MATHIU 7

Bang Aphan Kangsai

(Luk 6.37-38,41-42)

1“Nangtum aphan nangkangsai sedetji aphan nangtum bang aphan ingsairi. 2Pima nangtum kangsai atengthotsi nangtum aphanta nang ingsaiji, lapen nangtum keteng asonthotsi nangtum aphanta nang-tengthudetji.#1 Rec 10.4-7; 2 Phur 9.3-6 3Lapen nang kopi apotsi nang methang amek arlo kedo athengpi achet chemathathedet-ra nang korte amekber langrong loma? 4Kalite nangmethang amek along thengpi achet dokok ta ‘Nangmekber nanghek-lang’ pu nang nang korte aphan kopusi puthek-loma? 5Angthin ke-ik abang! Aphrangke nangmethang amek arlo kedo athengpi achet chehekdet-tha; anke nang korte amekber kehekji aphan nang chechar pamepo.

6“Methan atum aphan mar kangthir piri, pima latum chetevarsi nangkor-rakpo. Lapen phak atum angno mukut-abor varri-pima latum la akeng pen dongthipji.

Hangnon, Rinon, Pachengnon

(Luk 11.9-13)

7“Hangnon, lapen nangtum aphan nangpidetji; rinon, lapen nangtum longji; pachengnon, lapen nangtum aphan nang ingpudetji. 8Pima kehang abangphutin longrepji, keri abang aling thek longji lapen kepacheng abang aling aphan ingpudetji. 9Kalite nanglitum angbong komane abang, asopo jongsi alangliphan him hang-lote laphan arlong pithurongjima? 10Mate la lang a-ok hang-lote pheruisi pithurongjima? 11Nangtum hingno setta nangtum methang asomar aphan dan akeme chepithek lote, la apar sining athak kedo nangtum a-Po ke alangli long kehang atum aphan koson an akeme ahormu pipoma!

12“Nangtum aphan monit atum kopi nangkeklempisi nangtum aning kehangma, lasonthot-le, nangtumta halatum aphan klempivernon; pima Moses aron lapen montri atum kethan alam acho la helo.#Luk 6.31

Tovar Krongni

(Luk 13.24)

13“Anghap angho kebi anat-le lut damnon, pima kevirdetji anat kedam anghap angho the-o, atovar ajamta thedung lapen la anat kelutdam atum ongdung; 14bonta kereng-iji achethe anat kedam anghap angho ke bihek, atovar ta chingkinret lapen la kethek long atum ong-e.

Ahok Lapen Kechobei

(Luk 6.43-44)

15“Kechobei amontri atum aphan cherehurnon. Halatum biresak arje cheparjansi nangtum along vang, bonta aning arlo ke halatum bang amar kethipon amahar atumlo. 16Athe pen nangtum halatum aphan chiniji. Ingsu arong ke drakha athe pathethe, kalite ingsuso arong ke thebo athe pathethe. 17Lasonsi thengpi keme arongtin ke athe keme pathe, bonta akeningjoino athengpi arong anke akehingno athesi pathe. 18Thengpi keme along akehingno athe pathethe, lapen ningjoino athengpi along athe keme pathe thekthe. 19Athe keme kepathethe athengpi arong an pipetsi me phrindutji.#Mat 3.10; Luk 3.9 20Lasi athe pensi nangtum halatum aphan chiniji.#Mat 12.33

Alam Lapen Akam

(Luk 13.25-27)

21“Nephan Hemphu, Hemphu pu kepu abangphutinle sining a-Rat lutdun longji, lapu kali; bonta sining athak kedo ne-Po aning kehang ateng keklem abang alingsi lutdun longji. 22Halabangso arni ake-ongpi atum nephan ‘Hemphu, Hemphu! Nangmen pen netum montrilo, lapen nangmen pen hi-i atum aphan phlung-lo, lapen nangmen pen kemanghu meme akam ake-ongpi klemlo’ pusi puji. 23Ansi ne halatum aphan thandakpo, ‘Ne nangtum aphan chinine pinlang, nedung pen damnon, kehingno keklem atum.’#Lun 6.8

Hemthur Longni

(Luk 6.47-49)

24“Tangte nelam hei hei karju lapen lapusonsi keklem abangphutin aphan ke abidi kedo amonit pen pangbardetpo. Atheke halabangso abang arlong athak ahem kimlo. 25Lapen arve jang-lo, chala vang-lo, tomon vang-lo lapen la kadokave halabangso ahem pholo, bonta la krepkrelo. Pima la arlong athaksi kimdet-lo. 26Lapen la nelam hei hei karju, bonsetta lapusonsi keklemkle abangphutin aphan ke akelupik amonit pen pangbardetpo. Atheke halabangso abang sangti athak ahem kimlo. 27Lapen arve jang-lo, chala vang-lo, tomon vang-lo, lapen la kadokave halabangso ahem pholo, lapen la krep-railo.”

28Jisu labangso alam hei hei ningje tangdet anke armu atum alangli kethan alam pen apot thirik-hurlo.#Mar 1.22; Luk 4.32 29Alangli ke hala aron thekser atum ason kali, bonta ajakong kedo abang ason thak-thaksi halatum aphan thanlo.#Mar 1.22; Luk 4.32

Currently Selected:

MATHIU 7: KARBIBSI

Highlight

Copy