3Alangli hala ari ke krenghak abang aphan pulo, “Thurra ladak mei angbong vangnon.” 4Lapen alangli halatum aphan pulo, “Sabbath Arni ke keme akamsi klemlongma, mate kehingno akamsi klemlongma? Apran keraima, mate apran kepavirtong longma?” Bonta halatum doklip-lo. 5Alangli aning kethi pen halatum aphan talavir lang-lo; bonta halatum aning buiklui-hak-huk apotsi alangli ning dukparlo. Ansi alangli halabangso amonit aphan pulo. “Nangri chephejeng non.” Alangli ari chephejeng-lo, lapen ari medet-lo. 6Pharisi atum sinagog pen barsi hala mamat Herod abe atum pen chetongdamlo, lapen halatum alangliphan kepathiji abidi chingvailo.
Talo Akung Armu Atum Kechingrum
7Jisu amethang asangho atum pen pen Galili atalo anat damlo, lapen armu ake-ongpi atum alangli phi phi dunlo. Latum Galili adet, Judia adet, 8Jerusalem arongsopi, Idumia adet, Jordan hapu parai adet, Tair lapen Sidon arongsopi adung arei ahavar hei hei pensi vang-lo, pima latum Jisu keklem akam alam arjulong-lo. 9Armu ongpik apotsi armu atum Jisu aphan kepet-het-hedetji aphan Jisu amethang asangho atum aphan telongso isi pathiktoilo. 10Pima alangli penang atum aphan keso pamelo. Lasi keso atum an alangliphan ke-otjisi jasemet chepetdunlo.#Mar 4.1; Luk 5.1-3 11Lapen kangthirthe ahi-i kepho atum alangliphan thek-long-lote, halatum alangli ingno krepthorsi lapen hangsersi, “Nang ke Arnam a-Sopolo,” pu pupulo. 12Bonta alangli komatma, la halatum badu aphanta kethanthe-detjisi alangli hi-i atum aphan hukum pi pasodak-lo.
Jisu Bang Krehini Atum aphan Kangvai
(Mat 10.1-4; Luk 6.12-16)
13Ansi Jisu inglong arludamlo, lapen alangli kenangji amonit atum aphan amethang adung hang-lo, lapen halatum alangli dung vang-lo. 14Alangli bang krehini aphan ingvailo, lapen latum aphan alangli ketoitang atum pusi pulo. Alangli halatum aphan pulo. “Nangtum nelong nangkedodunji lapen nangtum kepachethang-damji aphanta ne nangtum aphan nangketoijisi ne nangtum aphan ingvaitang-lo, 15lapen nangtum hi-i atum aphan kephlungji ajakong longpo.”
16Alangli kangvai bang krehini atum lahelo: Simon, (Jisu alangliphan Pitor pusi amen irlo.) 17Jebedi asopo Jems lapen Jems akorte Jon, (Jisu la banghini aphan Bonerges pusi amen irlo; Labangso alam atheke sining kangder asonthak thak amonit, puhelo.) 18Andriu lapen Philip, Bartholomeu lapen Mathiu, Thomas lapen Alpheus asopo Jems, Thadeus lapen Kanaan a-Simon, 19lapen Jisu aphan hotur arideng kehodai abang, Judas Iskariot.
Jisu Lapen Beelzebul Alam
(Mat 12.22-32; Luk 11.14-23; 12.10)
20Ansi Jisu ahem chedamlo. Lapen puthot armu ake-ongpi atum chingrumlo. Lasi Jisu lapen asangho atum an kechoji anta apor longledet-lo. 21Jisu ahem asangho atum la arjulongsi alangliphan kekhangjisi vang-lo; pima monit atum, “Alangli ke ingchamlo,” pusi Jisu aphan puhurlo.
22Jerusalem pen kevang manene aron thekser atum pulo, “Alangli Beelzebul pu ahi-i pholok-lo; lapen alangli hi-i atum aphan kephlungji aphan hi-i atum arechosi alangliphan jakong pilo.”#Mat 9.34; 10.25
23Lasi Jisu halatum aphan amethang adung chehangsi lamlir hei hei pen pulo, “Kopusi Soitanle Soitan aphan phlung unjima? 24Lapen isi arat abe abe dosi charvolote, labangso arat ke do thekthedetji. 25Lapen ihum ahem amonit atum abe abe dosi halatum angbong chebohong lote, labangso ahem ke thirthedetji. 26Lasi Soitanta amethang abe chethursi abe abe dolote, alangli dover thekthedetji, bonta la jutdetji.
27“Jakong kangtangrak abang aphan kok paphrangphrete, la jakong kangtangrak abang ahem lut dam un-e, lapen amar atar thipon un-e; bonta alangliphan kokdet aphisi ahem kuruk pon-unji.
28“Chenamsi ne nangtum aphan nangpulang, monit atum apap an lapen Arnam aphan kepinrem apot anta diyadetji, 29bonta badutame, Karjong Kangthir aphan pinrem lote, alangli kaiketa diya longledetji, pima alangli kaiketa diya kelong un-epin apap klemtang-lo.”#Luk 12.10 30Manene atum Jisu aphan, “Alangli kangthirthe ahi-i pholok-lo,” pu kepu apotsi Jisu labangso alam pulo.
Jisu Apei Lapen Akorte Atum Alam
(Mat 12.46-50; Luk 8.19-21)
31Ansi Jisu apei lapen akorte atum hadak nanglelo. Halatum hem angtan arjapphrongsi Jisu aphan pahangdamtoilo. 32Armu atum Jisu aphan komsarsi ingniphrong-lo, lapen halatum alangliphan pulo. “Langtha, nangli pei, nangli korte atum lapen nangli ingjir atum ingtansi do, lapen halatum nangliphan rilo.” 33Alangli halatum aphan thakdunsi pulo. “Nepei lapen nekorte atum komatma?” 34Alangliphan komsarsi kangniphrong atum aphan alangli talavir langsi pulo. “Langtha, neli pei lapen neli korte atum ke latumhelo. 35Ne-Po kepaklemtoi ateng keklem abang aling helo neli korte, neli ingjir lapen nelipeilo.”
Currently Selected:
MARK 3: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
