MATHIU 4
4
Jisu Aphan Asat Kelang
(Mar 1.12-13; Luk 4.1-13)
1Ansi Jisu aphan Hi-i Sarpo asat kepalangjisi Karjong Jisu aphan kejejangtang ajo pondet-lo.#Ibr 2.18; 4.15 2Lapen jo phlikep niphlikep an humdetsi alangli an ingchirlo. 3Ansi asat kelang abang alangli dung vangsi alangliphan pulo, “Nangli jongsi Arnam a-Sopo tangte him cheplangnon pura la arlong hei hei aphan punon.” 4Bonta alangli thaksi pulo, “La hastro along tok tang-lo, ‘Monit him pen lok-le kereng-iji kali, bonta Arnam angho pen nang kebar alam athetin pensi reng-iji.’ ”#Keth 8.3; 4.6
5Ansi Hi-i Sarpo alangliphan Jeru-salem arongsopi kangthir along ponsi Kardomhemthepi angsong achele along paparjapsi pulo. 6“Nangli jongsi Arnam a-Sopo tangte ladak pen chingthubup non, pima hastro along toktang-lo.
‘Arnam nangli pen apot apherangke atum aphan hukum piji,
lapen nangli kaiketa nangli keng kopine arlong along kepatekungke detjisi,
halatum amethang ari pen nangliphan nangli rung ponphomji.’ ”#Lun 91.11-12
7Jisu alangliphan thaksi pulo, “Hastro along labangso alamta toktang-lo. ‘Nangli Hemphu, atheke, nangli Arnam aphan asat lang nangne.’ ”#Keth 6.16 8Puthot Hi-i Sarpo Jisu aphan kang-tuipik anglong along ponsi pirthe adang arat an lapen la adak atur an alangliphan paklang-lo, 9lapen alangliphan pulo, “Nangli jongsi nangli kengphu patongruira neliphan ardom lote neli la kadokave nangliphan nangpiji.” 10Ansi Jisu alangliphan pulo, “Damnon, Soitan! Pima la hastro along toktang-lo, ‘Hemphu, atheke nang Arnam aphan helo nang kangduk-kardom nangji, lapen alangliphansi ingdukchot nangji!’”#Keth 6.13
11Ansi Hi-i Sarpo alangliphan o-tekang-lo, lapen chini iktha, sining apherangke atum vangsi alangliphan ru-thaibomlo.
Jisu Galili Adet Kam Keklem Kepangcheng
(Mar 1.14-15; Luk 4.14-15)
12Ansi Jon Baptist aphan phatek thaptang-lo pu arjulongsi Jisu Galili adet damjuilo.#Mat 14.3; Mar 6.17; Luk 3.19-20 13Alangli Nazareth dodedetsi ha Kapernaum, Galili atalo akung arongsopi damsi ha Zebulun lapen Naphtali alongri do damlo.#Jon 2.12 14Isaiah montri keputang alam kepachekokjisi la plang-lo, atheke alangli pulo,
15“Zebulun alongri lapen Naphtali alongri,
talo anat kedam atovar along, ha Jordan parai,
Jihudi kalidet atum alongri, a-Galili!#Isa 9.1-2
16Kangting angbong kedo atum kethe-ang akethepi thek longji.
Kethi abin adet kedo atum aphuthak,
akethe-ang tur-angji.”#Isa 9.1-2
17Halabangso ahut pen Jisu pache-thang pangchengsi pulo, “Nangtum ning chiruinon, pima sining a-Rat tebok-het-lo.”#Mat 3.2
Bangphli Ok Kebeng Atum Aphan Jisu Kepha
(Mar 1.16-20; Luk 5.1-11; Jon 1.35-42)
18Jisu Galili atalo akung kung kedam un ahut korte banghini aphan, atheke Pitor pu abang a-Simon, lapen alangli korte Andriu aphan thek-long-lo. Latum alanvar talo along varlo, pima latum ke ok kebeng atumlo. 19Lapen alangli latum aphan pulo, “Ne phi phi nangdunnon, ne nangtum aphan monit kebeng atum nangpinchongpo.” 20Ansi latum hala mamat alan hei hei che-otekangsi alangli phi phi dunlo. 21Alangli asap damthusi akaprek banghini akorte atum aphan thekdamlo; latum ke Jebedi asopo Jems, lapen akorte Jon lo. Latum apo Jebedi pen pen telong arlo lan bu bomsi dolo. Jisu halatum aphan hang-lo, 22lapen hala mamat latum telong lapen apo aphan otekangsi alangli phi phi dunlo.
Jisu Kethan, Kepachethang, Lapen Keso Kepame
(Luk 6.17-19; Mar 1.39; 3.7-8)
23Jisu Sinagog hei hei arlo lam thanponbomsi Sining a-Rat alamjir abirta keme pachethang-ponbomsi, lapen rat atum angbong akaprek kaprek akeso lapen aphu keso an pamesi Galili adet adang an damtup-lo.#Sinagog: Bithe-bitha kepratsei a-Jihudi atum Arnam aphan kangduk-kardom adim #Mat 9.35; Mar 1.39 24Anke alangli nong Siria adet alongri an chethangpet-lo, lapen halatum alangli long ason kaprek kaprek akeso kepho atum, keklibup akeso kepho atum, hi-i kepholok atum, lapen thi-klak akeso kepho atum an aphan vanpet-lo, lapen alangli latum aphan pamepet-lo. 25Lapen Galili adet, Dekapolis alongri, Jerusalem pen Judia adet lapen Jordan parai pen armu ake-ongpi atum alangli phi phi dunlo.
Currently Selected:
MATHIU 4: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.