MATHIU 6

Dan Kepi Alamthe Kethan

1“Monit atum angno nangtum adhoromipet akam kepathek longledetjile cherehurnon. Jongsi nangtum kadokave kepathek-phrong akam klem lote, sining athak kedo Po along nangtum anong-e ave.#Mat 23.5

2“Tangte nangtum keduk kelak atum aphan dan kepi ahut monit atum pen anong kelongji aphan, hala angthin ke-ik atum ason kardom ahemheihei along, lapen tovar along along nang methang aphrang pong-ut chebut-ri. Chenamsi ne nangtum aphan nangpulang, halatum kelong nangji anong-e an longtang-lo. 3Bonta keduk kelak atum aphan nang dan kepi ahut labangso adan kepatu adan kecheplangji aphan nangri ar-e keklem akam, 4nangri arvi pachini longri, lapen kechepatu pen kethek long abang, nang Po nangphan anam nangpiji.

Kardom Alamthe Kethan

(Luk 11.2-4)

5“Lapen nangtum kardom ahut hala angthin ke-ik atum ason cheplangri; pima monit atum kepathek dunlongjisi latum kardom ahem-heihei along, lapen tovar samepi kechekok adim karjap-ra kardomjisi aning dokpik-lo. Chenamsi ne nangtum aphan nangpulang, halatum kelong nangji anong-e an longtang-lo.#Luk 18.10-14 6Bonta nang kardom ahut nang sirkut chelut damra anghap inghap-hetnon, lapen kechepatu adim kedo, nang Po aphan ardomnon. Lapen nang Po ha kechepatu pen kethek long abang nangphan anam nangpiji.

7“Lapen kardom ahut kekroikrelang atum ason thakthak akejoijepi alam chenglemdet-ri, pima alam ake-ongpi pen apot Arnam arjuji pusi latum mathalo. 8Tangte nangtum halatum ason cheplangri, pima nanglitum alangli long chohanghe ako penta nangtum a-Po nangtum akehang ason an chinilo. 9Tangte nangtum lapusonle ardomnon:

‘Sining athak kedo netum a-Po,

Nangmen pangthirnang;

10Nangrat pavangnang;

Sining athak asonthot-le,

pirthe athakta nangning kehang paplengnang.

11Pini netum kenangji a-an pini netum aphan nepitha;

12Lapen netum along apreng kedo atum aphan,

netum kediyatang asonthot-le;

netum aprengta nediyatha.

13Lapen asat kelangjile netum aphan neponrinon,

bonta kehingno ajakong pen netum aphan nepajoktha.’

‘pima nangrat lapen jakong lapen anong, akai apar akai anta padonang.’

14“Nangtum jongsi bang akelet hei hei diya lote, sining athak kedo nangtum a-Po nangtum aphanta nang-diyapo.#Mar 11.25-26 15Bonta nangtum jongsi bang aphan diyaje dette nangtum a-Pota nangtum akelet hei hei diyajedetpo.#Jem 5.2-3

An Kehum Alamthe Kethan

16“Lapen nangtum an kehum ahut angthin ke-ik atum ason ke nangtum amahang chepa-ikkuiri. Pima latum an humlo pu monit atum aphan kepachiniji aphan latum amahang chepa-ikkuilo. Chenamsi ne nangtum aphan nangpulang, halatum kelong nangji anong-e an longtang-lo. 17Bonta nang an kehum ahut nangmahang chingmurnon, lapen nangphu jangthu chepatip-ra nangchu chingsok-lepnon, 18lapen ajok anut kaprek atum nang an humlo pu pachininenang; bonta kechepatu pen kethek long abang nang Po la pachini nang, lapen kechepatujoi abang, nangtum a-Po anam nangpiji.

Sining Athak Akhi

(Luk 12.33-34)

19“Pirthe athak nangtum akhi chobirtiri; atheke ingki lapen ingru phangnodetji lapen kanghu atum hem arlo lutsi la chonghu pondetji,#Jem 5.2-3 20bonta sining athak-le nangtum akhi chobirti non, hadak ingki kalite ingru ta phangnone, lapen kanghu atum lutsi inghuhe. 21Pima kodakma nangkhi kedo, hadaksi nang ningta do-eji.

Ebang Arpum Akethe-ang

(Luk 11.34-36)

22“Ebang arpum amelur ke emek helo. La helo nangmek jongsi mesen lote nang bang arpumta the-ang-dangpo. 23Bonta nangmek jongsi hingno lote nang bang arpumta ingtingkukpo. Tangte nanglong kedo akethe-ang jongsi ingtingkuk lote labangso akangting kopu-an aklolin manpo!

Arnam Lapen Pirthe Akhi

(Luk 16.13; 12.22-31)

24“Badutame hemphu bang hini aphan chongduk rappet un-e, pima alangli la inut abang aphan langseletpo lapen anut kaprek aphan inghonpo; kalite inut abang aphan ahukum kroipo, lapen akaprek aphan hijimpo. Nangtum Arnam lapen tangka aphan ingduk rappet un-e.

25“La apotsi ne nangtum aphan nangpulang, nangtum apran aphan, atheke, nangtum kopisi chojima, kopisi junjima, kalite nangtum kopisi che-umjima, la ningbiri. An apar epran themu, lapen pe-ri apar e-ok themu, kalima? 26Nampi avo atum aphan langtha: latum rikta rik-re, rotta rot-re lapen apuruta thapthe; tebonta sining athak kedo nangtum a-Po latum aphan pacholongbom. Latum apar nangtum ador somu, kalima? 27Lapen nangtum angbong komatsi aning chepa-oi pen amethang achethe cherso chepading muchot unjima?

28“Lapen pe-ri aphan nangtum kopi apotsi ning bi loma? Rit amir-tado kopusonsi chingjok-lo, lale lang pamenon; latum kamta klemkle, lapen amethang aphan honta jengje, 29bonta ne nangtum aphan nangpulang, Solomon ahir-asang pen setta la epu amir ason thakthak alon ave.#1 Rec 10.4-7; 2 Phur 9.3-6 30Tangte pini kedo, lapen penap ke mehip along kephrindunji ahidi abap aphan jongsi Arnam lapu-an alon padolo tangte la apar nangtum aphan kopu-an alon pipo? O nang kekroi parpe atum!

31“Tangte kopisi chopoma, kalite kopisi jun poma, lapen kopisi che-um poma pura ningbiri. 32Pima kekroikre atum la kadokave aphan river. Nang-tum la kadokave akenangji alam sining athak kedo nangtum apo chinilo. 33Bonta aphrangsi nangtum Arnam a-Rat lapen alangli aning kehang kopima, lale ri paphrang non, lapen la kadokave nangtum aphan nangpidetji. 34Lahelo penap aphan nangtum ningbiri; pima penapta amethang aningbi doji. Lasi arnivang akesung along la pa-ong dun nangnelo.

Currently Selected:

MATHIU 6: KARBIBSI

Highlight

Copy