MATHIU 5
5
Inglong Athak Jisu Kethan Alam
1Jisu armu ake-ongpi atum aphan thek-longsi ha inglong arlu damsi ingnilo. Asangho atum alangli long vang-lo, 2lapen alangli halatum aphan thansi pulo:
Ahok Akerengme
(Luk 6.20-23)
3“Akarjongsi keduk atum rengme,
pima sining a-Rat halatum arat lo!
4“Munduk atum rengme,
pima halatum aning pliji!#Isa 61.2
5“Asotdut atum rengme,
pima halatum pirthe chepahemphuji!#Lun 37.11
6“Dhoromi akam aphan kangchir lapen kang-it atum rengme,
pima halatum ingkrangji!#Isa 55.1-2
7“Kangjinsothek atum rengme,
pima halatum kangjinso longji!
8“Aning ingthir-et atum rengme,
pima halatum Arnam aphan thek longji!#Lun 24.3-4
9“Aning kepangsamthek atum rengme,
pima halatum aphan Arnam asomar pusi chethangji!
10“Dhoromi akam apot kechenek kepho atum rengme,
pima sining arat halatum arat-lo.#1 Pit 3.14
11“Mo ne pen apot nangtum aphan kepinrem,
kechenek lapen akejoije pisi nangtum aphan kadokave akehingno alam nangkebokthap ahut nangtum rengme.#1 Pit 4.14
12Chehok-ra ning arong parpiknon, pima sining athak nangtum anong-e the-o; pima nangtum vangve ako halatum montri atum aphanta lasonsi chenek-lo.#2 Phur 36.16; Akam 7.52
Ingti Lapen Kethe-ang
(Mar 9.50; Luk 14.34-35)
13“Nangtumsi pirthe angtilo, bonta ingti jongsi lamdak-lo tangte, la kopi alongsi jokmejima? La ingtan pavar-chorra monit atum kepadongriji apar ke thangnat akamta vang-i-elo.
14“Nangtumsi pirthe akethe-ang-lo, inglong athak kekim arongsopi ke patu un-e.#Jon 8.12; 9.5 15Kalite monit atum melur keisi hoton arum bibe, bonta melur archok athaksi batji lapen la hem arlo kedo atum an aphan pathe-angji.#Mar 4.12; Luk 8.16; 11.33 16Lasi nangtum akethe-angta monit atum angno paturbongnon, latum nangtum akam keme hei hei pathek longnon, lapen sining athak kedo nangtum apo aphan anong pathenon.#1 Pit 2.12
Jisu Aron Ban Alam Kethan
17“Aron ban lapen montri atum kethan alam kepavirjisi ne vang-lo pura nangtum mathari. Ne la kepa-virji aphanle kevang kali, bonta la kepachokpetji aphansi vang-lo. 18Pima ne chenamsi nangtum aphan nangpulang, sining lapen pirthe avedet detik ke lapen aron alam an chekokpet petik ke aron angbong pen amek isi, kalite tokbor amuso isinatta virvedetji.#Luk 16.17 19Lahelo badu tame bangso ahukum hei hei angbong akebinei ahukum eson anle kroikrera monit atum aphan thanlote, alangli sining arat angbong akebinei abang pusi chethangji; bonta la kroira than lote labangso abang sining arat angbong akethe abang pusi chethangji. 20Lasi ne nangtum aphan nangpulang, aron thekser lapen Pharisi atum apar nangtum adhoromipet akam lit munak nete nangtum jonghe setta sining arat lutdun longledetji.
Ning Kethi Alamthe Kethan
21“Hako amonit atum aphan kepu alam nangtum arjulong-lo, atheke, ‘Nangtum bang apran enri, pima badutame bang apran enlote lake bisar adai phomeme atheng-lo.’#Keba 20.13; Keth 5.17 22Bonta ne nangtum aphan nangpulang, badutame akorte aphan aning kethi abang aling ke bisar adai phomeme atheng-lo; lapen badutame akorte aphan junodak alam pen ington lote lake rong amei angbong adai phomeme atheng-lo, lapen badutame, ‘Nang kelu pik abang!’ pule pulote lake Chom ame angkang along keklo meme atheng-lo. 23Lahelo nang dovan athak Arnam aphan athok ajir kepi ahut nang korte pen ning keche-oi do pu nangning chemathathu lote 24dovan along nang kepi adan che-o tekang-ra aphrangsi damra nang korte pen jalangtha, lapen la aphile vangthura athok ajir pinon.
25“Nangphan nang kekosor abang pen nang tovar kedam rap rap ahut-le jirpo jalang seraknon, lapu kalite nangphuthak kekosor abang nangphan kangsai abang arideng nanghodaiji, lapen nangphan chedanbang arideng nanghodaisi nangphan phatek nang-bengthotji. 26Chenamsi ne nangtum aphan nangpulang, asapso adai anta nang tupetpetik-ke hadak pen nangphan nangpajokjedetji.
Beisa Alamthe Kethan
27“Nang beisa klemri pu keputang alam nangtum arjulong-lo.#Keba 20.14; Keth 5.18 28Bonta ne nangtum aphan nangpulang, beisa keklemji aning pen arloso aphan kelang abangphutin halabangso ahut pen la aning arlo labangpi pen beisa klem tang-lo. 29Lapen nangmek ar-ele nangphan pap paklem lote la hekjok-ra varchornon. Pima nangmethang abang arpum pen nangphan Chom arlo kevarchor aparte nang ok ethan kevirdet abang nangphan memu.#Mat 18.9; Mar 9.47 30Lapen nangri ar-e jongsi nangphan pap paklem lote la thanpet-ra varchor-non, pima nang methang abang arpum pen nangphan Chom arlo kevarchor apar nang ok ethan kevirdet abang nangphan memu.#Mat 18.8; Mar 9.43
Piso Kecheti Alamthe Kethan
(Mat 19.9; Mar 10.11-12; Luk 16.18)
31“Lapen puthot puthutang-lo, ‘Badutame, apiso chetilote alangli labangpi aphan kecheti aloh papi-nang.’#Keth 24.1-4; Mat 19.7; Mar 10.4 32Bonta ne nangtum aphan nangpulang, badutame beisa pen apot apar apiso chetilo tangte alangli labangpi aphan beisapi pinchong tang-lo, lapen badutame la ketitang arloso pen chepangri lote alangli beisa klemdet-lo.#Mat 19.9; Mar 10.11-12; Luk 16.18; 1 Kor 7.10-11
Seme Ketang Alamthe Kethan
33“Puthot hako ahut monit atum aphan kepu alam nangtum arjulong-lo, atheke, ‘Kechobei aseme tangri, bonta Hemphu aphan nang kechaktang aseme atengle klemnon.’#Levi 19.12; Kela 30.2; Keth 23.21 34Bonta ne nangtum aphan nangpulang, thangnat asemeta tangri; sining penta kali, pima lake Arnam anghoilo;#Jem 5.12; Isa 66.1; Mat 23.22 35lapen pirthe penta tangri, pima lake alangli kedong adimlo; lapen Jerusalem penta kali, pima lake recho kethe arongsopilo.#Isa 66.1; Lun 48.2 36Lapen nangphu penta seme tangri, pima nangchu ejeng natta akelok kalite ake-ik nang pinchong thekthe. 37Bonta nangtum keningje alam ‘Kalang’ tangte Kalang, ‘Kali’ tangte kali paplangnang. Pima la pen apar ke kehingno pensi vang-lo.
Alar Kehui Alamthe Kethan
(Luk 6.29-30)
38“Mek alar mek, so alar so pu keputang alam nangtum arjulong-lo.#Keba 21.24; Levi 24.20; Keth 19.21 39Bonta ne nangtum aphan nangpu-lang, kehingno aphan khangri, lapen badu-tame nang kecheng ar-ele nang ardep lote la aphan arvi anatta chepithunon. 40Lapen nangphuthak kekosorra nangchoi keponji aning kehang abang aphan nangchoi kedingta papon lonang. 41Lapen badutame kilomitar isi kepa-thondunjile nangphan pabor-ilo tangte laphan nang kilomitar hini thondun non. 42Nanglong kechohang abang aphan pinon, lapen nanglong pen kechoramji aning kehang abang aphan pipedet cheplangri.
Hotur Aphan Kanghon
(Luk 6.27-28,32-36)
43“Nang tebok abang aphan chinghonra nang hotur aphan lang-selet nangji pu keputang alam nangtum arjulong-lo.#Levi 19.18 44Bonta ne nangtum aphan nangpulang, sining athak kedo nangtum a-Po asomar kecheplangji aphan nangtum ahotur atum aphan chinghonra nangtum aphan nang kechenek atum aphan Arnam angno ardom pinon, 45pima alangli kehingno lapen keme atum aphan arni pavangver, lapen dhoromi lapen dhoromime atum aphan arve pajang bomlo. 46Pima nangtum jongsi nangtum aphan kechinghon atum aphan chinghonchot lote kopi ale doma? Lapuson ke midu kerung atumta klemlo, kalima? 47Lapen nangtum jongsi nangtum akorte aphan chinghonchot tangte kopi kematha thekthe akam klemloma? Kekroi-krelang atum lapusonsi klembomlo, kalima? 48Tangte sining athak kedo nangtum Apo kechokpet asonthot-le nangtum ta chokpetnon.#Levi 19.2; Keth 18.13
Currently Selected:
MATHIU 5: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.