MARK 1

Jon Baptist Kepachethang Alam

(Mat 3.1-12; Luk 3.1-18; Jon 1.19-28)

1Jisu Khristo, atheke Arnam a-Sopo#Ajehak a-Baibel hastro barim along ke “Arnam a-Sopo,” pu alam ave alamjir a-Birta Keme kecheng lapu helo. 2Lake Arnam amontri, Isaiah ketok asonthot-lo, atheke alangli tok-lo:

“Arnam pulo, ‘Chini iktha,

ne nepherangke nangphrang toipo,

alangli nangphan tovar nang sik pipo.’#Mala 3.1

3Komane abang kejejangtang ajo hangkongsi pulo,

‘Hemphu aphan tovar sikpinon,

alangli kedamji aphan isi kengset atovar thikpinon!’”#Isa 40.3

4Lasi Jon kejejangtang ajo cheklangsi baptisom pibomlo#Ajehak a-Baibel hastro barim along ke Baptisom pibomlo, pu alam ave lapen pachethang bomlo. Alangli monit atum aphan pachethangsi pulo, “Pap pen nanglitum aning chiruira baptisom ennon; anke Arnam nanglitum apap hei hei diyapo.” 5Judia adet amonit atum an lapen Jerusalem arongsopi kedo atum an alangli dung dambomsi Jordan alangroi along alangli rideng baptisom enbomlo. 6Jon ke ka-ut angmi apesi chepindeng-lo, lapen ok-reng achepansi avam chekok-lo, longvur lapen nampi apijo alangsi chobom-junbomlo.#2 Rec 1.8 7Alangli monit atum aphan pachethangsi pulo, “Nepar ajakong kethemu abang nephi vangjilang; alangli keng-op ari kephrijira kangkupdiji aphan anta ne-ot ave. 8Neke nanglitum aphan lang pensi baptisom nangpilo, bonta alangli ke Karjong Kangthir pensi nanglitum aphan baptisom pipo.”

Jisu Baptisom Ke-en Lapen Alangliphan Asat Kelang

(Mat 3.13—4.11; Luk 3.21-22; 4.1-13)

9Halabangso arni ahut malom Jisu Galili adet kedo Najareth arongsopi pen vangsi Jordan alangroi along Jon arideng baptisom enlo. 10Lapen alangli lang pen nang arlukrak pen mamat sining kangpudang lapen vothung ason Karjong alangli long nangkehir alangli thek-long-lo. 11Lapen sining pen ase vangsi pulo, “Nang ke ne kechinghon a-Sopolo. Nangphan ne ningdok-olo.”#Kech 22.2; Lun 2.7; Isa 42.1

12Lapen hala mamat Karjong alangliphan kejejangtang ajo padamlo. 13Hadak alangli jo phlikep ni phlikep dolo, lapen Soitan alangliphan asat lang-lo. Hadak alangli nampi api atum pen dorap rap-lo, lapen sining apherangke atum alangliphan ruthaibomlo.

Jisu Kam Keklem Kepangcheng

(Mat 4.12-17; Luk 4.14-15)

14Jon aphan phatek bengdet aphi Jisu Galili alongri vang-lo, lapen Arnam pen kevang a-Birta Keme pachethangsi pulo, 15“Ahut choktang-lo, lapen Arnam a-Rat vangtang-lo! Nangtum apap hei hei pen ning chiruira Birta Keme kroinon.”

Ok Keri Amonit Bang Phli Aphan Jisu Kehang

(Mat 4.18-22; Luk 1.11)

16Jisu Galili atalo akung kung kedam un ahut alangli Simon lapen akorte Andriu aphan talo along lan pen ok kenep thek-long-lo; pima halatum ke ok kenep amonit atumlo. 17Jisu halatum aphan pulo, “Ne long nangdunnon, ne nangtum aphan monit kenep atum nangpaplangpo.” 18Halabangso ahut mamat halatum alan hei hei che-otekangsi alangli phi phi dunlo. 19Lapen alangli aphrang anat asapso damchotsi Jebedi asopo, Jems lapen akorte Jon aphan thek-long-lo; halabangso ahut halatum telong arlo lan thik bomlo. 20Hala mamat halatum apo Jebedi aphan hadak telong arlo kedo kechongdat atum along otekangsi alangli phi phi dunlo.

Jisu Hi-i Kepho Abang Aphan Kepame

(Luk 4.31-37)

21Jisu lapen asangho atum Kapernaum arongsopi damlo, lapen halatum keledam pen puthot a-Sabbath#Sabbath Arni: Throksi arni. Lake Bhomta arni (Friday) arni kechi ahut pen Bhomti arni (Saturday) arni kechi ahut anlo. Arnam nithrok angbong kadokave kepinchong patangsi la throksi arni sang-lo. Arnam labangso arni pangthirlo, lapen Israel atum labangso arni kam che-osi sang nangji pusi hukum pilo. Lake hukum kep angbong pen isi ahukumlo. Sinagog: Jihudi atum bithe bitha adet Arnam aphan Kardom-kangduk adim. Jihudi atum ladak Arnam alam chethan lapen halatum angbong chingsai. Arni alangli sinagog arlo dunsi lam thanlo, 22lapen halatum alangli kethan alam pen apot manghuphrong-lo; pima alangli aron thekser atum asonthak thaksi thanlo, lapu kali, bonta hukum kepiji ajakong kedo abang asonthak thaksi alangli halatum aphan thanlo.#Mat 7.28-29

23Halabangso ahut mamat kangthirthe ahi-i kepho abang sinagog arlo vang-lo, lapen alangli hangsersi pulo, 24“Najareth a-Jisu, nang netum along kopi akam doma? Nang netum aphan kepavirjisi ladak netum along vang-loma? Nang komatma, lake netum chinilo. Nang ke Arnam pen kevang kangthir-et abang-lo.” 25Jisu la aphan ingcheksi pulo, “Dojoinon, lapen alangli long pen nangbarnon.” 26Ansi kangthirthe ahi-i halabangso amonit aphan jasemet heveng-lo, lapen ase kethe pen hangsersi alangli long pen nangbarlo. 27Kadokave amonit atum manghuphrong-lo; lasi halatum lahin lahin charju seroisi pulo, “La kopi plang-loma? Kopine akaprek kethanmi alamma? Pima labangso amonit kangthirthe ahi-i atum aphan anta hukum kepi un ajakong dolo, lapen halatum alangli lam kroilo.” 28Halabangso ahut pen mamat Galili alongri adang bithe bitha adimta alangli nong chethangphlup-lo.

Jisu Ongdung Atum Aphan Keso Kepame

(Mat 8.14-17; Luk 4.38-41)

29Jisu sinagog pen nangkebar pen mamat Jems lapen Jon atum pen pen Simon lapen Andriu atum ahem damphit-lo. 30Halabangso ahut Simon anipi aphu keso pen pangjilo, lapen Jisu nangkele pen halatum Alangliphan labangpi alamjir thanlo. 31Alangli labangpi adung vangsi labangpi aphan ari pen ingthurlo. Ansi labangpi aphu keso medet-lo, lapen labangpi halatum aphan ru-thailo.

32Arni chidet aphi, ingtingte aphrang halatum Jisu along keso atum an lapen hi-i kepho atum an vanlo. 33Rong isi amonit inghap athengnosi chingrumpet-lo. 34Akaprek kaprek akeso kelong ake-ongpi atum aphan Jisu pamelo, lapen ongdung ahi-i phlung-lo. Alangli hi-i atum aphan paningje longledet-lo, pima halatum alangliphan chinihurlo.

Jisu Galili Adet Kepachethang

(Luk 4.42-44)

35Adap the-ang prinprele apor Jisu thursi hem pen nangbarlo, lapen monit kavedet adim damsi Arnam ardomdamlo. 36Bonta Simon lapen ari asangho atum alangliphan ridunlo. 37Halatum alangliphan chetongsi alangliphan puhurlo, “Kadokave atum nangliphan riphrailo.”

38Alangli halatum aphan pulo, “Neli tebok terei arongta kepachethangthekji aphan ili dak pen damlonang; pima ne labangso akam aphansi vang-lo.”

39Ansi alangli sinagog hei hei along pachethang ponbomsi Galili adet adang an damtup-lo, lapen hi-i atum aphan phlungbomlo.#Mat 4.23; 9.35

Si-i Arok Akeso Kelong Abang Aphan Kepame

(Mat 8.1-4; Luk 5.12-16)

40Inut si-i akeso kelong abang Jisu adung vang-lo, lapen alangli akengphu patongruisi Jisu aphan choningrisi pulo, “Nangli jongsi nanglining hangte, nangli neliphan nepangthir un.” 41Jisu alangliphan ingjinsolo, lasi alangli ari chirungsi abang ot-lo, lapen pulo, “Nening hang-lo, ingthirnon.” 42Hala mamat alangli si-i akeso pen medet-lo, lapen alangli ingthirlo. 43Ansi Jisu alangliphan padamlo, lapen kepu pasodak-lo, 44“Nang labangso alam badu aphanta thanri, bonta nangphrang kengdet damra kurusar aphan chepaklang damnon; lapen nang metang-lo pu kadokave atum aphan angthek kepaklangjile Moses hukum kepi asonthot athok thok-damnon.”#Levi 14.1-32

45Bonta alangli damsi bithe bitha adimta labangso alam than pachethang-lo. Lasi Jisu damjoijete nohok arongsopita lutdam thekthedet-lo, bonta monit kavedet ajosi do damlo, lapen bithe bitha adim pen monit atum alangli long vangpet-lo.

Currently Selected:

MARK 1: KARBIBSI

Highlight

Copy

Compare